Category Archives: BCM News

Home Post

Missionary tirchhuak dawn

April ni 1, 2012 (Pathiani) hian Missionary Tirhchhuah Inkhawm, BCM Central Church, Aizawlah buatsaih a ni dawn a. Missionary Tirhchhuah Inkhawm hi Rev. Dr.RL Hnuni, Principal, AICS-in a kaihruai ang a, Rev. F. Sangvela, Executive Secretary, Aizawl-in a tirchhuak ang a; AGS i/c Mission, Rev.Dr.K. Lalrinthanga’n thuchah a sawi ang.

 

Tun tuma Missionary Tirhchuah tur te chu:-

 

Rev. Lalrinmawia te chhungkua

 

Rev. Lalrinmawiate chhungkua : Anni hi an chhungkua-in Thailand-a kal tur an ni a. Serving In Mission (SIM) leh Mizoram Baptist Kihhran (BCM) te thawhhona atanga Missionary kal tur an ni. An kalna tur hi ruahman fel vek tawh niin Visa pawh an nei fel tawh a ni. Rev. Lalrinmawia hi BCM Pastor (ordained) thawk lai a ni a, Pastor Bial hrang hrang a enkawl tawhin MIssonary atana lak a nih hnu-ah a kalna tur tih fel mai a nih loh avangin BLS Bookroom manager-ah a awm a, SIM hnuaiah thla 4 chhung Training-in Shillong-ah a awm leh a ni. Tin, a nupui C. Lalrempuii pawh hi BCM hnuaiah Missionary-in hun rei tak a lo thawk tawh a, Zoram Baptist Mission School, Birpara, Assam-Bengal a a thawh hnu-ah AICS-ah English Lecturer-in a awm leh a ni. Tunah hian fanu pahnih an nei mek a ni.

 

 

C. Lalremruata te chhungkua

  1. C. Lalremruata te chhungkua: C. Lalremruata hi Rev. C. Ngurhnema fapa upa zawk a ni a. A nupui Laltluangliani nen fanu pathum an nei mek a ni. Jharkhand State-ah Envangelist-atana lak a ni.

 

  1. C.Vanlalhruaia: S/o C. Pakunga, Serchhip khua hi Arunachal West Field-ah Music Teacher atan lak a ni.

 

BAPTIST CHURCH OF

MIZORAM

MISSIONARY TIRHCHHUAH INKHAWM PROGRAMME

A hun : 1st April .2012

A hmun : BCM Central Church, Aizawl

 

Inkhâwm hruaitu: : Rev.Dr. RL Hnuni, Principal, AICS
Presiding Minister: : Rev.F. Sangvela, Executive Secretary, Azl
Thuchah : Rev.Dr.K.Lalrinthanga, AGS i/c Mission
Tirhchhuah tur : 1) Rev. R.Lalrinmawia te chhung
2) Pu C. Lalremruata te chhung
3) Tv. C. Vanlalhruaia

ORDER OF SERVICE

Pathian fakna hla : KHB No.338
Pathian hnêna tawngtai: : Hruaitu
Thupuan : Upa H.Rothuama Secretary, BCM Central Church
Thilpêka Pathian chibai bûkna : KHB No.529
Thilpêk hlanna tawngtai Upa Dr.Dârchhâwna, Chairman, BCM Central Church
Pathian thu chhiar tùrte i) Upa Dr.RK.Lallianthanga, Secretary, Upper Republic Bial Mission Committee: (Joshua 1:3-9)
ii) Upa R.Biaksânga, Chairman, Tualchhûng Mission Committee: (Tirhkohte 1:6-8)
iii) Upa C.Ropianga, Chairman, Upper Republic Bial Mission Committee:(Johana 20:19-23)
Hmelhriattirna (Tirchhuah tur leh an chhungte : Inkhâwm hruaitu
Testimony (minute 5 theuh) : Tirhchhuah tùrte
Tirchhuahna : Presiding Minister
Tawngtaisakna Rev.V.Vânlalchhûnga, Bialtu Pastor, Upper Republic Bial
Presentation of gift i) Tualchhûng Mission Committeeii) Bial Mission Committee
Solo : 1) Lalnghâkliana Fânai2) C.R.Laldingliani
Zaipawl : i) Upper Republic Pastor Bial Zaipâwlii) Tualchhûng Kohhran Zaipâwliii) Aizâwl Area BCM Choir
Thuchah : Rev.Dr.K.Lalrinthanga
Pathian fakna hla : KHB No.398
Malsawmna : Rev.C.Zatâwna

BBS Chawngte Building thar hawn a ni ta

 

 

 


 

 

March 27 (Thawhlehni) chawhnu dar 2:30 khan Baptist Boarding School, Chawngte building thar chu Pathian hnena hlanin hawn a ni ta.  Pu Biakthansanga, Headmaster, BBS Chawngte-in report pe-in AGS Mission – Rev. Dr. K. Lalrinthanga’n a hawng ta a ni.

Kan sawi tawh ang khan Baptist Boarding School, Chawngte hi kum 2007 may 16 zan khan Misual-in an hal a, building hi a kang fai deuh vek a, khawtlang leh Kohhran ho ten maurap-in School kal theih tawk tawk turin School hi an khawr a. BCM Headquarters atangin School sak thatna tur Appeal te siamin Mizoram Baptist Kohhran hrang hrang ten sum an thawhkhawm atangin Building thar hi sak a nit a a. Sum leh pai bakah Work Camp neiin Kohhran, Pawl leh mimal tlawmngai ten a sak hna hi an thawk a ni.

