Combine Choir Music Video siam rel

W&M Committee Meeting

Mizoram Baptist Kohhran, Worship & Music Department Committee nimin, October 23-a thukhawm chuan kum 2020-ah BCM Worship & Music buatsaihin BCM Choir, Lawngtlai Area Baptist Choir leh Aizawl Area Baptist Choir te infinin Music Video siam ho ni se, hemi atana sum mamawh tur pawh 2020-2021 budget-ah khung ni se an ti.

He Meeting hi Committee Chairman Rev. F. Ramdinmawia’n a kaihruai a, Rev. Lalremsiama Ralte, Director W&M-in report tlangpui a pe bawk. Report-ah hian Worship & Music Training-a kalna hrang hrang te tarlangin kumin November thlaa Lawngtlai Area Tleirawl Pual Meet neihna tura inbuatsaihna kalpui mek dan te a tarlang bawk.

An thurel langsar dang te chu – 2020-ah Hnathial District huap Bial Zaipawl Meet neih ni se tih te, 2020-a Siaha Town huam chhungah Praise & Worship neih chungchang te, Zonet-in an sawm angin Luangchhuak Programme-ah BCM Choir tirh remtih a ni bawk. Heng bakah hian kum 2020-2021 Department Plan & Budget te thlir ho a ni a, Committee sang zawkah thlen chhoh turin pawm a ni.

Posted in BCM News.

admin