Hospital centenary building sak tan thuai tum a ni.

July 28, 2020 (Thawhlehni) khan General Secretary Office-ah Kristian Hospital Centenary Sub-Committee  an thu khawm a. He Meeting hian Assembly, 2020-in Kristian Hospital kumza tlinna hriatrengna atan Hospital Centenary Building sak ni se ti-a a lo rel tawh bawhzuiin, hmalak dan tur an ngaihtuah a ni.

Meeting chuan, Kristian Hospital Building sak dan tur leh hmalak dan tur te ngaihtuahin, tuna OPD Buiding awm mek hi sak belh ni se, Assembly-in a rel angin Rs, nuai 500 senga sak puitlin tum ni sela, hna hi a rang thei ang bera  tan chhoh tum ni se an ti.

Covid-19 hrileng avanga khawvelin harsatna kan tawh mek karah BCM pawhin sum renchem a tul tih hre rengin, hmachhawptam tak a neih te an chawl deuh vek rih a. Hetih lai hian he building sak tura ruahman erawh hi chu Kohhran mite leh Hospital tan mawhmawhna a san em avang leh hun a tam tawh loh avanga hma lak thuai a tul avangin bul tan rawih ni se la, chhunzawm zel dan tur pawh theih ang ang kawng dap zel ni se an ti a. Hemi lo bawhzuia, hma lo la tur hian Medical Superintendent leh Property Manager te ruat an ni.

Kristian Hospital, Serkawn hi kum 1923, February 10-ah  khum 10 neiin Dispensary atangin Damdawiin pangngaiah hlan chhoh a ni a, tunah chuan khum 100 awmin Doctor leh Nurse te nen, thawktu 160 chuang an awm mêk a,  He Hospital atang hian Kristian Hospital, Lawngtlai chu din a ni a, Town Clinic, Falkawn-ah hawngin mumal taka kalpui a nih bakah a khat tawkin Community Health Clinic neiin Thingtlang khaw kilkhawr deuh deuhah an fehchhuak reng bawk. Hospital bakah hian, Nursing School changtlung tak neiin, College a upgrade tumin hma lak mek a ni bawk.