Harhna Centenary lawm

 July 24-26,2019 hian Harhna thlen champha phak vawi 100-na (Harhna Centenary) (Mizoram Kohhran History-a Harhna tum thumna, 1919 tih thin) chu Zotlang leh Thingsaiah Kohhran ten an lawm mek a, Zotlang-ah chuan Kohhran Pahnih – BCM Zotlang leh Zotlang North ten in finin he harhna thlen Champha hi an lawm a. Thingsaiah pawh Kohhran pali – Thingsai, Bethlel, Gilgal leh Nazareth ten a huhovin an lawm bawk.

Zotlang-ah chuan vawiin chawhma dar 10:15 khan Harhna Centenary hraitrengna lungphun hawn a ni a, Monument hi Rev. B.Thangchina’n hawngin hawn zawh veleh Darkhuang vawi 100 vuak a ni a. Pathian hnena lawmthusawi Inkhawm neih zui nghal a ni. Thingsaiah chuan Rev. F. Ngursailova, Bialtu pastor, Thingsai-in Harhna Centenary lung phun a hawng a, Lungphun hawn zawh hian Kum 100 Jubilee dar vawi 100 vua-in Pathian hnena lawmthusawi Inkhawm-in an chhunzawm bawk. Khaw pahnihte hian Chawhnu lamah Pathian faka zaikhawm leh tlai lamah ruai kil hovin, zan lamah pawh inkhawm leh zaikhawmin hun an hmang ang.

BCM Zotlang

BCM General Secretary, Rev. F. Ramdinmawia chuan Harhna thlen kum 100-na lawmtute chu Chibaibukna leh lawmpuina hlanin hetiang Harhna ropui leh chhinchhiah tlak tak Mizoramin a chang hi a ropui a, Harhna thlen Champhaphak kum 100-na lawmtute leh Kohhranhote Pathian thlaraua harhna an chan leh theuh theihna turin duhsakna a hlan a bawk.

July 26,1919 Pathianniah Lunglei, Zotlang kohhran chuan Lunglawn kohhran an tlawh a, Chumi ni chuan kham lo takin an tin a, zana Zotlang kohhran inkhawmah chuan “Ka Lal duhawm ka zahpui lawng” tih hla an sak laiin vawi leh khatah Thlarau Thianghlim a lo thleng ta phut mai a ni. An zai tawp hlei thei lo va, inkhawm ban pawh awm hlei thei lovin an tlaivar der mai a. Hlo thlawh hun vanglai a ni nain chawlhkar khat zet chu Hlimna chenin an zaikhawm zui ta a ni.

Hemi rual chiah, July 26,1919 zan hian Thingsai leh Nisapuiah pawh he harhna hi thlengin an thuken leh hla sak pawh a in ang deuh vek a. Zorama Kohhran chanchina Harhna thleng tawh azawnga ropui ber leh daih rei ber tia sawi a ni, kum nga lai (1923 thleng) a awh. He harhna hian Kraws thu leh simna thu a keng ber a, sual nih inhriatna leh sual simna an thupui ber a ni. Harhna-in a nghawng thil tam tak zingah – Mizo irawm chhuak zaikhawm hla tha tak tak a lo chhuak a, Pathian faka zai leh lamah an harh thar a, Biak inah khuang an la lut ta hial a ni.

Posted in Uncategorized.

admin