Hrileng avangin Bial Inkhawmpui, ABC leh Committee lian te neih a ni dawn lo.

Mizoram Baptist Kohhran, Administrative Committee Meeting, July 10, 2020-a neih chuan Covid-19 Hrileng avanga khawvel leh Mizoram dinhmun thlirin hmalam huna Inkhawmpui pawimawh FOD, Pastor Bial leh ABC te inkhawmpui neih chung chang te a ngaihtuah a.

Meeting chuan kan dinhmun leh boruak awm dan te ngaihtuahin Bial huap Inkhawmpui hrang hrang TKP, BMP, BKHP leh KNP inkhawmpui te, Pastor Bial Inkhawmpui leh Area Baptist Council (ABC) Inkhawmpui te chu kumin atan chuan nei lovin, Rorel chauh neih ni se tiin a rel a. Rorel palai tur pawh bithliah fel nghalin – ABC Rorelah hian ABC Executive leh Bial Office Bearers chin an palai ang a, Tualchung Kohhran atanga ABC Executive member awmlohna an awm chuan Kohhran Chairman leh Secretary te an palai thei ang. Bial Rorel-ah chuan Bial Executive leh Tualchhung Kohhran Puipate  (Office Bearers) leh FOD aiawh te an palai thei ang.

ABC hrang hrangin Kohhran Upa Nemngheh (Ordination) inkhawm an neih thin chungchang pawh thlir tel nghalin, “kumin-atan chuan ABC Executive-in remchang lo dapin tha an tih angin lo buatsaih se la, Ordain tur pakhat tan anmahni tawiawmtu (anchhungte) pathum (3) aia tam lo an tel thei ang”,  tiin thu a dah bawk.

Heng bakah hian Assembly Committee hrang hrang August thlaa neih thin te – Assembly Executive Committee Meeting, Central Committee Meeting, Service Committee Meeting leh Mission Committee Meeting te pawh kum 2020 atan thulh (Cancelled) vek a ni bawk.