IMCC hruaitu ten BCM rawn tlawh

Indian Mission Coordination Committee hruaitu pahnih, Rev. Dr. Samaresh Nayak ,General Secretary leh Rev. Solomon Rongpi, Core Committee member leh General Secretary, CBCNEI ni bawk chuan Vawiin May 15,2019 chawhma dar 10:30 khan Mizoram Baptist Kohhran Headquarters Office, Serkawn rawn tlawhin BCM hruaitu te an rawn hmu. 

Mikhualte hi BCM General Secretary Rev. F. Ramdinmawia’n  a lo dawngsawng a. BCM President, Rev. Pc Lianduala, AGS i/c Mission, Rev. Dr. C. Vanlaldika leh AGS i/c Service Rev. R. Lalbiakliana te bakah Department Heads te nen Sap Upa leh Pu Buanga Hall-ah Inkawmhona hun tha tak an nei.

Heng mikhual pawimawh pahnihte hian October 3-6,2019 a Hyderabad a India Baptist Summit 2019 neih tur atan BCM an rawn sawmna leh India ram chhunga Baptist Kohhran inzawmkhawm pawl hrang hrang te inpumkhatna tha zawk kan neih theih nana he summit hi buatsaih a nih thu te rawn thlenin, BCM chu he hunah hian neitu chan changa tel ngei turin an rawn sawm a, BCM General Secretary Rev. F. Ramdinmawia pawhin mikhualte lawmna thu sawiin an thu rawn ken pawh tihhlawhtlin sak ngei an duh thu leh, a tul anga bawhzui a nih tur thu a sawi bawk.

IMCC and BCM Leaders

India Baptist Summit hi October 2-5, 2014 khan a vawikhat nan Nagaland-ah hlawhtling taka neih a lo ni tawh a. Hemi tum hian India ram hmun hrang hranga Baptist hruaitu an kal tha hle a. India rama mihringa sumdawnna lo hluar zel chungchanga inzirtirna tha zawk neih te, India ramah sakhaw zalenna vawn nun a nih zel theih nana hma lak te, Thalai te leh Hmeichhiate dinhmun chawsanna tura hma lak te an relin kawng hang hrangin an bawhzui  bawk a ni.

India Baptist Summit hi Indian Mission Coordination Committee(IMCC) buatsaih niin, IMCC hi American Baptist Missionary ten India rama Kohhran an phun te inthlunkhawmna a ni a. He pawlah hian Baptist Kohhran (Association) engemawzat an in thlung khawm a ni. IMCC chuan American Baptist te fahrin chauh ni lo, India ram puma Baptist chhungkua te inpumkhatna leh rawngbawlhona turin summit hi a buatsaih ta a ni. Tun tuma summit an neih tur hi a vawihnihna tur a ni.

Posted in BCM News.

admin

Leave a Reply