Charity Prorgramme-in R&D feh chhuak

R&D Charity Programme

Mizoram Baptist Kohhran, Relief & Development Department te chuan May 30,2019 (Ningani) khan Sertlangpui khuaah BCM Charity Program-in an feh chhuak a, tanpuingaite hnenah chhawmdawlna an pe. Hemi rual hian, ‘Vitamin Angel’ pawl te nena thawhhonain Serte leh Thuampui khuaah te Hriselna chungchang leh Damdawi pawimawhna te zirtirna an nei nghal bawk He hunah hian naupang leh raipuar tan Vitamin-A, Multivitamin leh Rulhlut damdawi te a thlawnin an sem nghal a ni.

BCM R&D hnuaia Inititive of Peace and Economic Development Project, Kolasib District ah kalpui mek a ni a, tunlai hian he project sum hman dan enfiahna ( Account Audit) an nei mek bawk.

Assembly 2018-in a rel angin BCM hian kum 2018 atangin Charity Program a kalpui tan a,   hemi atâna charity fund (Sum) pawh mimal, Pawl leh Chhungkaw hrang hrang te, Pastor Bial leh Tualchhung Kohhran te hnen atangin a dawng ve thin a, Kohhran hoten kan la hriat chian tawk loh avang erawh chuan beisei angin sum hmuh a tam thei rih lo a. Heng Charity Fund atanga sum hmuh te hi Khuarel chhiatna leh vanduaina bik atan a rual thei ang ber leh daihzai tur anga sem chhuah thin a ni a, tangkai taka hman chhoh mek a ni.

………………….

Related Post: BCM Charity Programme: 

Din duhna chhan:

BCM Relief&Development Department hian khuarêl chhiatna leh mihring siam chawp chhiatna (Chênna In kâng angte) tuar hnênah chhawmdâwlna a pe thîn a. A tangkai êm êm lai hian a huam chin hi a zîm deuh hlek nia hriatna a awm a. Kohhran chhûngkuaa natna khirhkhân tuar, eizawnna mumal nei lo te,  Ramtuileilo a khawsa, enkawltu nei mumal lo tanpui ngai kohhran leh khawtlângin theihtâwpa an lo buaipui hi khaw hrang hrangah an awm fo thîn a, Bialtu Pastor leh Tualchhûng kohhran hruaitute atanga tanpui dîlsakna pawh Department hian a dawng fo mai. Amaherawh chu, kan tanpui theihna dânin min phal chin pâwn lam a nih avângin a buaithlâk hle thîn. Tin, Khuarêl chhiatna tam tham deuh a lo thlen hian kan Relief Budget neihsa hi a beitham thin hle mai a, pawnlam atanga tanpuina a remchan tum a nih loh phei chuan a mangan thlak thin viau mai. BCM Charity Fund hi kan siam thei a nih chuan, hemi a  tanpuina sum lo lut te hi Mi harsa zual tanpui ngai kan sawi tak te tanpuina leh chhawmdawlna atan te, khuarel chhiatna alo thlen a, tanpuina kan budget neihsa in a daihloh chang a phuhru tu atan kan hmang thei anga, kan harsatna tamtak a sut kian theih ngei kan  beisei a ni.

A tih tûrte:

  1. Sum tuak:
  • Mi inpe, tanpui ngaite tâna inphal zawng chhuakin hêng atang hian tanpuina lâkkhâwm hna a   thawk thîn ang.
  • A tul leh remchân dâna zirin tanpui ngaite pual Special Program a buatsaih thei ang.
  • Tualchhûng kohhranah a tûl dâna zirin BCM Finance Rules pawm chin angin tanpuina a dîl thîn ang.
  • Tualchhûng kohhranah awareness campaign a nei thîn ang.
  1. Tanpui duhtuten awlsam zâwka an dah theih nân BCM Charity Fund Account a hawng ang. Relief & Development Dept. chu Account vawngtu a ni ang.
  2. BCM Charity Fund hian a tûl dân leh tanpuina tur fund a neih dâna zirin chhawmdâwlna a pe thîn ang.
  3. Department lamin Committee remtihnain, Tualchhûng kohhran, Bialtu Pastor te kaltlangin tanpui ngaite zawn chhuah leh tanpuina pêk hna a thawk thîn ang.
  4. BCM Department dang Audio Visual lam te, a remchân dân angin a thawhpui ang.
  5. Media lamah a theih anga zauvin a puangzâr ang.
  6. Tanpuina hi a tul hmanhmawh dâna zir leh fund awm dân thlîrin pêk thin a ni ang a, tanpuina tûr zât pawh Committee-in a ngaihtuah ang.

Tanpuina dawng thei tûrte:

  1. Chhûngkua, eizawnna mumal nei lo, hrisel lohna avânga natna khirhkhân/benvawn Inah emaw Hospital-a enkawl reng ngai te.
  2. Chhûngkua, Pianphung leh rilru lama mi phâk lo enkawl lai nei, eizawnna mumal nei lo te.
  3. Khuarêl chhiatna avânga In leh Lo chân, tanpui ngaite.
  4. Rehabilitation centre leh Orphanage te (Special Occasions-ah)

Posted in BCM News.

admin