CHHANDAMTU A PIANG TA

(Luka 2:11;Johana 1:14)

– Rev. Lalthangliana Hnamte

Thuhma:

Kum 2017 Krismas hunpui kan lo thleng leh dawn ta! Chhûng tinten hlim taka hman loh hlauvin eng engemaw tiin kan insingsa leh ta sung sung mai. In, Biak in leh kawtthlêrte cheimawiin, Krismas Tree leh Duhsakna thute kan thawn chhuak leh chur chur dâwn a ni. Krismas Card kan in thawn liai liai thin erawh kha chu Media lama hmasâwnnain min nuai bo sak ta der a! Cellphone atangin Thu leh Thlalâk mawi tak tak, Hla leh Music thlengin kan inthawn ta zâwk a. A awlsam viau aleiah kan ngai common lek lek zawk em aw tih theih a ni awm e. Eng hmanrua pawh hmang ila, a pawimawh ber zâwk erawh chu Bethlehema Nausên lo piang, A hming ISUA, Immanuela, kan hnêna Pathian awm, Chhandamtu, hian Amah lâwm leh chawimawiah min pawm ang em ? tih hi a thupui ber zâwk a ni.

Zâwlnei Isaia chuan Isua pian hma kum 600/700 daih tawhah khan ‘Nula thianghlim a rai anga fapa a hring ang a, a hmingah Immanuela an sa ang’ tih a lo sawi tawh a.(Is 7:14). Lal Isua pian dâwnin he thu chiah hi Vântirhkohvin Josepha hnênah a sawi bawk a (Mat 1:22). Hêng thute atang hian Isua Krista lo pian dân hi a rilin a thûk a ni tih kan hre thei awm e. Chhandamtu lo pianga chu Pathian mihringa lo chang, Bethlehema lo piang ngeia kha a ni kan ti thei ta a ni.

Heti hian i han sawi tan teh ang:

Khawvêla hnam tinte hi Tui lêt avang leh Babel in sâng sak avângin khawvêl hmun hrang hrangah an lo darh ta tih thu kan hmu a (Gen. 10:32 leh 11:9). Vawiin thleng hian khawvêlah hnam hrang hrang, tawng hrang hrang, nunphung leh khawsak dân hrang êm êmin kan lo awm ta hi a ni a. Hetia khawvêla hnam tin an lo darh tâkah chuan Pathianin a awiawha a Thuthlung vawng leh puang darh tur hnam pakhat din tûrin Abrahama a ko chhuak a. A thlahte chu Juda hnam tih emaw Israel hnam tih an lo ni a. Mahse Israel-te chuan Pathian thil tum kawng an zawh tâk loh avângin Pathian chuan hnâwlin Israel thar din a tum ta zâwk a. Heta Pathian thil tum ding reng kan hmuh chu Hnam khat tân mai ni lovin Hnam tin tân a ni, a Chhandamna chu tih hi a ni.

1.Thim hnuaia lêng mihringte:

“Mi, thim hnuaia kalte chuan êng nasa tak an hmu ta; thihna hlim rama awmte chungah ngei chuan êng chu a lo êng ta’ (Is 9:2) tiin Isaian a sawi a. Khawvêl mihringte hi Pathian nêna inzawmna chat tawh, Pathian laka mi hrang, khawlohnaa din, Pathian ropuina changzo tawh lo vêk kan ni a. Kan awm dân zawng zawng hi thim hnuaia kal, thihna hlim rama awm ang kan lo ni tawh a. Pathian Pathianna, thianghlim, tha famkim leh fel, sawisêlbo tân chuan chênpui tlâk rêng kan ni lo. Nimahsela, a hmangaihna chuan min kalsan hlen thei si lo. Kan hnêna chêng ve a, chhandamtu ni tûrin a rorêlna mak leh ril tak mai chu lantîr a tum ta! Engtin maw ?

2. Atîrin Thu a awm:

Chanchin Tha Johana ziak 1:1-a ‘A tîr’ a tih hi Genesis 1:1-a ‘A tîr’ aiin a tîr zâwk a. China-ho chuan Johanan a tîr a tih hi ‘A tîr lian ‘(Big beginning) an ti, tiin Japan Theologian Kosuke Koyama chuan Serampore-ah Convocation-a Khuallian a nih tumin a sawi ka la hre reng mai. Sâm 119:89-ah chuan, “Aw Lalpa, kumkhua atân I thu chu vânah nghet takin a awm a” tih kan hmu a. Chu chu a tîra thu chu a ni. Johana chuan “Thu chu Pathian hnênah a awm, Thu chu Pathian a ni” a ti a. Chu chu vâna awm a nih avângin Lei mihringte tân ban phâk rual a ni lo va. Lawh phâk loh theirah îtawm tak ang a ni ringawt mai. A îtawmzia erawh chu ‘Nunna a ni a, mihringte ênna’ a ni. Nunna nei lo, thim zînga thute tân chuan thil îtawm ber a ni ngei ang. Mahse mi tuman an nei phâk si lo!!

