Chhawmdawlna In Main Gate hawng dawn

December 4, 2018 dar 12:30 hian MBKHP Chhawmdawlna In, Melte Main Entrance Gate siam thar chu hawn a ni dawn ta. He main Gate hi Pu R.Laldinliana, Malsawm Inverter, Bazarveng te chhungkua-in an siam sak a ni.

Gate Hawnna Inkhawm hi Upa C. Remmawii, Chairman, MBKHP-Grace Society Board-in a kaihruai ang a. Rev. F. Ra,dinmawia, general Secretary, Baptist Church of Mizoram in hawngin Pathian hnenah a hlan ang. Chhawmdawlna In-a awmte hnen atangin Special Item beisei a ni ang a, he gate siamsak tu leh sum thawhtu Pu R. Laldinliana, Malsawm Inverter, Bazarveng-in thu sawiin Pi Lalnunzami Chawngthu, Project Manager-in Report pe-in Pi F. Lalrochami, MBKHP Presidente-in tawngtaiin hun a khar ang.

MBKHP Chhawmdawlna In, Melte hi 1996 MBKHP Rorel, Ramhlun S Biakin, Aizawla neih ah chuan ‘Chhawmdawlna In din nise, Assembly General committee ah thlen nise’ tiin thu dah a ni a. BCM Assembly General Committee chuan remtih sakin 1997-ah BCM Assembly chuan CHhawmdawlna In din a lo phal sak ta bawk a. Hemi atang hian sumtuak leh awareness neih tan a ni.  1999 : Sorkarah in register a ni a. MBKHP hminga register a rem loh avangin  ‘Grace Society’  tia registered a ni. (Grace Society chu MBKHP sorkara a in registerna hming a ni, pawl hrang anga din  a nilo) Tichuan 1999-ah in sak chhoh tan a ni a, May 18, 2000-ah hawn niin hemi kum August 1-ah hman tan a lo ni ta a ni.

Chhawmdawlna-in-ah hian ruihhlo ngai te leh zu-in a tihbuai te enkawl an ni tlangpui a. Pathianthu leh damdawi lam thiamna hmanga enkawlna pek an ni. Heng bakah hian anmahni inenkawla, an intunnun chhoh theih nan Skill Training programme kalpui a ni bawk a –  Puanthui, Laphiar leh Kutthmethiamna lam (Carpentry/Handicraft),  Training Centre te dah a ni.

October 2018 Report –a a lan danin January – September chhungin mi 159 enkawl an ni a, January – September 2018 chhunga Chhawmdawlna in atanga damna changa chhuak mi 84 zet an awm bawk. Hetihlai hian a hun lova chhuak leh harsatna avanga inla chhuak (Drop Out) engemawzat an awm ve bawk a ni.

Tunah hian thawktu 22 awmin, Office staff- 2, Attendant-6  & Warden-2 te an ni a, Counseling staff -8 leh Skill Trainers 4 an awm a ni.

 

Posted in BCM News.

admin

Leave a Reply