General Secretary- Kumthar thuchah

General Secretary   
KUM THAR THUCHAH

Chibai bukna:  
Mizoram Baptist Kohhran memberte leh Baptist Today chhiartu zawng zawngte kan Lalpa Isua Krista hmingin kum thar chibai ka buk a che u. Lusun fate leh natna khirh tak tawka kum thar hlim taka hmang ve thei lo chhungkuate erawh kan lainatin kan tuarpui tak zet che u a, kan awngaipui reng bawk a che u; he kum thar hian Pathian malsawmna leh  chhungkaw hlimna tam zawk rawn thlen che u rawh se.
Lawmthu sawina:
Kan hman liam tak kum 2011 chhunga Pathianin Kohhranho min hruai dan leh a malsawmna kan dawn tam tak sawi tur a awm, heng zawng zawng hi chhungkaw member tinin Pathian leh Kohhran tana in inpekna leh inphalna avanga hmuh theih a lo par chhuak a nih avangin Pathian hmingin in zaa hnenah lawmthu ka sawi tak meuh a ni.
S^wmna:
Kan mi duh tak te’n khawvel chhuahsana min kalsan hnua keini nung dama la awm, khawvel la luah mekte hian kan chak bik vangte, kan hrisel bik vangte, kan phu reng vangtea hun la nei kan ni lo va, Pathianin he khawvelah hian tih tur min la pek avang chauh z^wka mi nung rama la ch^m hi kan ni tih hriain Pathian hn>nah lawm nachang hria ila, lawm chunga rawngbawl hna thawk zel turin ka sawm thar ve leh che u a ni.
Hma chhawp:
Mizoram Baptist Kohhran hian kohna leh chona chhen mek leh la chhan zel tur kan neih belh zel. Ramthima boral mekte’n min au reng a, Ram chhungah- Ram changkang leh hausa zawkte hnu uma-retheihna (BPL) um bo va, khawsakna sang leh changkang zawk (APL) a kan khawsak theihna tur te, bawrhsawmna leh natna laka damna leh hriselna tha zawk kan neih theihna turin Damdawi in leh mi thiam zawk buatsaih te, mawlna leh thiam tlemna kalsana thiamna sang zawk leh finna thuk zawk nei tura zirna leh training-na hmun buatsaih te, tunlai thiamna hmanga Kohhranhote thu thar inhriattir tawnna te leh rawngbawlna leh thlarau nun kawnga hmasawnna tura  hmalakna hrang hrangte chu min ko-tu lian zualte an ni a.
Chutih rual chuan kan ram chu-Sodom leh Gomora sualna leh Nova dam laia mihring sualna chhumpui ang khan min chim reng bawk a. Hengte hi Ringtute min chotu an ni. Kohhran hi Lalpa indonaa tel ve tur hian khawvelah Lalpan min la dah a ni tih hi a chiang khawp mai.
Kumthar Project:
Pathianin Joshua hnena, “I lo upain i lo tar ta hle a, ram lah chu lak tur a la tam si a…”(Jos 13:1) a tih ang khan thawk tam tawh, thawh tam bik, upa lutuk tawh, hna tul dang nei tam kan lo inti tawh mai thei; mahse Pathianin chawlhna (CL/EL) min la pek loh tlat avangin hetiang hian tan i han la thar leh teh ang u.
1. Rinnaa kal:
Paula chuan hmuh theiha kal lova rinnaa  kal zel zawk a nih  thu a sawi a. Rinnaa kal awmzia chu rin kal, rin tih ni lovin Isua Krista rinnain, Pathian thiltihtheihna rinchhana kal tihna zawk a ni.  Pathian thu chuan ringtute hi ral do mek sipai angin a tehkhin a (2Tim 2:3).Mizoram Baptist Kohhran hi member 150,000 vel zet kan ni a. Sipaiho hi ‘Battalion khat’ an tih chu sipai 1000 rual vel an ni awm e. Chutianga chhut chuan BCM hi Battalion 150 zet kan nih chu!. Joshua’n Jeriko kulh bula khandaih phawisa kenga a hma zawna ding a hmuh kha ‘Lalpa sipaihote hotu’ (Commander)a ni a,. Anmahni tamna, hausakna leh indo thiamna ring lova Pathian thiltihtheihna zawk ringa Jeriko an han hual khan beih pawh ngai lovin an tlawm nghal mai a nih kha. Kan rin (Commander) chu Lal Isua a nih avangin amah leh a thiltihtheihna rinchhana ke kan pen phawt chuan  ram chu kan la ve ngei ang.

2. Inpekna:
Pathian chuan thil engkim a ti thei, mahse min duhsak zawkna avangin Hmanruaah min mamawh thin. Jentail khawpui Ninevi chu sual vanga hrem leh boral vek tur an nih lai khan Jona chu     (Phek 3-naah chhunzawm a ni)  simna tlangau turin Pathianin a kova, a tir a, hmanruaah a duh a ni. Jona inpek hma kha chuan ngaihdamna an chang tak tak thei lo, Pathian tirh anga inpea thu a hril meuh kha chuan kha khawpui khan ngaihdamna a chang ta a nih kha. Pathianin khawvelah hian Hna thawh zawh tur (mission) a nei a. Pathianin khawngaihnain a mission-a tel ve tur chuan min sawm a ni; inpekna hian tuh loh rah sengtu chan min chantir bakah nakinah lawmman ropui tak min siamsak bawk dawn a ni. Pathian hian atana keimah ngei ka inpekna aia duh a nei love.

3. Tanrualna:
Mizoram hi Kristian ram intiin Mizo hnahthlak zawng chu Kristian vek zawng kan ni ngei mai. Mahse bihchian kan ngai. Tualchhung Kohhranah hian member 100 zela 50 (a zatve) pawh hi active taka  Pathian chibai buk leh a rawngbawlnaa inhmang kan awm meuh awm love !Khawii Kohhran pawh hi member tlem zawkte inpekna leh thawh khawm avanga lang mawi mai kan ni. Chuvang chuan he kum tharah hi chuan Kohhran leh FOD lam Hruaitute’n kan hmalak tur pawimawh tak chu chhungkaw tam zawk leh member tam zawk Kohhranah leh rawngbawlnaa active taka tel tir hi ni teh se. A lu nung tam hrim hrim pawh hi a pawimawh a ni. ‘ He mite chhungkua hi’ emaw, ‘He pa, he nu hi ka target dawn a ni’ tiin pawisa chauh ni lovin mihring ngei hi target-ah neih hial teh ang u. Lal Isua ngei pawh khan mihring hi a ni a target tlat chu ni. Kan Pathian thahnemngaihna chuan mi zawng zawng , tam thei ang ber a huap zel a ni. Tichuan, he khawvelah hian Kohhran ngelnghet tak leh Lal ram ropui tak a ding thar zel ngei ang.
………………….