Christian Hospital Serkawn-a Oxygen Plant Buatsaih Mek atan MLA 5 ten Cheng Nuai 20 an pe.

October ni 25, thawhtan chawhma dar 11 khan Health Minister, Dr. R. Lalthangliana leh Lunglei District chhunga MLA 4 – Pu C. Lalrinsanga, Agriculture Minister; Pu Lawmawma Tochhawng, Vice Chairman HPC; Dr. Vanlaltanpuia, Chairman Mizoram Youth Commission leh Dr. K. Pachhunga, Vice Chairman, Bamboo Development Board te chuan Christian Hospital Serkawn-a Oxygen Plant buatsaih mek atana Cheng nuai 4 theuh an thawhkhawm, cheng nuai 20 chu Headquarters hruaitu te hnenah an hlan.

Thilpek hlanna hun hi BCM Hall, Serkawn ah neih a ni a, Rev. Dr. C. Vanlaldika, AGS (Mission) in a kaihruai a. MLA 5 te aiawh in Pu Lawmawma Tochhawng leh Dr. K. Pachhunga ten General Secretary Rev. F. Ramdinmawia hnenah thilpek hi an hlan a. Pu Lawmawma Tochhawng leh Dr. K. Pachhunga te chuan Kohhran in hripui do kawngah, Sawrkar kut ring mai lova, theihtawpa tha thawha an beihna kawng ah lawmthu an sawi a. Hri dona atana thil tul leh hri alo reh hun pawha Hospital tana thil pawimawh tak Oxygen Plant an buatsaih mek chu anni MLA 5 te chuan thil pawimawh tak leh tul tak a nih thu te hria a, inrawn khawm in, hemi atana lawm taka sum an thawhkhawm thu an sawi.

Rev. F.Ramdinmawia, General Secretary pawh in, sawrkar hotu ten an ngaihsakna leh an theihna te sawr chhuaka Kohhran an tanpuina ah lawmthu sawiin, an hnen atanga an tanpuina dawn chuan Oxygen Plant buatsaih mek ah nasa taka awmzia a neih tur thu leh hemi avanga peih thuai theih a nih dawn thu a sawi. Thilpek hlanna hun tawi hi Rev. R. Lalbiakliana, AGS (Service) in lawmthusawi tawngtaina hmang in a khar.