 

 

He Building thar hi a dung Feet 130, a vang feet 20 leh verandah feet 6 a zau a ni a, chhawng khat (Ground floor leh First Floor) a ni. A sak nan hian cheng nuai 43 vel hman a ni a, hei bakah hian kan sawi taw hang khan hnatlang tha engemaw zat a tel a ni. Tunah hian he School-ah hian KG-I atanga Class X thleng hawn a ni a. School naupang 492 an nei mek a ni.

 

Worship Dance Competition

Mizoram Baptist Kohhran, Worship and Music Department buatsaihin March 31 (inrinni) hian TKP Junior Group pualin Worship Dance intihsiakna BCM Ramthar Biak In, Lunglei-ah neih a ni dawn a. April 1, 2012(Pathianni)-ah nilengin Programme hman chhunzawm a ni ang. He Worship Dance Intihsiakna turah hian Group 14 tel turin an in report tawh a ni.

 

Intihsiakna hi Inrinni chawhma lam dar 11:00-ah tana  ni ang a, nikhat chhung hian zo thei tura ngaih a ni a, a tul ang zelin zan lam hun pawh an hmang ang. Pathianni zing dar 10:00 ah Pathian biak inkhawm, vantlang huapin neih a ni ang a, Upa C. Thanseia, BCM Worship & Music Committee member -in inkhawm a kaihruai anga, rev. R. lalbiakliana, Director, BCM Worship & Music Department-in thuchah a sawi ang. Lunglawn Bial Zaipawl, Ramthar Kohhran Standing Choir leh Nl. Esther Lalruatfeli tem Pathian fakna hla an sa ang a, Worship Dance Competition-a pakhatna-in Worship dance an entir ang.

 

Pathianni chawhnu dar 01:00-ah Fellowship progamme a awm leh ang a, Pu C. Lalchungnunga leh Nl R. Lalbiakdiki ten an kaihruai dawn a ni. Group zai – Gospel River Band, Tabithians, Beer-La-Hai Roi te an zai ang a, Nl. F. lalremsiami leh C. Vanlaldintharpuia te an zai bawk dawn a ni. Worship Dance lawmman pahnihna latuten an entir bawk ang. Fellowship-ah hian Worship Dance lawmman sem a ni ang a, rev. H. LIanngaia, General Secretary-in lawmman hi a sem dawn a ni.

BBS building thar hawng dawn

 

 

 

 

 

March 27 (Thawhlehni) chawhnu dar 2:30 hian Baptist Boarding School, Chawngte building thar chu Pathian hnena hlanin hawn a ni dawn ta. Hawnna Inkhawm hi Rev. R. Lalrintluanga, Mission Co-ordinator-in a kaihruai ang a, Pu Biakthansanga, Headmaster, BBS Chawngte-in report pe-in AGS Mission – Rev. Dr. K. Lalrinthanga’n a hawng ang.

 

Baptist Boarding School, Chawngte hi kum 2007 may 16 zan khan Misual-in an hal a, building hi a kang fai deuh vek a, khawtlang leh Kohhran ho ten maurap-in School kal theih tawk tawk turin School hi an khawr a. BCM Headquarters atangin School sak thatna tur Appeal te siamin Mizoram Baptist Kohhran hrang hrang ten sum an thawhkhawm atangin Building thar hi sak a nit a a. Sum leh pai bakah Work Camp neiin Kohhran, Pawl leh mimal tlawmngai ten a sak hna hi an thawk a ni.

 

 

He Building thar hi a dung Feet 130, a vang feet 20 leh verandah feet 6 a zau a ni a, chhawng khat (Ground floor leh First Floor) a ni. A sak nan hian cheng nuai 43 vel hman a ni a, hei bakah hian kan sawi taw hang khan hnatlang tha engemaw zat a tel a ni. Tunah hian he School-ah hian KG-I atanga Class X thleng hawn a ni a. School naupang 492 an nei mek a ni.

 

 

 

 

 

B.B.S.  SAWMNA

Kohhranten tawngtai, thilpek leh tha tam tak senga kan sak thar,

BAPTIST  BOARDING SCHOOL, CHAWNGTE chu March 27, 2012 (2:30PM) hian

Associate General Secretary, Rev.Dr.K. Lalrinthangan a hawng dawn ta.

He School sak puitlin theih nana mi inpe zawng zawng hnenah lawmthu kan sawi a.

He ni ropui tak min telpui tur hian  he schoola lo thawk tawh leh he school-a zirlai lo ni tawh

zawng zawngte kan sawm vek a che u.

Lalpan thil ropui takte min tihsaka kan lawm hle a ni.

 ……….

Headmaster & Staff, BBS, Chawngte

BCM This Week(19-25 March)

General Secretary Zote-ah:

Zote Kohhran (Chhipphir bial) chuan an Kohhran kum 100 tlin lawmna (Centenary) March 23, 2012 khan an hmang a. Zote khaw chhuak hmun hrang hranga mi inchah khawmin BCM General Secretary, Rev.H. Lianngaia chuan zaithiam eng emaw zat hruaiin a hmanpui.

