ECM hruaitute leh BCM hruaitute inbia

DSC_1005

Evangelical Church of Maraland (ECM) Hruaitute chuan Tunkar Inrinni, July 26, 2014 khan Mizoram Baptist Kohhran Headquarters rawn tlawhin an rawn kal a, ECM hruaitute hi Senior Executive Secretary Rev. P. Riabi-an rawn hovin, ECM Puipa phnih leh zaipawl  ten an rawn zui a ni.

Inrinni zan atanga Pathianni zan thleng Lunglei Kohhran hrang hrangah zaipawlte nen hun an hmang a, BCM hruaitu ten an tawiawm thin a, an hun hmanna Kohhrante hian chawhlui an lo buatsaihsak zel a ni. Inrinni zanah Venglai Kohhranah hun hmangin Pathianni zingah Electric Kohhran leh Pathianni zanah Rahsiveng Kohhranah te hun an hmang a ni.

July 27, 2014 (Pathianni chawhnu) dar 2:00 khan Sap Upa leh Pu Buanga Hall, Serkawn-ah BCM hruaitute leh ECM hruaitute hi inkhawmhona neiin hun hlimawm tak an hmang a. He Inkawmhona hi Rev. H. Sangchema, BCM President-in a kaihruai a. Rev. Riabi, Sr.Executive Secretary, ECM chuan BCM Headquarters an tlawh chhan te leh Evangelical Church of Maraland(ECM) -in Mizoram Baptist Kohhran (BCM) laka lawmthu sawi tur an neih tam zia te sawiin, ECM lo din tu, Missionary Rev. Ronald Roland thuziak tawi a chhiar chhuak a. An rawn kal chhan ber –  “Presbyterian Church of India (Mizoram Synod) leh Baptist Church of Mizoram (BCM) inkarah thawhhona tha a lo awm leh theih nana in palai tawn leh turin hma lak ni se” ti-a ECM Assembly-in a lo rel bawhzuina a ni tih sawiin, “Mizorama Missionary din Kohhrante-ah hian inlaichinna tha a awm leh theih nan hma i la tlang ang u,” tiin kan rawn ngen che u a ni a ti.

BCM General Secretary, Rev. H. Lianngaia chuan, ECM hruaitute chungah lawmthu sawiin, an hmalakna chu BCM chuan lawmawm a tih thu a sawi a, BCM chu Mizorama Kohhran hrang hrangte inunauna tura thawhho zel a inpeih reng thu a sawi bawk. Mizoram Baptist Kohhran leh Evangelical Church of Maraland te hi inhriatthiamna zau tak nen hun rei tak chu Kohhran rorelna (Assembly)-ah an lo in palai tawn tawh thin a, an inkarah harsatna engngemaw avanga chhunzawm lohva hun eng emaw chen lo zuzi tawh chu Kohhran pahnih te’n tih nun leh tha an tih angin kum 2006 atang khan an lo in palai tawn leh ta a ni.

Tunah hian BCM Rorelna sang ber(Assembly) 2014 chuan Prebyterian Church of India (Mizoram Synod) nena inpalaitawn thinna, hun engngemawchen lo tawp ta hi, Kohhran pahnihte inkarah inuanauna tha zawk leh rawngbawlna chak zawk kan neih theih nan chhunzawm leh turin hma lak ni se ti in a  rel a. He Assembly  thurel hi  BCM Administrative Committee chuan bawhzuiin, PCI nena inpalaitawn leh tura sawmna pawh official-in lehkha a lo thawn tawh thu leh an chhanna nghah mek a nih thu BCM General Secretary chuan a sawi bawk.

ECM hruaitute leh Zaipawl te hi BCM-in a lo dawnsawn dan leh hun a lo pek danah te, inbiakna tha tak leh zangkhai tak an neih theih avang tein an lawm hle a.  Vawiin, July 28, 2014  zing-ah khan Saiha lam panin an haw leh ta a ni.

 

One thought on “ECM hruaitute leh BCM hruaitute inbia”

Comments are closed.