Christian Education Department

Chanchin tlangpui leh Report

1. Mizorama Sunday School din a nih dân:

Pathianin kan Pioneer Missionary-te, Rev. J.H. Lorrain leh Sâp upa-te hi finna a pe nasa hlein a lang. A chhan chu Sunday School tha tak min dinsak a, an lo kalpui hi a ni. Kan hnam tâna khawvêl êng kan hmuh ve theih nâna kawngkâ min hawnsakna atân an hmang hi a hlu hle. Mizorama Sunday School kan neih dânah hi chuan Chanchin Tha hrilna hmanrua a ni satliah mai lo va, zirna in tha tak a nih nghâl avângin Mizoram kristiante tân chuan khawvêl thil tak pawha chhanchhuahna hlu tak a ni chiang hle. Pathian thu mai zir lovin ziak leh chhiar an zir a, khawvêl êng min hmuhtîrtu pawimawh tak a ni.

1.1. Aizawl-a din a nih thu:
Sâp upa leh Pu Buanga chuan January ni 11, 1894 khan Mizoram lo lûtin Aizawlah awmhmun an rawn khuar a. Tûna High School Mual tia hriat, McDonal Hill-ah hian awmhmun an khuar a. Pathian thu mêwl tê tê, a zira zirna school buatsaihsak thain an hre ta a. Sunday School chu March 1, 1896-ah an din ta a ni (1896 hi Leap Year kum niin, March 1, hi Pathianni ngei a ni tih Reader Digest-in Perpetual Calendar For the Years 1780 to 2014). Tichuan Sunday School chu Mizoram tâna ro hlu leh hnam min chawimawitu, thiamna min petu tangkai tak a ni ta a ni.

1.2. Lunglei lama din a nih thu:
Kum 1894-a Missionary-te an lo chhuah atanga kum hnih hnu Aizawlah Sunday School hi din a ni a. Kum 1902-ah chuan Lunglei lamah pawh Kristian (ringtu) an lo awm ve nual hman a. Hemi kum hian BMS Missionary tûna Bangladesh-Rahmate khuaa awm, Rev. George Hughes chu Mizoram chhim lamah lo zinin Tlabung a rawn thleng a. Tv. Thankûnga, Pûkpui khua, Kristian an nih avânga lalin a hnawhchhuah Sethun hmuna awm, Tlabung-a zin nên an inhmu hlauh mai a. George Hughes chuan Sunday School din tûrin thu a lo râwn a, Teaching Aid atân Bible milem (picture) thenkhat pawh a pe bawk. Tichuan kum 1902 vêk chuan Tv. Thankûnga hovin Sunday School chu Mizoram chhim lama Biak In dinna hmasa ber Sethlunah chuan an din ta a ni.
Kum 1903-ah Pu Buanga leh Sâp upa chu BMS Missionary-in Mizoram chhim lama bung tûrin an lo chhuak leh a. Pu Buanga chuan a tîr atangin Sunday School a enkawl nghâl a. Pu Buanga hian Sawrkâr lamah pawh Sunday School pawimawhzia a thlen nghâl a, zirtîrtute chu Kuli âwlna a dîlsak nghâl bawk. Kum 1930 vêl thleng khan Kuli âwlna Sunday School zirtîrtute chu pêk an ni nghe nghe a ni.

2. Sunday School kal zêl dân.
2.1 Baptist Kohhran (Mizoram Chhim Lam)-a kalpui a nih zêl dân: Kum 1903-a Pu Buanga leh Sâp upa an lo chhuah pawhin Pu Buanga’n a enkawl zui nghâl a ni. Tichuan kum 1904-ah chuan Sethun inkhâwmpuiah “Kohhran din tawhnaah chuan Sunday School awm zêl rawh se”, tiin thu an titlu a. Tichuan, 1904-ah Baptist Kohhran 11 an awm a, chûngah chuan Sunday School dinin zirtîrtu pawh 11 an awm. Tin, zirlai pawh mi 162 lai an awm tawh a ni (BMS Report 1904 By Pu Buanga (J.H.Lorrain)). Pu Buanga hi kum 1903 atanga 1926 thleng Sunday School hotu a ni. Kum 1919-ah E. M Chapman a lo chhuak a, Pu Buanga chu Sunday School lamah a tanpui ve ta nghâl a. Lession Note-te a buatsaih ta a, mumal deuh hlek zâwkin kalpui a ni ta zêl a. Kum 1927 atang phei chuan Sunday School hotu hna a thawk ta a ni. Upa R. T. Bawia chu full-time Secretary hmasa ber atân kum 1966-ah hman a ni.

