Harhna thlen Champha-4th April

April 4, 2017 (Thawhlehni) hi Mizoram Baptist Kohhran ni pawimawh zinga pakhat – “Harhna thlen Champha” a ni a. He Ni hi Pathian ni a nih loh chuan Headquarters atangin hman ngei ngei turin Kohhrante a phut lem lo a, a hmang thei tur te tan thupui buatsaih sa“ “ Sim ula, hawi kir leh rawh u, chutichuan Lalpa hnen ata harh hunte a lo la thleng thei ang” (Tirhkohte Thiltih 3:19) hmangin thuchah sawi ni se, programme kimchang chu Tualchhung Kohhran-in an duhdanin an siam ang a, Headquarters atanga Thuchah buatsaih pawh chhiarchhuah tur a ni ang.

Harhna thlen champha kan hman tan dan:

Kum 2005 Assembly-in, “April 4, hi Mizorama harhna thlen champha-ah hman ni se,” tiin a rel a. 2006-ah Revival Centenary ram pumah lawm a ni a. Hemi kum 2006 atang hian BCM Calendar-ah chuantirin ni pawimawh zingah a lo tel ta zel a ni.

Kum 1894 January ni 11-ah Zofate Chanchin Tha min rawn hrilh turin Sap Upa leh Pu Buanga (F.W Savidge & J.H Lorrain)-ten Mizoram an rawn thleng a. An theih ang angin kawng hrang hrangin rawng an bawl a. Kristian engemaw zat an siam nain an pung chak lo em em a ni. Kum 12 zet a lo ral hnuin 1906 April ni 4-ah Thlarau Thianghlima Harhna ropui tak Mizoram pum huapin a lo thleng ta a. He Harhna hian Mizoram hmun hrang hrangah Chanchin |ha tidarh zau zelin kohhranhote nasa takin an lo pung a, nasa taka chakin hmasawnna ropui tak a rawn thlen a ni.

He Harhna hi Welsh ram harhna darh zau zel, Meghalaya-a cheng Khasi mite harhna atanga kan dawn chhawn ve a ni a. Khasi ram Moirang khuaa harhna thleng chhim turin Mizoram atangin Baptist Kohhran atang leh Presbyterian Kohhran atangin mi tlem te an zu kal ve a. Beidawng taka lo hawngin Aizawl an lo thleng leh a. Amaherawhchu Aizawl an lo thlen hnu April 4, 1906-ah Harhna chu an lo chang ve ta a. Hei hi Mizorama Thlarau Thianghlim Harhna an chan hmasak ber chu a ni. A khat tawkin Harhna chuan Mizoram a tuam fo thin a. Kan ram (Mizoram) vanneihna ropui tak a ni.

He Harhna hi heti tak hian ngaihlu mah ila, Kohhrante hian a champha ngaihhlutna hi tihlan kan nei meuh lo. 1985 Assembly-ah he Harhna Champha hi ni pawimawha neih turin ngaihtuah a ni a. Mahse a tlu zo lo va. 2005 Assembly-ah erawh chuan tihtluk a lo ni ta a. Ni pawimawhah kan hmang ta a. 2006-ah Revival Centenary ram pumah lawm a ni a. Hemi kum 2006 atang hian BCM Calendar-ah chuantirin ni pawimawh zingah a lo tel ta zel a ni.

THUCHAH:

Harhna hian Mizo Kristiante hi min tlawh fo tawh avangin, a tlangpui chuan harhna hi kan hmelhriat viauin a lang. Amaherawhchu a nihna tak phawk chhuak lova thil narana ngaitu kan la awm thei awm e.

  1. Hrahna chu Thlarau Thianghlim Hnathawh a ni.

Harhna a lo thlenin kan tihdan leh nunphung pangngai aia danglama thil a lo awm avangin mak tihna leh inhnialna a thleng fo thin. Thuthlung Thara harhna kan hmuh hmasak ber penticost ni-a lo thleng pawh kha a changtute leh luhchilh ve lo, ralkhat atanga thlirtute hriatdan chu a danglam hle. Pawn lam atanga thlirtute’n ‘uain thar an rui a nih hi’ an tih laiin chu harhna changtute zinga mi Petera chuan, ‘Hengho hi in rin angin an rui lo ve..’ tiin Pathian Thuin a lo sawi lawk tawh ang taka thleng a nihzia a sawi thei a ni (TT.2:13, 15ff.) Thlarau Thianghlimin a duh anga a thlentir a nih avangin mihringin kan hre thiam phak thin lo, ngaihdan tamtak a piang thin a ni.

  1. Thlarau Thianghlim hnathawh danglam (extra-ordinary) a ni.

Thlarau Thianghlim chu Pathian a nih avangin, a duh ang leh tha a tih ang apiangin hna a thawk thei (cf. Jn. 3:8). Thuthlung Hlui atangin Pathian mite zinga harhna thlen hun hi sualnain mite rilrua hmun a chan nasat lai te, mi thinlung a chawlawl laite a ni fo. Mihirng hian ama duh hun hunah sual a simin nunthar a nei mai thei thin lo. Chutiang huna mite thinlung Pathian lama hawi kirtir chu thil awlsam a ni ngai lo. Chuvang chuan Thlarau Thianghlimin danglam tak leh mihringin awm leh mawi tawk a tih baka sawi thiat kan ngai fo. Chuvangin kalphung pangngai baka danglamin a thawk thin a ni. Kan rama harhna thleng tawhte kan chhui kirin- khurhna te, tahna te, tawng pangngai ni lo tawng hriatloh te, taksa chetnate-in a thawk thin. Hei hian a maksak apiang a thlarau tihna a kawk lo. An mahni an inhria emaw, hre lo emaw, lem chang tam tak an awm thei bawk. Mahse a tak chu an tak a ni mai. Thlarau Thianghlimin a tum chu thutaka min hruai luh hi a ni (Jn. 16:13). Chutianga Thlarau Thianghlim hnathawh danglam tak avang chuan, taksaa chetna emaw, thil danglam tak emaw dawng ve kher lotu pawhin ngaihvenna a lo neih phah a, Thlarau Thianghlim tan pawl theihin a lo awm phah thei thin.

  1. Mihring nuna rah duhawm lo awmna bul a ni.

Kan lo pian thar hian Lal Isua nunzia kan zir tur leh kan nunpui tur a ni, amah anna kawngah kan thang lian zel tur a ni. Chutih laiin thlarauva thanlenna kawngah duhtawk chin leh peih chin nei tlat kan awm fo. Mi piang thar tam tak chu kan luhlulna avang te, kan thatchhiatna avang te, kan chapona avang tein khawvel mite ang thovin kan nung a, kan rah hi a duhawm lo. Thlarau Thianghlim kan tivui a, kan tilungngai fo thin. Chutiang mite chuan Thlarau Thianghlim ‘khawih harh’ kan ngai em em thin a ni. Thlarau Thianghlim chuan harhna boruakah mi tamtak a titlawm thin a, Thlarau hruaia awm thei turin thuawihna kawngah a hruai thin a ni.

 

Posted in BCM News.

Leave a Reply

Your email address will not be published. Required fields are marked *