I ram lo thleng rawh se

– Rev. VL Nithanga

“Kan pa, Vâna mi, i hming zahawm rawh se, I ram lo thleng rawh se. I duh zâwng vâna an tih angin leia min ti rawh se (Mt.6:9,10).

Thih hnua vân ram kaina tûr atân chauh ni lo, kan ram siam tha phâk Pathian thu kan sawi a hun ta a. Chu lam hawi chuan tûn tum pawh hi ka han sawi leh dâwn a ni. Kan ram siam tha phâk Pathian thu kan sawi dawn chuan, Pathian ram a lo thlenna tûr, Ram hnukpui pahnih hawi zâwngin ‘I ram lo thleng rawh se’ tih khi ka sawi dâwn a ni.

1. Mizoram politics-ah Pathian ram lo thlengrawh se:
Kan ram politics hi ram kalsiamna hmanrua ber a nih avângin a pawimawh a. Narendra Modi pawhin an Hindu pathian thu hmanga India ram hi New India tia siam that a tum a, ram pum a sawi nghin dul dul theih chuan, keini Mizoram, kristian ram hruaitu tûr tân pawh, Godly Leadership neichunga kan ram zîmtê hi New Mizoram siam tura Pathian thu atanga siam theih awm takah ka ngai. Mosia te, Nehemia te, Josua te, Davida te anga Godly leader kan la neih loh vâng mai mai a ni. Anni kha chu, an nun pumpui luahtu chu Pathian a ni a, chu Pathian thiltihtheihna hmang chuan Israel hnam pumpui tân kawng thar an siam a, tah chuan mipui an hruai a, ‘Change’ an siam a, dinhmun tharah an hlângkái thîn. Tichuan, an ram leh hnam inhruai dânah Pathian an dah pawimawh ber a, Pathianin hnam hruai dân tur a hrilh angin an ti a, hnam tân hlawhtlinna ropui tak a lo thleng thîn.

Kan ram politics khelh danah erawh hi chuan, kan Kristianna kan dah tha a, kan khelh chhan pawh Lalna leh thuneihna, ropuina leh hausakna a ni a. Kan hmanrua pawh, sum sem, vote lei, titau derte suma thlêm, unit hruaitu leh Bock hruaitute suma tihlungawi, sum hmanga mipui hlimhlawp siamte a ni a, chuvângin sum a ngai tam êm êm a, chêng nuai tam tak, a za têl, zahnih zathum hmangral theite hlawhtlin theihna ram a lo ni ta a, tlin hnuah sênso tam tak khuhna sum inhaivûr leh a lo tûl a, chu chuan corruption a tipung lo thei lo a ni. Dâwt leh inbumna chi hrang hrang nen, zu nêna inchiahpiah chungin, haw haw chungin politic tuinûah kanchêng a, piantharna da thak khawpin kan bei mai thîn zawng a nih hi. Kan kristianna, kan piantharna leh kan Pathian thu hian kan ram politics hi siam tha phâk tawh sela, Mizoram politics-ah hian Pathian ram hi lo thleng tawh se, kan va ti tawh tak êm!

2. Kan ram Economics-ah hian Pathian ram lo thleng rawh se:

Kan ram mipui tam ber, 70% vêl lai mai hian, sum kan hmuhna tûr a nih phawt chuan engmah kan pawisa lo, Kan piangthar nasa êm êm si a, mahse ei kan zawnna lamah chuan dâwt sawi kan hreh lo, mi bum kan hreh lo, ziah bo kan hreh lo, kuttling lova sum hmuh kan hreh lo, dik lohna chi tin reng pawh sum kan hmuh nân kan ti hreh lo. Thil tha lo leh sawkar phal loh zâwng pawh hausakna tûr chu tih kan hreh lo, kohhran suma rinawm thei te pawh sawrkar sumah chuan kan rinawm thei lo fo. Piangthar intite zingah hian Pathian duh dân ni chiah lo atanga sum hai lût thiam leh hai lût thîn kan va tam em! Piantharna da thak khawpin ei kan zawng leh a, sum kan inhaivûr leh si thîn.

Kan Economics-ah hian Pathian ram lo thleng tawh se kan va ti êm! Kan ram mipui 70% tal hi Pathian duh zâwng ang zêla sum pai zawng thîn, chutiang mi ni lo thei lo tûra Pathian luah khah tlat ni ta ila, kan ramah hian corruption a lo tlêm tial tial ang a, kan ram chu tih damin a awm zêl mai tûr. Mahse, chutiang mi chu tunah rih chuan 30% vêl chauh a la nih hmêl si a. Dik lohna hian min la khuh hneh rih deuh a ni e.

Kohhranah chuan Pathian ram a thlengah kan ngai ang a. Kohhranah chuan Pathian mi kan ni a, chumi te tho chu politics-ah leh economics-ah chuan tisa mi, dâwt sawi hreh lo kan nileh a. Pathianniah chuan ringtu tha tak kan ni a, Biak in kan pan dûl dûl a, chumi te tho chu Thawhtanni atanga Zirtâwpni thlengin, kan office-ah, Office dâwrnaah, sum dawnna hmunah, etc. tisa mi, bum tûr zawng, hlêprûk tûr mamawh kan ni leh tho a ni. Chuvângin, Mizoram kristian tam ber chu a chanvêin kan nung a ni. Pathian ram kan thlentîr dân hi a mual lamah kan then a. Kohhran mualah Pathian ram kan thlentîr viau laiin, Politics mualah leh economics mualah chuan kan la thlentîr si lo a ni. A mual lam kha a ni lo va, keimahni zâwk hi Pathian ram thlenna kan nih tak tak chuan, kohhran lama kan nih dân tho kha politics mualah leh economics mualah pawh kan nih dân tûr tho a ni asin maw le.