Harhna thlen champha

 

April 4, 2012 (Nilaini) hi BCM ni pawimawh zinga pakhat – “Harhna thlen Champha” a ni a. He Ni hi Pathian ni a nih loh chuan Headquarters atangin a hman dan tur ruahman a ni lem lo a, Pathianni a nih tum erawh chuan Headquarters atangin programme siam-in ram pumah hman a ni thin a ni. Kuminah hian he ni hi Nilai ni-a nih avangin Nilai zan Inkhawm hi hemi puala hmang thei Kohhrante tan Headquarters atangin thupui thlan sa leh Thuchah pawh buatsaih a ni. Kumin Harhna thlen champha thupui atan chuan ‘Nang muhil! Meng la, mitthi zing ata tho rawh’ (Ephesi 5:14) tih a ni.

 

Mizoram-in Harhna kan chan hmasak ber chu Welsh ram harhna darh zau zel, Meghalaya-a cheng Khasi mite harhna atanga kan dawn chhawn ve a ni a. Chu chu Mizorama Kohhran a din tirh te, ringtu pawh tlem te kan la nih lai, kum 1906-ah a ni. Welsh ram hrahna kal zel chuan India ram pawh lo thlengin Khasi ram, Moirang khua a lo thleng a. He harhna chhim tur hian Mizoram atangin Baptist leh Presbyterian Kohhran hruaitute an zu kal ve a. An lo hawn lam chuan Aizawl an lo thlen hnu, April 4, 1906 khan Harhna chu an chang ve ta a. Chu chuan ram pum a fan chhuak a; Mizorama Harhna lo thlen hmasak ber ni a ni ta a ni.

 

Kum 2005 BCM Assembly chuan 2006-ah Revival Centenary lawm ni rawh se, a tih angin 2006-ah chuan ram pumah Harhna kum 100 (Revival Centenary) chu lawm a ni ta a. He mi kum atang hian BCM Calendar-ah chuan tirin Mizoram Baptist Kohhran Ni pawimawh zingah telh a lo ni ta a ni.

……………………………..

THUCHAH

 

HARHNA AWMZIA:

Harhna sawi fiah dan kawng hrang hrang a awm a, mi hrang hrangin an ziak bawk. Sap tawngin ‘revival’ tih a ni a, mi mal harhna sawina mai ni lovin, a huhova harhna a kawk bik thin. Kohhran pumpui huap emaw, khawtlang huap emaw, ram pum huap emawa harhna sawi nan hman bik a ni. Mi mal chu an harh ngei na-in an harh fal lo va, midangte nen Thlarau Thianghlim tihharhna an chang thin. Revival chungchang ziaktu lar tak Richard Owen Roberts chuan ‘Harhna chu mihring nunah rah duhawm leh danglam tak a lo awm theihna tura Thlarau Thianghlim hnathawh danglam tak (extra-ordinary)  lo thleng hi a ni’ tiin a sawi fiah a. Kan rama harhna lo thleng tawh leh a hna thawh dan enin he sawifiahna hi a dik hlein a lang.

HARHNA BIHCHIANNA:

Harhna hian Mizo Kristiante hi min tlawh fo tawh avangin, a tlangpui chuan harhna hi kan hmelhriat viauin a lang. Amaherawhchu a nihna tak phawk chhuak lova thil narana ngaitu kan la tam zawk hial awm e. Richard Owen Roberts-a sawifiah dan (definition) hian bihchian a dawl viauin a lang a, i han bihchiang teh ang-

1. Hrahna chu Thlarau Thianghlim Hnathawh a ni.

Harhna a lo thlenin kan tihdan leh nunphung pangngai aia danglama thil a lo awm avangin mak tihna leh inhnialna a thleng fo thin. Thuthlung Thara harhna kan hmuh hmasak ber penticost ni lo thleng pawh kha a changtute leh luhchilh ve lo, ralkhat atanga thlirtute hriatdan chu a danglam hle. Pawn lam atanga thlirtute’n ‘uain thar an rui a nih hi’ an tih laiin chu harhna changtute zinga mi Petera chuan, ‘Hengho hi in rin angin an rui lo ve..’ tiin Pathian Thuin a lo sawi lawk tawh ang taka thleng a nihzia a sawi thei a ni  (TT.2:13, 15ff.) Thlarau Thianghlimin a duh anga a thlentir a nih avangin mihringin kan hre thiam phak thin lo va, ngaihdan tamtak a piang thin a ni.

