Dr. Goldie kan chan ta

Christian Hospital Serkawn-a Medical Officer, Dr. Goldie Lalrinsangi Sailo d/o  Lalnuntluanga Sailo Venglai, Lunglei chu July 31, 2020 zing dar 2:20 khan Christian Hospital, Serkawn-ah boralin, duh leh hlim taka rawng a bawl sak thin,  a Lalpa hnenah a chawl ta. Hemi ni vek, chawhma dar 11:00-ah an chenna in, Venglai, Lunglei-ah vui ni in, Venglai thlanmualah ropui taka thlah liam a ni.

Dr. Goldie hi Bialtu Pastor, Rev. Vanlalmuankima’n vui in, vuina inkhawm ah hian BCM aiawhin Rev. R. Lalbiakliana, AGS – Service, chhungkaw aiawhin Pu Lalnuntluanga Sailo leh a thawhna Christian Hospital, Serkawn aiawhin Upa Dr. LH lalrammawia ten thu an sawi.

Dr. Goldie Lalrinsangi Sailo hi Pu Lalnuntluanga Sailo leh Pi H. Zohmingthangi, Venglai, Lunglei te fa pali zinga upa ber niin, January 20,1987-ah a piang a. An unau hi hmeichhia vek an ni.

Zirna ah, Kg atanga class VIII thleng Sacred Heart School, Lunglei ah kal in, New Life Academy, Vawngzawl atangin HSLC a zo va, Baptist Higher Secondary School, Serkawn-ah Class XI-XII kalin, HSSLC tha takin a zo leh a ni. RIMS, Manipur-ah MBBS zirin 2010 khan tha takin a zo va. MBBS a zir zawh hian Makunda Hospital-ah Voluntary-in hun rei vak lo a thawk a, kum 2012-2013 khan Ram Manohar Lohia Hospital, New Delhi-ah a thawk leh a, 2014 May thla atangin Christian Hospital, Serkawn-ah Medical Officer hna hi a zawm ta a ni. A thih ni thleng in he hna hi thawkin Damlo enkawl bakah Ultrasound khawihtu ber a ni bawk.

Hun engemaw chen atang khan insawiselna neiin Aizawlah ah pawh zai a lo ni tawh a, chumi hnuah CMC Vellore ah pawh in check-up te pawhin a kal a, mahse, that lohna leh natna emaw hmuh chhuah a ni lova. Tichuan, October 2019 atang khan insawiselna nei zual deuhin, a khua te a sik tak fo avangin Christian Hospital, Serkawn-ah November 2019 khan admit a ni a. A khawsik hian a thlah tak meuh loh a vangin December 27, 2019 khan Christian Medical College, Vellore pan pui a ni a.

Vellore-ah hian Cancer a ni tih hmuh chhuah a ni a, zai nghal niin, theihtawpin Chemo nen enkawl nghal a ni a. Mahse a cancer hi a lo nasat deuh tawh avangin a chau telh telh a. Covid -19 hrileng avangin haw thei lovin rei tak Vellore lamah an tangkhang zui a. Harsa takin June 2020 khan rawn haw puiin, Christian Hospital, Serkawn-ah admit nghal a ni a. A thawhpawi doctor leh nurse ten duat taka an enkawl laiin, July 31, zing dar 2:20 khan hlim taka rawng a lo bawl sak thin, Lalpa hnena chawl tawh turin min haw  san ta a ni.

Dr. Goldie thihna hian Mizoram leh Mizoram pawna Kohhran chhungkua leh thawktute deng chhuak nghalin, uitu a ngah hle a, Kohhran mite leh thawktu ten an ui thu leh an tawrh thu hian Kohhran huang leh Thalai huang social media a luah nasa hle.

Dr. Goldie hi a rawngbawlnaah hian thahnem a ngai em em a, a hun tawp thlengin a theih tawp a chhuah tak meuh a ni. Awm nuam lo chung chung pawhin na chhawkna te eiin, na chhawknain a chhawk chhungte  hian Ultrasound a theih chhung chu a tilui zel thin a ni. Hlim hmel pu leh thuawih taka engkim tih tur ang ti zel thin  a ni bawk.

Mizoram Baptist Kohhran chuan Doctor viak tha leh a hnaa in pe em em, Dr. Goldie a nei hi a chhuang tak zet a. Dam lo te tana innghah ngamna, mi inngaitlawm leh Pathian ring tlat mi, dam lo harsa zawkte tan pawha engtik lai pawha pan ngam leh rawn ngam a nihna te chu a chhuangin a zah em em a ni.

Mizoram Baptist Kohhran chuan Doctor viak tha leh a hnaa in pe em em, Dr. Goldie a nei hi a chhuang tak zet a. Dam lo te tana innghah ngamna, mi inngaitlawm leh Pathian ring tlat mi, dam lo harsa zawkte tan pawha engtik lai pawha pan ngam leh rawn ngam a nihna te chu a chhuangin a zah em em a ni.

Hetia rin loh leh beisei loh taka natna khirh takin a tlakbuak ta mai leh, hun lo taka Kohhan hote min kalsan ta mai hi kan uiin kan sun takzet a, a kalsan, a nu leh pa, a unau te leh a thawhpui te Lalpa’n hruaiin awmpui zel se tih hi kan tawngtaina a ni.