 

 

AGS i/c Mission-in BBS Chawngte hawng dawn

Misual kut tuara kang ral, mi thahnemngaiten tawngtai, thilpek leh Workcamp hmanga an sak that leh Baptist Boarding School Chawngte chu March 27, 2012 hian AGS i/c Mission, Rev.Dr.K. Lalrinthangan a hawng dawn ta.(Read Detail)

 

 

Executive Secretary Bunghmun Bialah

Rev.F. Sangvela, Executive Secretary, Aizawl Area chuan March 22-25, 2012 chhunga Bunghmun Pastor bial inkhawmpui, Bunghmun Biak ina neih mekah speaker niin a hmanpui.

 

 

Martarte Ni  hmag- Thih Thlenga Rinawmna

Tunkar  Pathianni, March 25  hi BCM Ni bik- ‘Martarte Ni’ a ni a. Thih thlenga Rinawmna tih thupui hmangin Biak in tinah hun hman a ni ang a, India rama Sakhuana avanga tihduhdahna a reh theih nan tawngtairual hun siam a ni bawk. (Read Detail)

 

 

 Pastoral Coordinator Lungsen Bialah

Lungsen Pastor bial chuan March 22-25, 2012 hian Mahanaim Biak inah Inkhawmpui an hmang mek a; Pastoral Coordinator, Rev.Lalthangliana Hnamte chuan speaker niin a hmanpui.

 

 

Worship & Music Director Tawipui Bialah

Tawipui Pastor bial TKP chuan March 23-25, 2012 hian Tawipui N-I Biak inah Zaikutpui programme an hmang a; speaker atan Worship & Music Director, FOD Director ni bawk, Rev.R. Lalbiaklianan a hmanpui.

 

 

Christian Education Director Haulawng Bialah

Christian Education Department chuan tun Weekend hmang hian Pastor bial 2-ah Sunday School Seminar leh campaign programme an hmang a. Haulawng bial Lamthuamthum Biak inah Director, Rev.B. Lalramhlunan a hmanpui a. Aizawl Zotlang bialah SS. Instructress, Pi PS.Lalhmingthangin a hmanpui.

 

 

Pangzawl Bial Upa & Rbt. leh an Nupuite Seminar

March 23-24, 2012 hian Pangzawl Pastor bial huam chhunga Upa & Rawngbawltute leh an kawppuite chuan Venghlun Biak inah an bialtu Pastor, Rev.C. Lalhungliana hovin Seminar an nei.

 

 

Phuldungsei Bial Inkhawmpui

Phulsungsei Pastor bial chuan tun weekend hmang hian Marpara Kohhranah Inkhawmpui an nei a. Speaker atan Rev.H. Killuaia an hmang a. Thupui chu ‘Isua Krista lo kal lehna’ tih a ni.

 

 

Tlabung Pastor Bial KNP Inkhawmpui

Tlabung Pastor bial KNP chuan March 24-25, 2012 hian Immanuel Biak inah Inkhawmpui an nei dawn a, speaker atan Rbt. P.Lalroluahpuia leh Rbt. P.Lallawmawma te an hmang.

 

 

Thawktu thar- Camelia Lalhruaitluangi

BCM Social Concern Department chuan Christian Counselling Centre-a thawk turin Counsellor atan Nl. Camelia Lalhruaitluangi, Lunglei Bazar veng chu a la thar a, April thla atanga zawm tur a ni nain tul bik thil avangin a bung tan nghal.

 

 

Evangelist-te Rawngbawlna:

Tun lai hian kan Evangelist-te hmun hrang hrangah rawngbawlin an bung mek a. Kan hriat theih chin hengte an ni: Upa K. Lawmsanga (Ambassador for Christ team) Aizawl Bethlehem Kohhranah. Upa C. Tlangmawia (Mizoram for Christ team) S. Vanlaiphai Sikul Veng Kohhranah. Evan.LH.Vanlalmawii (Ebenezer Ministry) Aizawl Kanaan Kohhranah. Upa K. Lalenga (Chanchin Tha Chhuangtu team) Saiha Meisavaih ECM bialah. Evan F. Lalrinawma (Kraws Sipai team) Lawngtlai Vengpui Kohhranah.

 

Martarte Ni hmang dawn

March 25, Pathianni hi BCM ni pawimawh – “Martarte Ni” a ni a. He Ni hi BCM chuan kum tin, March thla, Pathianni hnuhnung ber-ah kan hmang thin a ni.  Missionary te, Evangelist te, Pathian ram leh Lal Isua avanga tih duhdah tuara, an nunna hial chan te, Mizoram leh khawvel hmun hrang hrang a Krista avanga Martar te leh vawiin thlenga martarna kawng zawh mek te pual hian BCM hian kum khatah ni bik pakhat hi  hman ve ni se tiin kum 2002 Assembly chuana lo passed a; chumi bawhzui chuan Administrative Committee chuan March thla Pathianni hnuhnung ber chu Martarte Ni atan a lo ruat nghet ta a ni. Hemi ni hian Headquarters atanga thupui thlan inang tlang hmangin Baptist Kohhran Biak in tinah hun hman a ni thin. Kumin Martarte Ni thupui atan hian “Thih Thlenga Rinawmna” (Thupuan 2:10)  tih thu hmang hian BCM Biak In tinah thuchah ngaihthlak a ni ang a, Headquarters atanga tawngtai thupui duan sa hmangin Marte te Ni Pualin ram pumah Tawngtairualna neih a ni ang.

