EASTER SUNDAY

Kristiante kut pawimawh pathum- Christmas, Good Friday leh Easter Sunday te hi mihringte chhandamna siam tura Pathian Fapa, Isua Kristan he khawvela a hun hman leh tawn ropui tak takte an ni. Christmas hi mihringte tan lawmna ni a nih laiin, Lal Isua tan chuan tuarna a rawn tan hun a ni a, Good Friday phei chu tuarna vawrtawp a ni. Easter Sunday hi thihna hneha a thawhlehna ni a nih vangin, lawmna ni ropui tak a ni. Chuvangin Easter Sunday hi a ropui chungchuang a ni. Tirhkoh Paula chuan Krista thawhlehna chu kan rinna innghahna bul leh a Chanchin Tha hril innghahna a ti hial a ni (1. Kor. 15:14, 17).

Easter Sunday chu Lal Isua thihna hneha a thawhlehna ni hriatrengna atana kristiante ni serh a ni. Kristiante kut pawimawhte zinga a ni leh thla pangngai reng lo chi (movable feast) an tihte zinga pakhat a ni a, March 22 leh April 25 inkarah a thleng thin. A hun leh ni a danglam thinna chhan chu hetiang hi a ni:

Hun hmasa lama kohhran lo kaihruai thintute- ‘Kohhran Pa’ an tihte chuan Lal Isua thihna, phuma a awmna leh a thawhlehna te chu Kalhlen kut zawh hlimchhawna thleng a nih avangin, Easter Sunday hi Juda-te Kalhlen kut zawh Sunday hmasa berah hman an duh a. Chutih laiin Judate hun pawimawh calendar (holiday calendar) chu calendar pangngai angin a kal lo va, ni leh thla her danin a hril zawk a. Hemi chhut dan pakhatah chuan khawvel hmun tinah kum khata chhun leh zan rei zawng inchen ni ‘equinox’ pahnih (March 21 leh September 22) zinga a hmasa zawk [vernal (spring) equinox] March 21 hnua thla bial zan hmasa ber dawta Sunday hmasa ber tiin chhut a ni bawk thin. Hei vang hian Easter Sunday, Good Friday leh Palm Sunday te hi ni (tahrik) bik nei lo, insawn thei (movable) an ni a, kum hrang hrangah an thlen hun a inang lo ta thin a ni.

Good Friday leh Palm Sunday te pawh hi Easter Sunday atanga chhut leta zirtawpni hmasa ber leh sunday hmasa ber te an ni thin a ni. Engpawh ni se, a hunbi (tahrik) hi a pawimawh ber lo va, kan serhna chhan tak, Lal Isua hun tawnga thil thlengte kha kan chhandamna kawng min siamsakna a nih avangin, chung hun hriatrengna atana kohhran hmasaten hunbi an lo chhiar dan zawm mai hi a pawi lem chuang lo ve. Kan serh dan leh kan ngaihpawimawh danah a innghat zawk a ni.