DLBCA hruaitu ten BCM an rawn zir

Dibang Lohit Baptist Church Association hruaitute

Arunachal Far East a BCM in kan thawhpui Dibang Lohit Baptist Church Association (DLBCA) hruaitu te leh Pastor rual, Executive Committee in kal tura a thlan, mi 11 bakah anmahni kaihruaitu tur missionary pakhat nen, an vaiin mi 12 te chuan BCM kalphung zirchiang tur leh Mizoram rawn tlawh turin an lo kal.

Heng mi 12 te hian , BCM inrelbawlna leh Centralisation zirchiang turin December 2, 2019 khan Arunachal an chhuahsanin Aizawlah zan hnih an riak a. Aizawlah hian AICS te, ES Office, leh Ramhlun North Kohhran te an tlawh a. December ni 5 khan Lunglei ah lo pheiin, Pathianni thleng an cham ang. Lungleiah hian BCM Headquarters hruaituten lo dawngsawngin Centralisation Training an neipui a, BCM hmunpawimawh hrang hrang te an fanpui bawk.

An cham chhung hian Tualchhung  Kohhran pathum-ah inkhawmpui an ni ang a. Inrinni zanah Lunglawn East, Pathinni zing-ah Chanmari leh Pathianni zanah Ramzotlang Kohhran-ah te an inkhawm ang. Ruahman lawk ang chuan Thawhtanni hian Lunglei chhuahsanin Aizawl an pan ang a, Thawhlehni-ah Arunachal lam panin an haw tawh dawn a ni

Heng hruaitu lo kal te hi BCM Ramhlun North in an sponsor a ni a. An kal man leh ei leh in senso zawng zawng an tum sak a ni. Lungleia an cham chhung hian an thlenna, ei leh in bakah an kal velna senso hi Headquarters in a lo ngaihtuahsak thung dawn a ni. Heng DLBCA kohhran hruaitute hi Arunachal Far East Field a kan missionary Pu Lalfakliana’n a rawn ho a ni.

Posted in BCM News.

admin