3. BCM SS zirlaibu buatsaih dân.
Kum 1919-ah Missionary E.M Chapman a lo chhuak a, Lession note mumal deuvin min siamsak a, tichuan Senior pâwl tân Bible (Thuthlung Hlui & Thuthlung Thar) kum 1921 atang khan mumal takin kan zir ta a ni. Chubâkah chuan thupui thlan chhuah bîk hmangin kan zir bawk thîn. Kum 2003 hma lamah khan Senior A chin hnuai lam zir tûr hi buatsaih a ni thîn a, kum rei tak chu CEEFI zirlaibu lehlin a ni thîn. Kum 2003 Assembly chuan 2004 atangin keimahni kutchhuak ngei zir tawh ila a tih avângin Sunday School Departmennt-in a buatsaih ta a. Zirlaibu chu kum 1-na, kum 2-na leh kum 3-na siamin kum thum chhûng zir a ni thîn. A ziaktu pawh kan mi thiamte hman an ni thîn. Department Committee-in tûl a tih hunah Revise leh zirlaibu dang siam a rêl thîn. Tin, kum 2011 atang khan Nursery buatsaih (introduce) a ni a, an phâk tâwk tûra siam zirlai leh Rhyme pawh buatsaih a ni. Kohhran tam zâwkah kan la kalpui thei chiah lo nain, a kalpui mêkte erawh chuan tha an ti hle a ni. 2017 atang chuan mumal taka zirlaibu siam a nih theih nân Text Book Committee din a ni. He committee hian zirlai bu buatsaih leh enkawl hna a thawk ang.

4. Training & Seminar:
Christian Education lamah hian mumal taka training nei hruaitu kan la nei mumal lo ti ila kan tisual awm lo ve. All India Sunday School Association bul chuan Cheralkun, Kerela-ah Trainers Training a buatsaih a. Christian Education Director, Rev. P.C. Liandula chu kum 2004-ah tirh a ni ta a. Tichuan 2006 atangin Trainer buatsaih an lo ni ta bawk a. Hêng Trainer-te hi tangkai taka hman an ni a, tûnah chuan mi 14 lai Trainer kan nei ta. Kum 2009-ah Rev. B. Lalramhluna chuan M.Th (Christian Education) a zo ve leh ta a. Tûnah chuan Christian Education Department lam pawhin bial leh tualchhûng kohhranah mumal takin training a pe ve thei ta a. Bial leh Tualchhûngah Zirtîrtute pualin Training pêk an ni thîn.

5. Zirna lam:
Kum 2016-a kan dinhmunah chuan BCM member kum 4 chin chunglam atanga hming ziak hi 78.93% lai kan lo ni ve ta. Member 20.07% erawh chuan hming an la ziak ve lo va, khawiah nge an awm ang le. Tualchhûng kohhran tinte tan i la thar leh ang u khai.

6. Sunday School (Christian Education Department) Thiltum:
Christian Education Department (Sunday School) hian thil tum mumal leh fel tak a nei a. Hemi hawi hian rawngbâwlna pawh kalpui a ni. Chûngte chu:-
1. Mi bote Krista hnêna hruai. (Piang thar tûra mite buatsaihna hmun a ni)
2. Mihring dik tak ni tûra buatsaih (Kristian nun dân tha inzirtîrna hmun a ni)
3. Kohhran mi dik tak ni tûra buatsaih (Kohhran tihnghehna tûra inzirtîrna hmun a ni)
4. Pathian thu dik taka pawm leh hmantîr (Sunday School hi kohhran rangkachak khur a ni).

“Khawvêlin Krista Chanchin Tha a mamawh a, chu mi pe chhuak tûrin kohhran a ding a, pe thei tûra a inbuatsaihna chu Sunday School hi a ni; chuvângin Sunday School hi khawvêlin a nghâk thuap a ni,” – James De Forest Murch.

Baptist Kohhranin Sunday School a neih atanga hruaitu lo ni tawhte leh an hun chhung a hnuaia mi ang hi a ni:-

No Hming Nihna Period
1 Rev. J.H. Lorrain Hotu 1903-1926
2 Miss Chapman (Zirtiri) Hotu 1927-1945
3 Rev. H.S. Luaia (Church Secy) Secretary 1946 -1951
4 Pu K. Lalliana (TKP Fin. Secy) Secretary 1952 -1957
5 Upa K.L. Vanngaia (TKP Secy) Secretary 1958 -1964
6 Rev. K. T. Chungnunga (TKP Secy) Secretary 1964-1965
7 Upa R.T. Bawia (full time hmasa ber) Secretary 1966-1982
8 Rev. T.C. Laltlawmlova Secretary  Mar -July ’82
9 Rev. Raltawnga (Lit. Secy) Secretary 1982-1983
10 Upa R.T. Bawia (P & B Manager) Secretary Aug – Nov. ’83
11 Rev. H. Hrangena (Lit. Secy) Secretary 1983-1984
12 Rev. V. L. Zawnga (Lit. Secy) Secretary 1984-1993
13 Rev. C. Sangkama (Lit. Secy) Secretary 1993 -1994
14 Rev. C. Chalhlira Secretary 1994-1997
15 Rev. C. Lalbiaksanga Secretary 1997 -2002
16 Rev. R. Lalchamliana Director 2002-2004
17 Rev. P. C. Liandula Director 2004-2007
18 Rev. Lalthangliana Hnamte Director 2007-2010
19 Rev. B. Lalramhluna Director 2010-2013
20 Rev. V. Vanlalchhunga Director 2013-2016
21 Rev. P.C. Liandula Director 2016-2019