Category Archives: BCM News

Home Post

Evangelist Conference tiak ta

BCM pawmpui Pathian Thuhriltu Pawl (Evangelist team) te chuan January 26-29, 2012 chhung khan Serkawn Biak inah Conference an nei a; nizan khan a tiak ta.  He Conference-ah hian Evangelist Team 43 atangin Team member leh Speaker 206 an rawn tel a, Ningani zan atanga Pathianni zan thleng Progamme tha takin an hmang a ni. Sawi tawh ang khan BCM hian Recognised Evangelist team 43 an nei a; tun tumah hian team khat atangin khat atangin speaker tiamin mi 5 zel kal tura beisei an ni a. Damlohna avang leh kawnglaka harsatna tawk rawn thleng zo ta lo te tih loh chu kal tura beisei te an lo kal kim thawkhat hle. He Confenrence hi an hlutin hlawkthlak an ti hle tih report kan dawng bawk.

 

MBKHP Inkhawmpuina tur Pandal hlan:

MBKHP Inkhawmpuina tur Zobawk muala Pandal sak chu nimin January 29 (Pathianni) chawhnu khan Pathian hnena hlanna neih a ni. (Karhmasa  Pathianni a hlan tur anga kan rawn tarlan kha hriatsual palh a ni e). He Pandal hi a dung ft.174, a vang 110ft; a chhungah mi 4,000 thutna siam a ni a; a sir tin hi a tul dana hawn belh theiha ruahman vek a ni. Pandal hlan zawh hian BKHP Inkhawmpui pualin chawnghei tawngtai neih chhunzawm a ni bawk.

 

MBKHP Inkhawmpui hi tunkar – Februay 2 – 5, 2012 hian Zobawk Field-ah neih a ni dawn a, Thupui atan “Sim rawh u, vanram chu a hnai tawh e”   tih hman a ni ang. Inkhawmpuina hmun tur Zobawkah hian Kohhran pawl dang bakah Baptist Kohhran panga an awm a; inkhawmpui hi Kohhran lian ber Ebenezer Biak in behchhanin Mualah Pandal sak a ni.  Pandal hi nikum November thla tawp lam atang khan an sa tan a. Baptist Kohhran chauh pawh ni lo, Kohhran pawl dang leh NGO te pawh Pandal sa hian an hnatlang vek a ni. (Remchang hmasa-ah Inkhawmpui chanchin kan rawn tarlang dawn nia)

 

MTKP hruaitute Zawlnuam Bialah
January 27-19 khan Zawlnuam Pastor bial TKP Inkhawmpui, Bawrai Biak inah neih a ni a, he inkhawmpui-ah MTKP Organiser, Rev. Samuel Lalremsanga chu speaker a ni a. MTKP hruaitu thenkhat leh Hnahthial North bial Zaipawlten an tawiawm.

 

Tlabungah Staff Notation Training Camp
Tlabung Pastor bial leh BCM Worship & Music Department tangkawp chuan January 23-28, 2012 chhung khan Tlabungah Staff Notation Training Camp an buatsaih a. January 23 (Thawhtan) zanah a hawnna inkhawm an nei a, nimin khan an tiak ta.

Sunday School Seminar hmun 2-ah nei

Christian Education Department chuan tun Weekend (January 28-29) khan Hrangchalkawn bialah leh Hnahthial North bialah te Sunday School Seminar an neihpui a. Hrangchalkawn bialah hian, Rev.B. Lalramhluna, Christian Education Director leh Rev. R. Lalchamliana,  Communications Director te an kal a; Hnahthial North bialah hian Sunday School Intructress, Pi PS. Lalhmingthangi a kal bawk.

CASA National Board member-ah BCM

Khawvel pum huapa Kristian tanpui ngaite tanpuitu pawl lian tak, Church Auxiliary for Social Action (CASA) chuan India ram huap (National Board) member pakhat atan BCM chu min rawn thlang a. India hmar chhak atanga Kohhran 3 zingah BCM chu kan tel a; Assembly Executive Committee thu angin BCM General Secretary apiang he board member-an ni zel dawn a ni.