Tawngtai rual thupui:  

  1.  Mizoramah harsatna tawk lova Lal Isua kan rinna kan la puanchhuah theih avanga  lawmthu sawina
  2.  Krista rinna avanga martarte avanga lawmthu sawina
  3.  Krista rinna avanga tihduhdah tuar mektute tan
  4. Krista rinna avanga tuar tur leh chan (hloh) tur awm apiang tuar ngama kan chan ngam ve theih nan Thlarau Thianghlim tanpui dil nise
  5. India ramah sakhaw thurin avanga intihduhdahna a lo reh theih nan

…………………

 

THUCHAH:

MARTAR AWMZIA
He thu hi thuhriltu-in a thusawi tanpuitu atan a duh angin a hmang thei ang a, a duh chuan mipuite hriat atan a chhiarchhuak thei bawk ang. Martar awmzia chu mahni sakhaw vawn leh thurin phatsan duh loh avanga tihhlumte hi martar tih an ni.

Martar tih tawngkam hi Greek tawng “martus” tih atanga lak chhawn a ni a, a awmzia chu ‘thuhretu’ (witness) tihna a ni. A tir te-ah chuan Lal Isua tisa chan lai leh a tho leh taksa hmutu apostol-te sawina tlukah ngaih a ni. Kristiante tihduhdahna a lo awm tak fo hnuah chuan an rinna avanga harsatna leh tihduhdahna tuarchhuaktute sawi nan hman a nita a. An rinna avanga tihhlum hialte an lo awm tak hnuah phei chuan, rinna thihpuitute sawi nan hman a lo nita a ni (Oxford Dictionary of Christian Church, p. 1046). Sap tawngin ‘martyr’ tih a ni a, Mizo tawngin ‘martar’ kan ti a ni. Kristian-te chauh lo pawh sakhaw dang zuitu, an sakhaw thurin thihpui hial khawpa tuartute an awm ve tho avangin hun lo kal zelah ‘martar’ tih tawngkam hi rinna thihchilhtute sawi nan zau takin kan hmang ta ni berin a lang.

Sawrkar laka martarna:
Kristiante hi sakhaw hrang hrang zuitute zingah martar tam ber an ni hial awm e. Thuthlung Thar kohhran a lo din atanga rei lote-ah Stephana chu a chipui Juda-te tihduhna avangin a martar a. CE (Christian Era) 64-ah Rom lal Nero-a kut atangin Kristiante’n tihduhdahna nasa tak an tuar a. Tin, CE 96-ah Domitiana kut atangin an tuar leh a. Bible-ah hming malmana ziak ni lo mahse, Hebrai lehkhathawn ziaktu chuan Krista an rinnna avanga thingzainaa zaibun te, khandaiha sahhlum te leh tihduhdahna avanga hreawm tuartu tam tak an awm thu a sawi a (Heb. 11:36-38). Hebrai Lehkhathawn hi CE 95 hnu lama ziak nia rin a ni. Chuti anih chuan, heng martar te leh tihduhdah tuartu a sawite hi heng tihduhdahna tum hnih tuartute pawh an ni thei ang.

AD 95 hnu lamah phei chuan Rom sawrkar lak atangin tihduhdahna hmun hrang hrangah a kahpah deuhin a thleng zui zel a. Chutiang hnuah chuan Kristiante zingah lehkhathiam leh khawtlangah pawh mi langsar tak tak, tawngka leh thuziaka Kristian thurin tantu leh thehdarhtu, sawrkar thuneitute hnenah pawh an dikna leh sawrkar pawi sawilo sakhua a nihzia thlentu mi eng emaw zat an lo chhuak a. Heng mite hi ‘Kohhran Pa’ tih an ni a, ‘Sawipuitu’ (apologist) an ti bawk. Chutiang mi chu tihduhdahna hnuaiah mi tam tak an thi a ni. Chutiang zinga martar langsar zualte chu Justin-a (Justin Martara an tih tak hial) leh Polycarp-a Samurna bishop te an ni. Hei hi CE 150-160 lai vel a ni. CE 250-313 inkarah phei chuan Rome ram pumpuiah tihduhdahna runpui a thleng a, Rome ram awp chhungah Kristiante tan khawii hmun mah a him lo. Hetih hun hian an rinna avanga tihduhdahna a nasat em avangin mi tam takin an rinna an phatsan a. CE 325-ah Rome ram awptu Constantine-a’n Kristian-te tana zalenna a han hawn meuh chuan kohhran ho zinga inhnialna lian tak chu tihduhdahna hun chhunga rinna phatsantute kohhrana an lo luh phalsak leh phalsak loh chungchang ani.

Heng kan sawi tak hun (period) hnu lam, tun atanga hun kal rei tawh deuh si-ah te pawh ram hrang hrang-ah martar-na a thleng thin tih kan hria. Communist ramah te a thleng tam zual awm e. Chungte chu kan sawi vek seng lo vang.

