Corruption chungchanga BCM Thuchhuah

Mizoram Baptist Kohhran rorelna sang ber Assembly chuan, “Kan ramah hlemhletna (Corruption) a tlem theih nan hmalak nise”, tiin a rel a. Kohhran mi tinin corruption hi kan thinlung taka kan hnawl theih nan he Thuchah hi buatsaih a ni. Kohhran miten min ngaihpawimawh sak turin kan in ngen e.

1.     Corruption chu engnge ni? :

Corruption chu ‘eiru’ kan tih hi a ni ber a. Eiru chu- hlepruk te, kut tling lova sum lakluh te, hlemhletna te, mahni hna a rinawmlohna te, mi chan tur lak sak te, Kohhran leh sawrkar thil, mahni hlawkna atana dik lo taka hman te leh ‘Sum hman dan dik lova hmanral’, te hi a ni. Thuneituten anmahni duhzawng leh hlawkna tura an thuneihna dik lo taka an hmang hi corruption a ni bawk. Heng thil te hi Mizoram Baptist Kohhran chuan tha a ti lova; Kohhran mite tih atan thil bawlhhlawh a ni, kan ti.

2.  Corruption awmtirtu :

Corruption hi tluchhe tawh mihring pianpui thinlung duhamna atanga lo chhuak, Isua Krista neilotute leh kan Bible in tisa mi a tihte thiltih a ni. Hausak chakna te, dinhmun tha leh nuam taka awm chakna te hi corruption ti tura thlemtu an ni a; chutiang thil awhna leh tisa thiltih tenawm tak laka fihlim tur leh a ching thinte pawhin bansan turin Mizoram Baptist Kohhran chuan mi zawng zawng kan ngen a ni.

3.    Corruption in chhiatna a thlen dan:

Corruption hi natna hrik anga min eichhetu a ni a, cancer natna in mihring taksa leh thisen a eichhia a. Hetiang chiah tho hian corruption hian kan khawtlang nun (society) te, eizawnna (economics) te, ram rorelna (politics) te leh Kohhran thlengin a tichhe mek zel a ni.  Hei hian hnam leh Kohhran mualphona leh chhiatna a thlen dawn. Ram leh hnam, Kohhran leh khawtlang hmelma lian berte zing ami a ni. I do tlat ang u.

4.    Corruption Pathian huat zawng:

Corruption hi Pathian huat zawng a nih avangin corruption titute chu Pathianin rapthlak takin an nun a khawih a, mualpho takin an tawp thin. Juda Iskariota te, Anania leh Saphiri te, Akana atang te in kan hmu. Chuvangin Kohhran mite chu Pathian anchhia leh a thinurna rapthlak tak pumpelh turin corruption laka inthiar fihlim tur leh dikna leh rinawmna kengkawh tlat turin Pathian hmingin kan in ngen a ni.

In rawngbawlpui,

Sd/- Rev.H. Lianngaia   

General Secretary.   BCM

  Sd/-  Rev. Lalbiaksanga Chinzah

Associate General Secretary,

 Social Concern Department