Category Archives: BCM News

Home Post

Bible Sunday leh School Exam : Dec 4

December 4, 2011 (Pathin Ni) khi khawvel huapa kristiante ni pawimawh “Bible Sunday” a ni. Bible Sunday a nih bakah Sunday School kum tawp Exam Ni a ni bawk avangin Pathianni zing, Sermon inkhawm banah Sunday School Exam-in a chhunzawm nghal ang. Christian Education Director chuan Kohhrante Sunday School exam ngai pawimawha, exam theuh turin a ngen.
……….
Bible Sunday hi a hming chawi chhan ang tak hian Bible Sunday hi Bible lehlin, chhut leh theh darh pawimawhna inzirtina ni atan Kohhran pawl hrang hrangin hun thuhmun kan hman thin a ni.

BCM chuan Kumin Bible Sunday thupui atan “Mittui tla chunga tuhte chuan hlim takin an at ang” (Sam 126:5 & 6) tih kan hmang dawn a. Pathianni zing inkhawm-ah BCM Biak in tinah thusawituten he thupui hi sawi tura beisei an ni. Inkhawm thawhlawm hi Bible Society pual atan hman a ni ang.

Mizoram Baptist Kohhran hian atir te atangin Bible chhutu pawl pawimawhna hi hriain a ngai pawimawh em em thin a. Kan Missionary hmasa Pu Buanga leh Kohhran hruaitu hmasa thenkhatte chuan Bible lehlin hi hnapui pakhatah an neih thin a. Bible khawla chhut pawimawhna hi an hre chiang hle a ni.

India ramin Independent a neih hma chuan British & Foreign Bible Society hian engkim a ngaihtuah a. India ram a lo Independent hnuah India ram Bible Society din a lo tul ta a. North East India Christian Council, tunhma lama Assam Christian Council kan tih huapa Bible Society Auxiliary din a lo tul ta a. Chu mi dinna a tel tur chuan Rev.Dr.C.L.Hminga chu Shillong-ah a zuk kal a. India ram tawng hrang hranga Bible chhut chu India mite mawhphurhna a lo ni ta deuh deuh a, tan lak a tul avangin hetiang hian Auxiliary an din ta a ni.

Rev.Dr.C.L.Hminga lo haw hnu hian Lungleiah Bible Society Branch din a lo ni ta a. Bible Society pawimawhna hi kan Kohhran chanchinah uar taka chhuah a ni thin. Bible chhutu pawl hi an lo chak theihna tur leh Kohhran miten a pawimawhna an lo hriat deuh deuh theih nan kum khata chawlhni vawikhat, December chawlhni hmasa ber chu ruat a lo ni ta a. December Pathian ni hmasa ber hi Khawvel pumah Kohhran pawl hrang hrang ten Bible Sunday-ah hman a ni a. Tun hma zawng chuan Bible Society Sunday tiin Calendar-ah kan chuantir a; kum 2007 Assembly chuan Society tih chu paihin Bible Sunday tiin a thlak fel ta a ni. Kan Kohhran Calendar-a arsi chuang a ni a, hemi ni thawhlawm hi chu mahni awmna Branch Bible Society theuhah thehluh tur a ni.

Kum 2011 hi Bible Society tan kum pawimawh tak a ni a. Kumina Bible Sunday kan hman tur pawh hi Kohhranho ten urhsun leh thahnemngai taka hmang theuh turin kan in ngen hmasa a ni. Sap tawng Bible chhuak hmasa King James Version chuan a kum 400-na hmel a lo hmu ta reng mai a. United Bible Societies chuan chu mi denchhen chuan kumin hi Year of the Translators atan an puang hial a ni.

Bible Society of India pawhin a kum 200-na (Bi-centenary) a hman mek kharna hun pawimawh leh urhsun tak chu ni 21st Feb. khan a hmang tawh nghe nghe a. Bible lehlin, chhut chhuah leh sem darh hna hi Kohhran kuta awm a nih ang tak hian, mi tin kan tangkai theihna lai apianga tangkai taka inhmang leh inphal thar zel turin Pathian hmingin kan inngen a ni.

Non-Mizo Evangelist mamawh

Mizoram Baptist Kohhran hnuaia Non-Mizo Mission Evengelist Contract-a thawk tur mi pathum mamawh a ni a. Hindi-a Pathian thu sawi thei, Pathian kohna hria, Mizoram chhung khawi hmunah pawh rawngbawl tura awm inhuam tan dil theih a ni. A hnuaia hming ziak hnenah hian dil theih a ni.