Kristiante laka Kristian-te martarna:
Rome sawrkar hnuaia tihduhdahna a reha kohhran a lo zalen tak hnuah chuan kohhran chu pakhat, ‘Catholic Church’ (huapzo kohhran) chauh a la ni bawk a, a lianin thil a tithei em em a. Sawrkar pawhin tan rualpui atan an duh avangin, an ngam ngailo a ni. Hetih hun laia kohhran kalphung leh Pathian thu hrilhfiah dan dik ti lotute chu an chep em em a. Kohhran leh sawrkar an tanrual avangin, kohhran thlurpui chuan a kalphung sawiseltute chu sawrkar kut hmangin nasa takin a nek chepin a sawisa thin. Heng hun chhung hian Baptist Kohhran bul tan tu nia sawi thin-‘Anabaptist’ an tih mai, mi tam tak chuan an rinna an martar-pui a ni. Protestant kohhran rau rauah pawh Baptist kohhran-te hi martar-a thi tam ber niin rin a ni. Heng kan sawi bakah hian Kohhran hun tawng chhoh hun hrang hrangah martarna khawp hiala Kristian leh Kristian intihduhdahna a thleng fo thin a ni.

Martar ngaihdan diklo:
‘Tawng hi a nung e’, an lo ti thin a, a dikna chen a awm a ni ang. Nunna nei chu an thang thin angin, tawng pawh hi a thang zel a, a tira a awmzia bak thleng kan kawhtir chang a awm thin. ‘Martar’ tih tawngkam pawh hi a bul takah chuan a chungah kan sawi tawh angin, sakhaw thil bika rinna thihpuitute sawina a ni. Tunlai hian ‘political martar’ te kan tita zel a. Tin, kan rinna fiaha a awm avanga thi pawh ni lo – rawngbawlna hmuna natna chi hrang hrang avang leh accident-a thite pawh ‘martar’ kan inti ta lek lek a, hei hi chu ngaihtuah chian deuh a tul hle. Martarte ropuina ang khum phak chiah lote ‘martar’ hming pe-a inchawimawi hi a lawmawm viau lain zahthlakna lai pawh a awm thei awm e. Martar hming pe kher lovin a chhan ropui takin a thih theih tho tih hi pawm tlang ila a tha awm e. Kan hlawh phak chiah loh hming put hi a tul lem lo ve. Martar chu martar an ni.

Nungchunga martar (living martyr):
Mahni duh thua martar ngawt theih a ni lo. Kan inpekna avang a nih theih laiin, Pathianin min hruaina a pawimawh. Kohhran ding tir lamah kha chuan martar thisenin Pathian kohhran a kui tiak duh pawh a ni thei e. A hunin a zir tlat a, martar pawh an ngaisangin an hreh lo. Tunlai pawh hian a tulna ram te pawh a la awm mek a, mi tam tak an la martar mek. Amaherawhchu keini rawngbawlna chinah hi chuan Pathianin tul a ti kher rih lo pawh a ni thei bawk.

Engpawh nise, ‘kan nun pawhin, kan thih pawhin, Lalpa tana nung leh thi kan nih theih nan, kan nun hi a tul ang zela Krista tana tuar ngama kan awm hian ‘nungchunga martar’ (living martyr) a nih theih a, chu chu a pawimawh ber a ni. Thih kher hi Pathian lawmzawng a ni lo va, Pathian ram zauna pawh a ni kher lo thei. Thih ngam lu pu-a Lal Isua thuhretu rinawm nih hi ‘martar-na’ a tlinga, a tul a nih chuan, ‘thihphah hial khawpa rinawm’ turin i in buatsaih ang u.

…………………

M.TKP Inkhawmpui hun ruat fel

MTKP Executive Committee Meeting, nimin, March 20, 2012 -a neih chuan Mizoram Thalai Kristian Pawl Inkhawmpui hun atan Marh 21 – 24, 2013 a ruat fel ta.  Inkhawmpui thupui atan  “Lalpa hman tlak” (II Tim. 2:21) tih an thlang fel nghal bawk.  MTKP Inkhawmpui Programme leh tul dang te lo bawhzui turin OB te ruat an ni a, Inkhawmpui hlabu pawh buatsaih leh tura ruahman a ni bawk.

MTKP Inkhawmpui 2013 hi Haulawng Pastor Bial-in, Haulawng Lamthuamthum-ah an thleng dawn a, kum 2010 atang khan inbuatsaihna an kalpui tan tawh a ni. Mizoram Thalai Kristian Pawl (MTKP) Inkhawmpui hi kum 1998 hmalam kha chuan kum tin neih thin a ni a. Kum 2000 atang khan kum khat dan-ah neih thin niin 2010 thleng khan hman a ni a. 2011 -ah FOD Inkaihruaina revised a ni a, chutah chuan MTKP leh MBKHP Inkhawmpui chu kum hnih dan zela neih turin inkaihhruaina-ah dah a ni ta a ni.

BCM This Week

 

 

  • R&D ah kum 3 Project atan Training  buatsaih :
    BCM Relief & Development Department bul tumin kut hnathawktute leh hmeichhe rethei zawkte hmasawnna tur Project planning training March 12-17 chhung hian R & D Training Hall, Ramzotlang, Serkawn-ah neih mek a ni. BWAID Australia pawhin an rawn support theih tur thu an rawn sawi tawh bawk.He Project hi July, 2012 atanga kum 3 chhung awh turin Australian Baptist World Aid leh Association for Stimulating Knowhow (ASK) India te nena tang hova kalpui tur a ni dawn a ni. He Project-ah hian Kut hnathawktu, thingtlang khaw thlan bik 30 te hnenah SALT Farming, Health leh Hmeichhe harsa zualte tanpui leh dawmkan kawngah hma a la dawn a ni. He Training neihpui tur hian BWAid atangin Project Officer, Felicity Errington lo kalin Training a hmanpui mek a ni.