Evangelist Conference tan dawn ta

Mizoram Baptist Kohhran Evangelistic Teams’ Conference 2012 chu naktuk 26-29, 2012 hian Serkawn Biak inah neih a ni dawn ta. He Conference Thupui atan hian “Thiltihtheihnaa Thuam” tih a ni ang. Natuk (Ningani) zan atangin Vantlang Inkhawm tan a ni ang a. Upa Pc Liankhama, BCM Kikawn-in Inkhawm kaihruaiin Rev. H. Lianngaia, General Secretary-in lawmna thu(Greetings) a sawi ang a, Rev. Lalthangliana Hnamte, Co-ordinator, Pastoral Dept. in thuchah a sawi ang. A tan zanah hian Thupui then khatna ” Kan mamawh Thiltihtheihnaa thuam” tih hmangin thuchah ngaihthlak a ni ang. Theiriat Kohhran Zaipawl leh Edemthar Kohhran Zaipawlte an zai ang a, Nl. F. Lalremsiamai a zai bawk ang.

 

Zirtawp leh Inrinni nilengin Seminar neih thin a ni ang a, zan lamah Vantlang inkhawm a awm zel ang. Pathianni-ah Vantlang Inkhawm awmin Chawhnu lamah pawh Inpawlhona leh Zan lamah Vantlang Inkhawm a awm leh dawn a ni. Tunah hian BCM hian Recognised team 43 a nei a; team khat atangin mi 5 vel theuh tel tura beisei a ni.

 

 

He mi hun lai hian Tualchhung Kohhran tu mahin Evangelist te nen programme siam lo turin ngen an ni. Programme chipchiar leh Team List thar ber chu a hnuaia link-sh hian en theih a ni e. He Conference Progamme hi JB Cable Network leh LDF Cable Network ten Live-in an pe chhuak  bawk ang.

 

Evangelistic Team Conference Programme

 

BCM Recognised Team List-2012

MBKHP Inkhawmpui 2012

Mizoram Baptist Kohhran Hmeichhe Pawl(MBKHP) Inkhawmpui vawi 48-na, February ni 2 atang ni 5 chhung a Zobbawk-a neih turah a thlengtu Zobawk bial te an inpeih thawkhat ta. Naktuk Pathianni hian Pandal hlanna Inkhawm neih a ni ang.

Kumin MBKHP Inkhawmpui-ah hian Thupui atan “Sim rawh u, Vanram chu a hnai tawh e” (Mat 4:17)  hman a ni ang a Speaker atan Rev. Lalhungliana, Pangzawl Bialtu Pastor hman a ni ang. He inkhawmpui-ah hi February 2 zan atangin tan a ni anga, a tuk, Zirtawpni-ah nilengin Rorelna neih a ni ang a, Rorel palai ni lo te tan inkhawm programme siam a ni bawk ang. Zan tin Vantlang inkhawm a awm ang a, Inrinni chhun-ah HIV/AIDS Seminar neih-in Pathianni zan thleng inkhawmpui hian a awh dawn a ni.

Executive Committee zo ta

Ni hnih awh, Mizoram Baptist Kohhran Executive Committee Meeting, January 18-19 chhunga neih chu tluang takin an zo ta. He Meeting-ah hian Rorel member 156 an kal a. An thurel passed tlangpui te (Hei hi Minute anga lak chhuah a ni lo va, Resolution tlangpui lak chhuaha  ni)

1. HATIM tana Bus lei thu report chu pawmpui a ni.

 

2.      BHSS Staff-te Mizoram Deficit Mission School Association-an zawm chungchang thu Central Committee-a tanga lut chu – Kohhran-a thawktute kal zelna atan a remchang lo ve tiin MDMSA zawmna tih tawp ni se tih a ni.

