Lunglei ‘N’ bialtu MLA-in BCM hruaitute kawm

March 22, 2019 (Zirtawpni)  khan Dr. Vanlaltanpuia, Lunglei North bialtu MLA chuan   Mizoram Baptist Kohhran Headquarters Office, Serkawn tlawhin, General Secretary Office Chamber-ah  BCM hruaitute nen inkawmhona hun tha tak an nei. Dr. Vanlaltanpuia hi BCM puipate – Pc Liandula, President BCM, Rev. F. Ramdinmawia,  General Secretary, Rev. Dr. C. Vanlaldika, AGS i/c Mission bakah Kohhran hruaitu pawimawh thenkhat ten an lo dawngsawng a ni.

MLA, Dr. Vanlaltanpuia chuan BCM hruaitute a rawn hmuh chhan te sawiin, BCM hruaitute chu Sorkar khalh ngil tur leh ram leh hnam hmasawnna tura tanho puiah a sawm a, Mizoram chu lehkhathiam tamna state a ni chungin thalai mahni intodelh tura hna thawk kan la tam tawk lo chu pawi a tih thu sawiin, hemi kawngah hian Kohhran te nen theihtawpa tan ho a tul thu a sawi a, Sorkar thar hmachhawp leh ruahmanna tlangpui te a sawi lang bawk.

BCM President, Rev. PC Liandula chuan Sorkar tharah Mizoram mipuite leh Kohhran ten beiseina sang tak an neih thu sawiin, Sorkar a that loh chuan ram-in nasa takin a tuar thin a, Kohhran chuan sorkar rorelnaah tih theih nei lo mah ila, rorelna dik leh tha a awm theih nan ram hruaitute theihtawpin an tawngtaipui reng thin a ni a ti. BCM President bakah hian General Secretary te, AGS te leh hruaitu dang te pawhin MLA thar lawmna leh fuihna thu an sawi bawk. Inkawmhona tha tak an neih hnu-ah Kohhran hruaitute chuan BCM hmalakna kal mek leh hmun pawimawh te an enpui bawk.

HPC Vice Chairman, Pu Lawmawma Tochawng, MLA pawhin January 25, 2019 khan BCM hruaitute hi a lo tlawh tawh a, inkawmhona hun tha tak an lo hmang tawh a ni.

 

Posted in BCM News.

admin