 

  • Lunglei South ABC Tawngtai dawn: Tunkar Pathianni chawhma inkhawmah khian Lunglei South ABC  huam chhunga Tualchhung Kohhran hrang hrangah kan ram sualna pung nasa lutuk a reh theih nan leh hemi kawnga hmalatute tha tichak turin tawngtai rualna an nei dawn.
  • Diltlang Bial TKP Meet: Diltlang Pastor bial TKP chuan March 16-18, 2012 hian Diltlang Biak inah ‘Thalaite u, in that lai chen ula’ thupui hmangin Meet an nei a. He TKP Meet hmanpui tur hian MTKP hruaitute Rev.Samuel Lalremsanga(Organiser MTKP), Pu R. Lalrochama(Fin.Secretary, MTKP), Tv.C. Lalengzuala(Editor, Thalai Entu) Zaithiam  leh Nl.CR. Laldingliani te an kal.
  •  Bungtlang Pastor Bial BKHP Seminar: Bungtlang Pastor Bial BKHP chuan March 16-18, 2012 chhung hian Bungtlang Biak inah ‘I rawngbawlna kha hlen rawh’ tih thupui hmangin Seminar an nei mek a. MBKHP atangin Asst. Secretary, Dr. Chawngthanpari leh Vice President, Pi F. Zanguri ten an hmanpui.
  •  Aizawl City KNP Hruaitu Seminar: March 16, 2013 (Zirtawpni) hian Aizawl khawpui huam chhunga Kohhran tina KNP hruaitute chuan Central Church-ah Seminar an nei mek a, FOD Director, Rev.R. Lalbiakliana’n a hmanpui.
  •  Hnahthial Model KNP te Pangzawlah: Vawiin Pathianni hmang hian Hnahthial Model Kohhrana KNP te chuan Pangzawl Ramrikawn Kohhran an tlawh dawn a; zingah kalin tlaiah an haw leh ang.
  •  KNP Inkhawmpui: Zobawk Pastor bial KNP chuan March 17-18, 2012 hian Bazar Biak inah Inkhawmpui an nei mek a. Bialtu pastor thar pahnih, Rev.F. Lalsangliana leh pro Pastor VL. Nithanga te bakah FOD Director, Rev.R. Lalbiakliana’n a hmanpui.
  •  Tlabung Unit BKHP Diamond Jubilee: Tlabung Unit BKHP chuan March 15, 2012 khan an din champha kum 60-na, Diamond Jubilee an lawm a. MBKHP Organiser, Pi B. Singpari ten an hmanpui.
  •  Evangelist Team te Rawngbawlna:  Kan hriat theih chinah BCM Recognised team zingah Invaders for God (Speaker: P.L.Sanglura) te chuan Chawngte ‘L’ ah rawngbawlna an nei mek a. Upa K. Laltawnga te pawhin Chawntlangpui(?) ah Ruihhlo ngaite pualin Camp an nei bawk.

BCM President thar-Rev.Dr.Raltawnga

 

Mizoram Baptist Kohhran President thar, Rev. Dr. Raltawnnga chuan March 8, 2012 khan Rev. Dr.K.Thanzauva hnen atangin Charge a la ta.  Rev. Dr. Raltawnga hian 2013 Assembly thleng BCM a kaihruai tawh dawn a ni.

Rev. Dr. Raltawnga hi 1988  khan Associate General Secretary i/c General Administration atân Assembly-in a thlang a, 1991 March thleng a thawk. Rev. Hrangêna a thih tâk avângin 1990 August atanga 1991 March thla thleng General Secretary hna nên a kawp.  1991 April atanga 1998 April 22 thlengin General Secretary hna a thawk a. 2001 atanga 2004 April thlengin Aizâwl-ah Executive Secretary hna a thawk bawk. Kum 1987 khân Assembly Chairman a ni a, 2005-ah President a ni a, 2007 hian President-elect atân thlan a niin 2008 ah President a ni a, 2011-ah President Elect-ah thlan nawn leh a ni a, kumin 2012 hian President a ni chho leh ta a ni.

 

……………….

Rev. Raltawnga B.A (Hons); B.D; M.A; D.Th

 

            Rev. Raltawnga hi January 9, 1944-ah Hmuntlâng khuaah a lo piang a. Ft 5’, 4”-a sang a ni a, a pa chu Kâpchhûnga(L) a ni a, a nu Hrângtluangi(L) a ni. Amah hi Chhakchhuak hnam a ni a, unau pianpui pahnih a nei. Hmuntlâng khuaah hian 1958 khân Pâwl ruk a zir zo va. Hemi kum vêk hian an bialtu Pastor Rev. B. Thangseian he khuaah hian baptisma a chantîr. Kum 1973 December 4-ah Lalthanchhingi Hauhnâr (d/o H. Hautluanga) nên Lunglei Vênglai Baptist Kohhran Biak inah an innei a. Rev. K.T. Chungnungan a vawntîr. Fa pali, mipa pahnih leh hmeichhe pahnih an nei.