Dil theih hun chhung : January 10, 2012
Personal Interview : January 12, 2012 (11:00AM)
Interview-na hmun : BCM Hqrs. Office, Serkawn, Lunglei
Hlawh : BCM Pay Rules angin

Sd/-
Rev.Dr.K. LALRINTHANGA
AGS i/c Mission
Baptist Church of Mizoram

Arunachal ramah lo kal la, Minpui rawh

Arunchal Theological College-a zirtir hna thawk turin missionary BD/M.Div. chin BCM Mission hnuaia Contract-a thawk tur duh a ni a. December 31, 2011 thleng dilna thehluh theih a ni. Diltu chuan a awmna Kohhran lehkha leh thiamna cerfificate/mark sheet thil tel tur a ni. Hlawh chu BCM Pay Rules ang a ni ang. January 12, 2012 (11:00AM) ah Mission Board hmaah interview tur a ni.

Sd/-
Rev.Dr.K. LALRINTHANGA
AGS i/c Mission
Baptist Church of Mizoram

BHSS ADMISSION NOTICE

Kum 2012 Session atan Baptist Higher Secondary School, Serkawn-a Class IX & X zir tumte tan admission form siam sa hmangin admission dil theih a ni a, hengte hi hriattur a ni:
Entrance exam (Class IX only)    : December 16, 2011 (Friday) (10:00AM – 12:00Noon)
Subjects        : English & Mathematics (35Marks each)
Personal Interview    : December 16, 2011 (Friday) 12:30PM Progress Report card ken tur)
Result            :  December 19, 2011 (Monday)
Admission        : A tlingte chuan January 9&10, 2012-ah Progress report card leh Tranfer Certificate nen Office-ah Admission lak tur a ni.
Interview for Class X    :  Class X tan seat tlem a awm ang a. Dec.16, 2011 (10:30AM) ah Class IX Progress report card nen interview tur a ni.
Hostel Interview    : Hostela awm duhte tan December 16, 2011 (12:30pm) ah interview neih a ni ang.

 

 

Sd/-
C. LALHMINGMUANA
Principal, BHSS Serkawn

Mission Field thar leh Director thar

BCM Mission Committee-in a lo ruahman lawk tawh angin kum thar 2012 atang hian Mission Field thar, Arunachal far East field chu ataka function turin a buatsaih fel ta a. Pastoral Committee, November 23-24-a neih chuan  Field Director atan tuna Madurai-a M.Th. zir lai, Rev. Lalmuanzuala Sailo chu a ruat fel ta bawk.

Arunachal Far East Field ah hian District panga – Dibbang Valley, Lower Dibang,  Lohit, Anjan leh Challang te a huam ang.

 

Tin, Ramchhunga Chakma hnam zinga kan rawng-bawlna khaikhawmtu bik atan Director hran nei tura ruahman pawh tihpuitlin thuai tum a ni a,  Chakma Mission Director atan hian tuna Tlabung bialtu pastor ni mek, Rev.RC. Lalthanzama chu ruat nghal a ni bawk.

Service Department Committee

BCM Assembly Committee lian pathum zinga pakhat, Service Department Committee Meeting ni hnih awh chu, Nimin, November 29 atang khan an thukhawm tan ta.

Tun tum  Committee-ah hian Agenda lian tham leh thu thar langsar lutuk a awm lo va, Service hnuaia Department hrang hrang ten Kum 2012-13 Annual Plan leh Budget ruahman te thlirin kum kal lai mek  Achievement leh Report te an thlirho a ni.  Hei baka thu ngaihtuah langsar zingah Serkawn Sikulpui nei let leh tura Sorkara dil thu te, Tualchhung Kohhran-a Relief & Development Committee din dan tur ruahmanna te leh Further Study zir dilte chungchang ngaihtuah te a ni.

Service Committee-ah hian ABC aiawh palai te bakah Assembly aiawh leh Department aiawh te an awm a, an vaiin member 50 vel an ni.

Service Department hnuaiah hian Department hrang hrang 7 a awm a, chungte chu:-

1. Baptist Literature & Printing Department

2. Social Concern Department

3. Christian Education Department

4. Relief & Development Department

5. Education Department

6. Communications Department

7. Medical & Health Department

te an awm.

Worship Seminar – Aizawl-ah

BCM Worship & Music Department chuan naktuk Inrinni, Nov.26, 2011 khian Aizawl Area huapin Chaltlang Biak In, Aizawl-ah “Pathian Chibai buk dan tha” tih thupui hmangin Worship Seminar neih a ni dawn.

Resource Person-ah  Rev.R. Lalbiakliana, BCM Worship & Music Director leh Pu Moses Lalrohlua Sailo, Lecturer, AICS te an ni ang.  CR Laldingliani pawh he hunah hian zai trua beisei a ni.

Seminar-hi Rev. F. Sangvela, Executive Secretary-in a hawng anga, Upa Darchhawna’n an kaihruai ang. He Seminarah hian Aizawl khawpui chhunga Kohhran Upa leh rawngbawltute, Music Committee members te leh Zaipawl Director te tel tura beisei an ni.

Worship & Music Seminar hi Lunglei Area leh Lawngtlai Area huapin hlawhtling takin neih a lo ni tawh a ni.