 

2. Thlarau Thianghlim hnathawh danglam (extra-ordinary) a ni. Thlarau Thianghlim chu Pathian a nih avangin, a duh ang leh tha a tih ang apiangin hna a thawk thei (cf. Jn. 3:8). Thuthlung Hlui atangin Pathian mite zinga harhna thlen hun hi sualnain mite rilrua hmun a chan nasat lai te, mi thinlung a chawlawl laite a ni fo. Mihring hian ama duh hun hunah sual a simin nunthar a nei mai thei ang leh tha a tih ang apiangin hna a thawk thei (cf. Jn. 3:8). Thuthlung Hlui atangin Pathian mite zinga harhna thlen hun hi sualnain mite rilrua hmun a chan nasat lai te, mi thinlung a chawlawl laite a ni fo. Mihring hian ama duh hun hunah sual a simin nunthar a nei mai thei thin  lo. Chutiang huna mite thinlung Pathian lama hawi kirtir chu  thil awlsam a ni ngai lo. Chuvang chuan Thlarau Thianghlimin danglam tak leh mihringin awm leh mawi tawk a tih baka sawi thiat kan ngai fo. Chuvangin kalphung pangngai baka danglamin a thawk thin a ni. Kan rama harhna thleng tawhte kan chhui kirin- khurhna te, tahna te, tawng pangngai ni lo tawng hriatloh te, taksa chetnate-in a thawk thin. Mihring chu lemchang nuna nung thin leh mawihawih zawn ching- thlarau lam theipui hnah thui chawp fen ching  kan ni. Chutiang nun chuan kan thatpui tur leh a tak ram min thlen zawh loh avangin, kan lemchanna leh hawihhawmna sawi thiatin, kawng hrang hrangin kan thinlung a tikeh thin a ni. Hei hian a maksak apiang a thlarau tihna a kawk lo. An mahni an inhria emaw, hre lo emaw, lem chang tam tak an awm thei bawk. Mahse a tak chu an tak  a ni mai. Thlarau Thianghlimin a tum chu thutaka min hruai luh hi a ni (Jn. 16:13). Chutianga Thlarau Thianghlim hnathawh danglam tak avang chuan, taksaa chetna emaw, thil danglam tak emaw dawng ve kher lotu pawhin ngaihvenna (curiousity) a lo neih phah a, Thlarau Thianghlim tan pawl theihin a lo awm phah thei thin.

 

3. Mihring nuna rah duhawm lo awmna bul a ni.

Mihring nuna ‘rah’ chu kan nun dan leh kan chetdan hi a ni. Kan lo pian thar hian Lal Isua nunzia chu kan zir tur leh kan nunpui tur a nih avangin, amah anna kawngah kan thang lian zel tur a ni. Chutih laiin thlarauva thanlenna kawngah duhtawk chin leh peih chin nei tlat kan awm fo. Mi piang thar tam tak chu kan luhlulna avang te, kan thatchhiatna avang te, kan chapona avang tein khawvel mite ang thovin kan nung a, kan rah hi a duhawm hlawl lo a ni. Thlarau Thianghlim  kan tivui a, kan tilungngai fo thin. Chutiang mite chuan Thlarau Thianghlim ‘khawih harh’ kan ngai em em thin a ni. Chutiang chu kan nih avangin thu-awihna kawnga kan intukluh theihna turin Thlarau Thianghlim chuan harhna boruakah taksa-ah emaw, thinlung lamah emaw min sawi (che) thin. Thu awi(h) na leh tlawmna hi kan rah theihna tura lei tha chu a ni a, Thlarau Thianghlim chuan harhna boruakah mi tamtak a titlawm thin a, Thlarau hruaia awm thei turin thuawihna kawngah a hruai thin a ni.