 

Lehkha zirna lam : Mautam kum 1959 khân sikul kal thei lovin hlo a thlo a. Kum 1960-61 khân Region High School Lawngtlai-ah pâwl sarih leh pâwl riat a zir zo va. 1962 leh 63-ah Gandhi Memorial High School-ah pâwl kua leh pâwl sâwm zovin 1964-ah HSLC exam chu a pass bawk. Kum 1966-ah St. Edmund’s College, Shillong-ah P.U. a pass a, 1969-ah B.A (Economics Honours) a zo. 1965 October 3-ah a piangthar a, rawngbâwl tûra Pathian kohna chhângin Union Biblical Seminary, Yeotmal(Yavatmal)-ah Pathian thu a zir a, 1972-ah B.D. a zo. Kohhrana a thawh hnuin Kohhranin literature lam zir tûr a mamawhna avânga tirin 1983-84 chhûngin Selly Oak College, Birmingham (UK)-ah BMS chawmin Communications lam a zir a. Cross-cultural communications leh Mission lamah Certificate course a zo bawk. Hetih lai hian West Bromwich College of TV & Technology-ah Television programme production course thla thum chhûngin a zo a, hei hi certificate course a ni. Kum 1985 khân Wheaton College Graduate Scholl, Wheaton, Illinois (USA) atangin M.A. (Communications) pawh a zo leh. Kum 1998 atang khân Aisa Baptist Graduate Theological Seminary, Baguio City Philippines-ah theology subject-ah Doctor of Theology degree course a zir a, 2003-ah Doctor of Theology (Th.D) degree chu a la ve leh.

 

Rawngbawlna lam : College-ah a kal laiin Shillong Mizo Kohhranah a theih angin rawng a bâwl a, Usher hna te, naupang lam Sunday school Secretary hna te a thawk thîn. Tin, College zirlaite tâna Camp leh English Service buatsaihtu pâwl Shillong Inter-Collegiate Evangelical Union pâwlah Secretary-ah te a tang thîn. Pathian thu a zir laiin Operation Mobilization leh India Every Home Crusade zawmin India ram state panga (M.P; M.H, U.P; Gujerat, Rajasthan)-ah rawngbâwlin khaw 250 vêla tlawh tawh. Kum 1972 July thla atangin full time a rawngbâwl tûrin Mizoram Baptist Kohhranah a lut ta a ni.

 

Baptist Kohhrana hna hrang hrang a chelh tawh te: July 1, 1972 atang khân BCM-ah full time-in a thawk tan a. Sunday School leh Liteature lam hnaah Upa R.T.Bawia a tanpui a. Lehkhabu ziak tûr endik hna (editing) leh hna tul dang awm apiang thawhtîr a ni. August 72 atanga April 74 thlengin Kristian High School Sêrkâwn-ah zirtîrtu hna a thawk a, hemi kum hian Jubilee Bible School-ah zirtîr hna nên a kawp bawk. Kum 1973 January atangin April 74 thleng High School-ah hian full time teacher niin Hostel Warden hna a thawk. Hemi kum January thla hian Vênglai Baptist Biak inah Probationary Pastor atân lâk luh a ni a, Lunglei khaw pumpuiah bialtu Rev. Lama chu Pastor hnaah hian a pui thîn. Hemi kum vêk hian Bible School-ah zirtîr hna thawkin, mipa leh hmeichhe hostel a enkawl kawp bawk. 1974 May atanga 1979 May 17, thlengin Thingsai bialah pastor hna a thawk a, Cherhlunah Pro. Pastor-in a awm phawt a, ordained hnuah a awm tlang ta zêl. 1975 March thlaah Zobawk Ebenezer Kohhranah BCM Assembly chuan Pastor atân a nemnghet (ordain). June 1979 atangin 1980 chhûngin Jubilee Bible School-ah zirtîrtu hna a atangin 1980 chhûngin Jubilee Bible School-ah zirtîrtu hna a chelh.

 

            Assembly-in 1980-ah Literature Secretary atân a thlan tâk avângin Bible School a zirtîr hna chu session hnihna atang chuan part time chauhvin a thawk. 1982 &1983 June thlengin Sunday School leh Literature Secretary hna a chelh kawp. Upa R.T. Bawia Bookroom manager-ah dah a nih tak avâng a ni. Kum 1977-ah Shillong-ah Bible lehlin hna atân training thla khat leh a chanve a nei a. Chuta tang chuan BCM aiawhin Mizo Bible translation committee-ah telin, Thuthlungthar bu letlingtute zîngah a tel a, lehlin hna (first draft) hi 1983 May thla khân zawh a ni. 1983 July atangin 1985 December thlengin U.K. leh USA-ah Communications lam a zir ta a ni.

            1981-1983 chhûngin MTKP President atân General Committee-in a ruat angin a thawk. 1988 atangin Associate General Secretary i/c General Administration atân Assembly-in a thlang a, 1991 March thleng a thawk. Rev. Hrangêna a thih tâk avângin 1990 August atanga 1991 March thla thleng General Secretary hna nên a kawp. Mizoram Gospel Centenary Committee 1993-95 atân Chairman a ni bawk. 1991 April atanga 1998 April 22 thlengin General Secretary hna a thawk a. 2001 atanga 2004 April thlengin Aizâwl-ah Executive Secretary hna a thawk bawk. Kum 2004 May atangin Rahsivêng Pastor bial hawn tharah bialtu Pastor-in dah a ni a, March 30, 2010   thlengin chu hna chu a la thawk. Kum 1987 khân Assembly Chairman a ni a, 2005-ah President a ni a, 2007 hian President-elect atân thlan a ni. kum 2008-ah BCM President niin 2009 Assembly-ah a tawp a. 2011-ah President Elect atan thlan a ni leh a, 2012, March 8 khan Rev. Dr.K.Thanzauva hnen atangin President Charge hi a la leh ta a ni.