 

3.      Mizo tawng Bible zirna (Bible School) AICS hnuaia din ni se tih chu Assembly-a thlen chhoh tura tih a ni.

 

4.      Dr. R.L. Hnuni Minister atana ordain tura Pastoral Committee leh Central Committee kaltlanga rawn lut chu Secret ballot hmanga thlan a ni a, vote tla zawng zawng hmun 3-a thena hmun 2 aia tam vote a hmuh avangin Ordain remtih a ni. Assembly 2012-ah ordain tura report  tur a ni.

 

5.      Pastoral Department Committee-in Minister-a ordain tura Central Committee kaltlanga a rawn thlen te chu Secret Ballot hmangin ordain remti leh remti lo a mal mal-in thlan an ni a. Vote tla zawng zawng hmun 3-a thena hmun 2 aia tam an hmuh vek avangin an vai hian ordain remtih a ni.  Assembly-ah Ordain tura report a ni ang.

1)      Pro Pastor H. Ramthianghlima

2)      Pro Paster Joe Laldinpuia

3)      Pro Pastor Lalhnehliana

4)      Pro Pastor R. Lalremruata

5)      Pro Pastor Z.D. Lalrozuala

 

 

6.      Pro Pastor thar 5  Pastoral Department a lak te, Central Committee kaltlanga pawmpui tura a rawn thlen chu an vaiin pawmpui an ni a, Assembly-ah Report a ni ang. Pro.Pastor laktharte hi February 1, 2012 ah an hna thar an zawm ang, chungte chu:-

1)      Andrew Lalhmachhuana

2)            Lalfamkima

3)            V.L. Nithanga

4)            F. Lalnunrema

5)            Hmingthanzama Chawngthu

 

 

7.      Pastor Pension tur (Report):-

1) Rev. Peter Sangliana (01.11.2012 – pension tur)

2) Rev. H. Sangchema (01.12.2012 – pension tur)

3) Rev. F. Sangvela (01.03.2013– pension tur)

 

8.      Kohhran Motor hman lai – Gypsy (Hqrs.Office), Bolero (ES Office, Aizawl) Bus (Lawngtlai) te chu tih rala a thar lei remtih a ni a, Assembly-ah thlen leh tur a ni.

 

9.      Yeshu Bhakt Pavitra Sabha nena MoU sign tura Mission Committee atanga thu lut chu remtih a ni a, Assembly-ah thlen a ni ang.

 

10.      Mission Field thar, Arunachal Far East hawn nise ti-a Mission Committee atanga thau lut chu ruahmanna ten en Assembly-ah thlen chhoh leh remtih a ni.

 

11.      BCM Mission rawngbawl kum 75-na lawmna leh Missionary Conference 2014-a neih thu Mission Committee atanga ngaihtuah tura an rawn thlen chu Assembly-a ngaihtuah atan thlen remtih a ni.

 

10.  Assam Bengal Field-a Rajbongsi hnam zingah thawh ve ni se tia Mission Committee atanga thu lo lut chu Assembly-a ngaihtuah tura thlen remtih a ni.

 

12.  Serkawn Sikulpui nei let leh tura Sawrkara dil chungchang Education Committee-in Service Department kaltlanga rawtna leh ruahmanna a siam chu ngun zawk-in lo enzui zel se tih a ni.

 

13.  Pu David Lalremruata (BHSS) Deputation-a Ph.D zir phalsak turaEducation Department-in Service Department kaltlanga a rawn thlen chu phalsak a ni a, Assembly-ah Report ni se tih a ni.

 

14.  Finance Committee-in Kohhrana Thawktute hlawh D.A. 10 % -a tihpun thu leh Contract Basis te Special Allowance Rs. 500 (Fixed)-a tih pun ni se ti-a a thlen chu remtih a ni a, Assembly-ah thlen a ni ang.

 

15.  Pensioner-te hlawh siam that tura ruahmanna, Finance Committee-in a thlen chu a tul angina lo enzui-in lo siam tha se la, Assembly-ah thlen ni se tih a ni.