……………..

 

SEMINAR ON WORSHIP

A hun:             26 Nov. 2011 (Inrinni)

A hmun:          BCM Chaltlang Biak In, Aizawl


FIRST SESSION: 10.30 – 01:00 PM.

  1. Hruaitu      :           Upa Darchhawna, Central Church.
  2. Hawngtu   :           Rev. F.Sangvela, Executive  Secretary.
  3. Solo           :           CR. Laldingliani
  4. Thupui zirho:         Rev. R. Lalbiakliana.
  5. Thupui       :           Pathian Chibai buk dan tha.
  6. Thupui zirho:         Pu Moses Lalrohlua Sailo, AICS.
  7. Thupui       :           Pathian chibai buk na a Music pawimawhna.

THINGPUI IN CHAWLH: 01:00 – 01:30 PM.

 

SECOND SESSION: 1:00 – 03:00 PM.

  1. Hruaitu:     Pastor V. Vanlalchhunga
  2. Solo:          CR. Laldingliani
  3. Sawiho hruaitu:     Upa Lalhmukima Kawlni & Pastor B. Lalrinawma

Dr. RL Hnuni Ordain thu

BCM Pastoral Committee Meeting chuan Minister atana Ordain dil sakna pathum a ngaihtuah te zingah Dr. RL Hnuni, Principal, AICS chu Assembly Executive Committee, January-a thlen chhoh turin a thlang leh ta.

BCM Constitution-ah hian Minister atana Ordain tur hian voters hmun 3-a thena hmun hnih (2/3) vote hmuh a ngai a. Chutiang chuan Pastoral Committee leh Assembly Executive Committee ah a tlang chuan Ordain turin Assembly-ah pawmpui theih chauh a nih avangin Pastoral Committee hian Ordain turin passed tawh mahse Assembly Executive Committee a pal tlang leh phawt a ngai dawn a ni.

Pastor Posting ti chhuak

BCM Pastoral Committee Meeting, November 23-24 chhunga neih chuan thu pawimawh tak tak a rel zingah nimin khan Pastor Posting and Tranfer a ti fel leh ta a.  Heta tarlan loh te chu an awmna hmun ngaia awm tur an ni.

1. Kawrthah Bial         –           P.P R Lalremruata

2. Mamit Bial              –           Rev James Zorammawia

3. Farkawn Bial           –           P.P ZD Lalrozuala

4.Haulawng Bial         –           Rev H Lalfakzuala

5.Vathuampui Bial      –           P.P Joe Laldinpuia

6.Zobawk Bial          –           Rev F Lalsangliana

7.Zotlang(Lli) Bial      –           Rev J Chalhlira

8.Zawlpui Bial           –           Rev Lalchhuankima

9.*Mualthuam N Bial   –           P.P V Lalthlamuana

10.Khawzawl Bial      –          P.P H Ramthianghlima

11.Tuiphai Bial           –            Rev V Laltlanzuala

12.Non Mizo i/c          –           Rev. R. Lalrintluanga, Miss.Co-ordinator-in a kawp ang.

13.Chakma Mission    –           Rev RC Lalthanzama

14.Arunachal Far East  –           Rev Lalmuanzuala Sailo

18.Phawngpui N         –           P.P  Lalhnehliana

19.Tlabung                  –           Rev C Lalbiakzuala

*Mualthuam North Bial hi serh leh sangah Haulawng Bialtu Pastor-in a hmui ang. Pro.Pastor dang zawng te hi Assembly- 2012-ah oradain turte an ni.

 

 

Thurel langsar dang te:

Heng Bial-ah te hian Pro.Pastor dah turin ruahman a ni:-

  1. Chawngte Bial
  2. Bungtlang ‘S’ Bial
  3. Aizawl East Bial
  4. S.Vanlaiphai Bial
  5. Kolasib Bial (Kawnpui-ah)
  6. Vathuampui Bial(Headmaster, Nazareth H/S)
  7. Zobawk Bial
  8. Hnahthial ‘S’ Bial
  9. Serchhip Bial (N.Vanlaiphai-ah)
  10. Champhai Bial
  11. Saiha Bial
  12. Tlabung Bial
  13. Lungrang Bial(Chawngte-L ah)
  14. Tawipui Bial (North-II-ah)
  15. Zawlnuam Bial(Kanhmun-ah)
  16. Saitual Bial(Seling-ah)
  17. Pathar Bial (Chawntlangpui-ah)

 

Relief To Chaurch:  Relief to Church dil Kohhran 19 te hnenah Rs 732,415.00 pek tura ruahman a ni.

 

ABC Thar: ABC thar “ZOPUI ABC”  siam tura ruahman a ni a, Zobawk Bial, Hrangchalkawn Bial leh Tawipui Bial te chu ABC thar-ah hian an awm dawn a ni.