 

Lekha ziak lam : Lehkhabu tlem a ziak ve a, chungte chu-

1. Kristian thurin tlângpui (1978), vawihnih chhut a ni tawh.

2. Baptist Confession chhuizauna (19998)

3. Bible Chanchin (1990)

4. Kum sâng rorêl leh taksa thawhlehna (1982, booklet)

5. Evangelist tanpuitu (1998)

6. Seventh Day Zirtirna hnialna.

7. Galatia Hrilhfiahna

Hêng bâkah hian Nilai zân thuzir, Sunday school zirlai leh Beirual thuzir bûte pawh midangte nêna intawmin a ziak tawh a, articles chi hrang tam tak a ziak.

Rawngbâwlna zinna : Rawngbâwlna avângin hêngah te hian a zin chhuak:- 1977 January khân Deolali (MH)-ah All India Congress on Evangelism-ah BCM aiawhin a tel. 1985-ah Los Angeles (USA)-ah 16th. BWA Congress-ah a tel. 1990 April-May-ah BCM zaipâwl hruaiin UK-ah a kal. 1992-ah BMS Bi-Centenary lawmna Westminster Abbey UK-ah a tel. 1993-ah BMS Mission Partnership Consultation Meeting Charney Manor, Oxfordshire UK-ah telin Paper pawh a present ve. 1993 khân Kathmandu (Nepal)-ah UMN Board meeting-ah a tel a, 1994-ah ABF leh BWA hotute nên Mission chungchânga hemi hmuna inbiaknaah a tel. 1992-ah ABF Congress, Singapore a neihnaah a kal a, BCM Zaipâwlte a kalpui. 1996 hian BWA General Council meeting Hongkong-ah a tel a. 1997 hian ABF Congress meeing Taipei-ah telin BCM zaipâwlte a hruai bawk. Thailand-a BCM Missionary te awmna hmun pawh a tlawh. 2005 khân BWA Centenial Congress Birmingham (UK)-ah zaipâwl hruaiin a kal leh. BCM Mission Field India ram chhûnga mi chu a tlawh chhuak tawh bawk.

 

Mizoram Baptist Kohhran President thar, Rev. Dr. Rlaltawnnga chuan March 8, 2012 khan Rev. Dr.K.Thanzauva hnen atangin Charge a la a, Assembly Rorel a kaihruai nghal a ni. President thar,  Rev. Dr. Raltawnga hian kum 2013 BCM Assembly thlengin he mawhphurhna hi a chelh dawn a ni. Hetih lai hian President Elect atan Rev. F. Sangvela chu thlan thar a ni bawk a. Ani hi tuna executive Secretary Aizawl Area chelh lai a ni bawk.

Minister 6 Ordain an ni ta

Vawiin-a Mizoram Baptist Kohhran Assembly Ordination Service chu tluang takin zawh fel a ni a, tun tumah hian Probationary Pastor 5 leh Dr. RL Hnuni te chu Minister atan nemngheh an ni ta. Ordination Service hi Rev. Dr. Raltawnga, BCM President-in a kaihruai a, Ordain tur mi 6 te hnen atangin an testimony ngaihthlak vek an ni a, Rev. Lalthangliana, Co-ordinator BCM Pastoral Department-in Ordain turte hmelhriattirna leh BCM-in Pastor a neih dan leh a mamawh dan report tawi a pek hnu-ah Presiding Minister Rev. Dr. Raltawng’n a mal te te-in zawhna a zawh hnu-ah nemngheh an ni ta a ni.

 

     

H.Ramthianghlima

Joe Laldinpuia

Lalhnehliana

 

 

 

ZD Lalrozuala

Dr RL Hnuni

Lalremruata

 

 

Tun tuma Minister ordain te zinga pakhat Dr. RL Hnuni hi Mizorama Kohhran hote zingah hmeichhe Ordain hmasa ber a nih avangin ngaihven a hlawh hle a. Mizoram Baptist Kohhran History-ah Hmeichhia, Minster atana ordain hi an la awm ngai lo va. Dr. RL Hnuni hi Ordain a nih chuan a hmasa ber a ni ta  a ni.  Assembly 2011-chuan Pastor ni lo, Minister-a ordain dan a siam thar a, chu Dan hmang chuan Prof Dr. RL Hnuni chu Minister atan ordain turin Pastoral Committee leh Assembly Executive Committee chuan a thlang a. Hei hi BCM History-a thil thar danglam tak pakhat a ni. He Ordination hi Pastor atana Ordain a ni lova, Woman Ordination pawh a ni chuang lo. Minister atana Ordain (Ordination for Minister) a ni. Dr. RL Hnuni Ordain tur hian BCM Pastoral Committee te, Executive Committee leh Central Committee te paltlang vekin Assembly ah Report a nih hnu-ah vawiin, March 11, 2012 hian Pro Pastro zir chhuak mi dang pang ate rualin ordain a ni ve ta a ni.