 

4. Rah danglam lo awmna bul a ni.

Farisaite leh lehkhaziaktute (Juda theologian-te) Lal Isuan a ngaihtheih lohna chhan ber chu mi dangte laka an rilru putzia vang a ni. Mite hmuha Dan thuzawm leh a tiha tihah chuan an tha – mahse hmangaihna leh khawngaihna dan thlawh khumin, an tihdikna chuan mi dangte an teh (judge) a, an teh tling lova, anmahni chu dik leh tha, mite chunga leng angin an inngai thin. Thlarau lam thilah hian kan hriat loh hlanin a lo chapo theih khawp mai! Harhna mamawh lova inhriat tlatna te hi thlarau lama chapona a ni. Thil tihsual langsar tak kan neih loh chuan tha thawkhata inngaih mai a awl fo. Thlarau chuan engkim a chhui chhuah thin avangin (cf.I Kor. 2:10) kan nihna leh kan ngaihtuah dan te hi a hre vek a. Harhna a thlenin mi mawl leh mi chuan hnuai te tete hi Thlarau Thianghlimin an mit tihvarsakin hruaitu mahni inhmu thei lote kaih harhna hmanruaah a hmang fo mai. Eng dang vang a ni lo – rah danglam, a hma aia tha an neih a duhsak vang a ni.

HARHNA RAH:

Mi tam tak chuan harhna hi simeikhu anga eng emaw changa lo awm, ral leh mai thin ang lekin kan ngai awm e. Thenkhat chuan min tiphurtu satliah ang lekin kan ngai thei bawk. Harhna malsawmna sira lemchang nun lo buaipui tawk kan awm bawk. Amaherawhchu ngun taka chhut chuan harhna changtute nunah rah duhawm tak tak a thleng thin. Kan sawi seng lo ang a, kawng hnih chauh lo sawi ila-

1. Thlarau Thianghlim lalna leh thuneihna a hriatchiantir:

Harhna boruakin a khawih harh ringtu chuan Thlarau Thianghlim a hmelhriat a, a lalna leh a thuneihna pawh a hriat chian phah thin. Thlarau Thianghlim chu Pathian a nihzia te, a nunah awmze nei taka hna a thawh dan te, zui tlak a nihzia te a hriat chian phah thin. Piang thar inti si, Thlarau Thianghlim hmelhriat lo a awm theih. Chutiang mite chuan Pathian chu van sang taka awm daih anga ngaiin, ral khat pathian angin an be thin. Lal Isuan a sawi lawk angin Thlarau Thianghlim chu kan chhunga awm a ni a, englai pawha biak mawlh mawlh theih a ni si! ( Jn. 14:17).

 

2. Thlarau Thianghlim chu a nela a hmang tangkai thiam thin:

Thlarau Thianghlim chu a hnena awm reng a ni tih a hriat chian avangin sual kawng zawh theihna lakah pawh amah chu a tih a, sual laka tanpuitu atan pawh a hmang tangkai thiam zual thin. Poul Yogi chuan Thlarau Thianghlim chu a thawhpui senior zawk (senior partner) angin a ngai a, a thil tih tur apiangah a pun thin a, hmu thei lo mahse a kianga awm ang chiahin a be mawlh mawlh thin. Thlarau Thianghlim chu sual kan nih min hriattirtu, Lal Isua hnena min hruaitu, Lal Isua min chawimawitirtu, he khawvel sual thima kalkawng min kawhhmuhtu, kan nun ngui leh chau min pawl harha min tichak thintu a ni.

Kan ramah hian Harhna ruahpui lo sur leh tawh se kan va ti em!

Posted in BCM News.

admin