 

16.  Hospital tan C.T. Scan lei ni se tih thu Assembly  2010 lo passed tawh chu Medical & Health Department leh Finance lamin an bawhzui dan te report pe-in an rawn thlen a, a tul angina lo bawhzui zel se tih a ni.

 

17.  Post thar hawn dilna leh Hna hum dilna : Department hrang hrang atanga Post thar hawn leh Post chhuahsante hmun ruak hum dilna lo lut chu an dil ang hian remtih a ni a, a Assembly-ah thlen tura tih a ni.

 

18.  Missionvengthlang Pastor Bial atanga Constitution hrilhfiah tura an duh an rawn thlen (Constitution Bung 4:9(ii, Rules Bung 24:122 (10) leh Kohhrana Temporary Member-te thununtu chungchang)te chu hrilhfiah a ni.

 

19.  2012-2013 budget pherh a ni a, Finance Committee ruahman angina hetiang hi a ni:-

 

Central            – 106,306,000.000 – Nikum aia punnna 20,198,400.00 (19%)

 

Mission           –     11,797,900.00 – Nikum aia punnna 15,709,000.00 (15.36%)

 

Service            –   112988200.000  – Nikum aia punnna 19,040,150 (18.32%)

 

TOTAL           –  367,471,600.00 – Nikum aia punnna  54,947,550.00 (14.95%)

 

Executive Committee meeting Thuthar

Assembly Executive Committee – Ni hnihna chu neih mek a ni a. Chanchin kan ziak lai hian Committee-in a passed thenkhat zinga langsar zual te chu :-

1.Pro Pastor Ordain tura Pastoral Committee-in mi panga a chhawp chhuah te chu Ordain remtih a ni, a Assembly-ah Report an ni ang a, Ordination hi March 11, 2012 (Pathianni) ah neih a ni ang. chungte chu:-

1) H.Ramthianghlima,

2) Joe Laldinpuia,

3) R.Lalrempuia,

4) Lalhnehliana,

5) ZD Lalrozuala,

 

2. Pastoral Committee-in Pro-Pastor Lakthar mi 5 te te chu pawmpui an ni. Assembly-ah report a ni ang, chungte chu:-

1) Andrew Lalhmachhuana,  M.Th – Rahsiveng, Lunglei

2) Lalfamkima, M.Th – Serchhip

3) F. Lalnunrema, BD (1st Class) – Hauruang

4) VL Nithanga, B.Th, BD – Khumtung

5) Hmingthanzama Chawngthu , BD – Buarpui

 

 

 

Dr. RL Hnuni Ordain remti ta

 

 

Vawiin atanga tan, BCM Assembly Executive Committee Meeting chuan an thu ngaihtuah langsar zinga pakhat – Hmeichhe Theologian, Dr. RL Hnuni, Principal, AICS ordain chungchang chu ngaihtuah lehin kumin Assembly-a ordain turin a passed ta. Dr. RL Hnuni  ordain chungchang thu hi Pastor Bial, ABC leh Pastoral Committee-ah te ngaihtuah a lo ni tawh thin a. Tun tum hi Executive Committee a thlen vawi hnihna a ni.

 

Dr RL Hnuni Thu­thlung Hlui lam thiam bik a ni a;  Aizawl Theological College- leh Eastern Theological Colleg -ah te lecturer hna a lo thawk tawh a ni.  Rev. Dr.K Thanzauva nen 1980-ah an innei a ni, Fapa pahnih leh fanu 2 an nei.  BCM-in AICS a din tirh, kum 2001-ah Principal-ah dah a ni a, vawiin thlengin he hna hi a la chhunzawm a ni.

 

BCM Assembly 2012 hi March 7 – 11 ah Mizoram Baptist Kohhran, Electric veng, Lunglei-ah neih a ni dawn a. March ni 11, Pathianni Inkhawm-ah Ordination hi neih a ni ang.  Pastor Ordain tur midang te, Pastoral Committee-in a thlan te hi tuna Executive Committee-ah hian pawmpui an nih hnu-ah nemngheh tura chhawpchhuah an ni ve dawn a ni.