3. Thu chu Tisaah a lo chang:

Chanchin Tha Johana ziak 1:14-ah chuan, “Thu chu tisaah a lo chang a, kan zingah a awm ta a” tih kan hmu a. Hei hian Isua Krista thu a sawi a ni a. Pathian chu mihringah lo changin a hmingah Isua an sa a. Isua chu Pathian mihringa lo chang a ni tihna a nih ber chu. A mihrinna avâng chauhvin mihring zîngah, a pian leh khawsakna ram mite angin a lo chêng ve thei a. “Amah chu mihring leh Pathian a ni, Lal leh chhandamtu nih a fâwm” tia Pu Rokungan hlaa a lo chham chhuakte hi a va ril tak êm!. Hei hi Chhandamtu lo piang nihna bul leh a lo pian chhan chu a ni ber mai.

4. Chi tin leh Hnam tin tân:

Khawvêla hnam tin lo darh ta leh tawng tin lo chhuahna bul langsâr ber mai chu mihring sualna avânga Tui lêt lo thleng ta leh Babel in sâng sak kha a niti mai teh ang. Chaponate, mihring hmasâwnna nasa tak avânga thiltithei êm êma inhriatnate, Pathian hriatna leh tihna tel lo changkânna te avângin Pathianin tawng a tihhransak a, lei chung zawng zawngah an lo darh ta a (Gen 11:9). Hêng hnam hrang hrang leh tawng chi hrang hrang hmangte zînga tel ve zêl tûr chuan Pathian meuh chu mihringah a chan a lo tûl ta a ni. Isua chu Juda hnam atangin Judai ram Bethlehemah a lo piang a. Mihring tawnga tawngin an hnam nunphung tinrêngah a tel a. Min chhandam theih nân mihring kan nih avângin mihringah a lo chang a. A mihring nihna chungnung tak chuan kan mihring nihna suala tlu chhe tawh chu a siam thar a. Nawhchizuar leh hlêprute pawh an nun a tihdanglamsak a, damlo chi tinrêng pawh a tidam a. Vawiin thleng hian ngawlveite leh mi beidawng tawhte pawh an nun tihdanglamsakin a siam tha a. Mi tangkai leh hrâtkhawkhêngah a chantîr mêk a nih hi. Pu Buanga leh Sap Upa, kan Zosâp missionary hmasaberte hmanga Chanchin thain kan hnam pumpui min chawikân nasatzia te, Missionary Bruce Olson-a hmanga South America-a Indian hnam pakhat Motilones hnam kawlhsen leh mingo an hmuh tawh phawt chu that duh zêl mai tepawh kum 20 chhûng lekin an hnam pumpui chu tihdanglama awmin chhan chhuah an ni ta te; Don Richardson-a te nupa hmanga Indonesia-a Irian Jaya thliarkâra mi lu lâk hmang leh hringei hnampakhat SAWI an tih te, kum 15 lek chhûnga Kristian rama chantîrin Biak in mi 1,000 inkhâwm theihna hial an sa theite hi Chhandamtu lo piang, Isua Krista mihring nihna hrin chhuah vek a ni. Europe ram hrang hrangte, America ram pumpui leh Canada ram te, Australia leh New Zealand ram zawng zawngte hi khawvêla hnam changkâng hmasa an ni vek a. A chhan bulpui ber pawh he Chhandamtu lo piang (Chanchintha) ngei hi a ni tih loh rual a ni lo. Bethlehema Nausên lo piang Isua kha Mizoramah pawh a lo piang a, nangmah leh keimahah pawh a lo piang a, ram tin leh hnam tinah a piang zêl tûr a ni a. Pian lohna ram leh hnamte a la awm ang em? Nangmahah leh in chhûngkuaah a piang ve em? Mi tin ta tûr Chanchin Tha a ni asin!

5. A tangkai thei ang berin hmang rawh:

Eng chen nge khawvêlah hian hun i hman dâwn i hre lova. Nakkum 2018 Krismas hi i hmang leh kher ang em tih lah i hre bawk hek lo va. Chuvângin he Krismas lo thleng tûr hi a tangkai thei ang bera hmang turin Pathian hnênah inhlân la. Mahni nuam tihzawng leh hlimhlawp ûm luat avânga mualpho leh boral phah hial an awm kum tin thin avângin “Nang erawh chu invêng tha la, Kohhran bêl tlat la, Chhandamtu lo pianga hi lo lâwm ang che. Mi tupawhAmah lâwm apiangte hnênah chuan Pathian fate nih theihna tûr a pe” tih hria ang che.

KRISMAS CHIBAI KA BûK A CHE