HATIM-ah Day Scholar hawn remtih a ni.

July 28, 2020 (Thawhlehni) khan Sap Upa leh Pu Buanga Hall, Serkawn-ah Mizoram Baptist Kohhran Administrative Committee Meeting neih a ni a. He meeting-ah hian Higher and Technical Institute, Mizoram (HATIM) a Day Scholar hawn chungchang ngaihtuah a ni.

Meeting ah hian Higher and Technical Institute, Mizoram (HATIM) a Day Scholar hawn chungchang ngaihtuah a ni a. BCM Assembly-in Zirna sang zawk atana HATIM a hawn chu a tirte atangin residential college-a din a ni a. amaherawhchu tunlai kan hun tawng thlirin residential leh Day Scholar siam kawp a tulna chu BCM Education Committee leh Principal, HATIM atangin report dawn a ni a.

Principal, HATIM report atangin India ram pumah kum 2032 atang chuan College tinte hian zirlai 2000 aia tlem lo an neih a tul tawh dawn thu leh mahni college theuhin zirlaite hnenah degree an hlan theih tawh tur thu ngaihthlak a ni a. Nu leh pa tam takin an fate zir nan HATIM chu awt viau mahse hostel-a dah an tlin vek loh avang leh HATIM lamin Hostel accommodation an neih tam tawk loh avangin kum tinin zirlai pawh duh anga an lak tam theih thin loh thu ngaihthlak a ni bawk a ni.

Tin, July 27,2020 khan Mizoram chhunga private college Principal zawng zawng te chu Higher & Technical Education Minister-in kokhawmin, tunlai Covid-19 hrileng avanga zirlai tam takin Mizoram pawn lama College an pan theihloh avangin, zirlai engemawzat college admission changlo an awm avanga harsatna sut kian nan Private college ten a tam thei ang ber zirlai admission pe turin minister in a ngen bawk a.

Meeting chuan heng zawng zawng thlir chung leh ngaihtuah chungin, Education Committee-in kum 2020-2021 academic session atana HATIM-a Day scholar tana admission hawn an dilna chu remtih niin Assembly Executive Committee-ah report nise tih a ni.