GOOD FRIDAY

Good Friday hi Kristiante kut pawimawh tak tak pathumte zinga pakhat, khawvel chhandamna atana Lal Isua kraws-a an khenbeh ni hriatrengna ni a ni. Kristiante hun pawimawh, a ni leh thla pangngai reng lo chi (movable feast) an tihte zinga pakhat a ni a, March 20 leh April 23 inkarah a thleng thin (Hetianga a hun a inthlak danglam thinna chhan chu Easter Sunday chungchang ziaknaah sawi a ni).

Kum zabi khatna atang tawhin kohhranhoten zirtawpni hi chawnghei tawngtai ni atan an lo serh hrang tawh thin a. Kum zabi 4-na atang erawh chuan Easter Sunday hmaa zirtawpni hnuhnung ber chu Lal Isua kross-a khenbeh a nih hriatrengna ni atan an serh ta a ni. A tirah chuan ‘Holy Friday’ (Zirtawpni Thianghlim) tiin an sawi thin a, ‘Great Friday’ (Zirtawpni Ropui) an ti bawk. Kum zabi 6-na vel atangin Rom Kohhranin ‘Good Friday’ an ti ta a, chu hming chu a pu chho ta zel a ni.

Zofate kristian kan lo nih tirh atangin, a awmzia tak kan man hma pawhin Missionary-te zirtirna atangin Good Friday hi kan serh chho ve a. Kan serh dan erawh chu khaw hrang hrangah a inang vek lo. Khua/Kohhran thenkhatin an lak urhsun viau laiin kohhran thenkhat chuan a hming chuahvin an serh thung. Lal Isua sunna rilru nen hun hman a ni thin a, pulpit leh a chhehvelah puan dum te an zar thin. Khaw thenkhatah phei chuan mitthi dar te pawh an vaw hial thin a ni awm e. Kan Mizo hlaphuahtute pawhin chutiang lam zawnga rilru hruai thei turin hla an phuah nual a ni.

Hun lo kal zelah Lal Isua thihna awmzia kan hriat fiah angzia zelin kan hun hman dan leh kan rilru put dan pawh a danglam chho ta zel a ni. Pathian fapa sual reng reng hre lo, mihringte chhandam nana ama inpekna avanga kross-a khenbeha a awm hi khawvel history-a thil thleng ropui tak leh pawimawh tak a ni. Chuvangin a chhandamna changtute chuan he ni hi kan ngaisangin, urhsun takin kan serh zel tur a ni ang.