Isaac Rochunglura (Saktea) kan then ta

Mizoram Baptist Kohhran hnuaia Missionary, Pu Isaac Rochunglura (Saktea) s/o Rev C.Zatawna, Huto English School, Arunachal  West Field-a thawk chuan vanduaithlak takin May 10, 2021 (Thawhtanni) tlai dar 4:45 khan Covid-19 a vangin Ropuina ramah min haw san ta. Sakte-a hian a nupui, Mary Lalmuanpuii leh a fate  pahnih (Hmeichhia kum 5 mi leh nausen mipa thla 4 mi) a kalsan a ni.

Sakte-a hi April 27, 2021 atangin a khua te sik in a insawisel tan a, May 3 ah Covid-19 a positive tih hriat a nih rual in, Lekhi Village Covid Care Centre, an awmna atanga km 2 vela hla ah inenkawl turin a lut nghal a, a symptom in zia awm lam aia zual lam a pan zel avangin Oxygen pek theihna hmun Midpu Covid Care Centre-ah sawn a ni leh a, heta a awm hnu hian zawi zawi in hma a sawn chho hret hret a, May ni 10 zinglam ah khan amah Saktea hian a thawhpui te bia in Covid Care Centre atanga a chhuah theih thu te hrilh in,  in lama (Isolation) inenkawl chhunzawm tur in chawhma dar 10:30 khan an hruaichhuak ta a ni. Midpu Covid Care Centre an chhuahsan dawn hian amah hruaichhuaktu Pu F.Lallawmzuala (Vala) pawh in doctor te hmu in doctor pawh in in lama inkhunghrang (isolation)-a tha taka inenkawl chhunzawm tura lo chah in a that chhuah thuai a beisei thu te pawh alo hrilh a ni. Covid Care Centre atanga in an thlen hnu chawhnu  lam atangin a thaw a rawn hah leh a,  a nupui in a buaipui a, a hnu deuh ah an thawhpui te hrilh in, an ni hian a rawn chhuahsan Midpu Covid Care Centre ah bawk, a hruai chhuaktu Pu F. Lallawmzuala motor bawkin an hruai leh nghal a, Covid Care Centre an thlen hian thawktu ten a rang thei ang bera Covid Dedicated Hospital panpui vat tura an tih ang in, Ambulance in Chimpu Covid Hospital panpui lehnghal a ni a, Damdawi in an thlen hian doctor ten chhan tuma theihtawp chhuaha an beih hnu ah chhan theih ni ta lovin a kal ta mai a ni.

Sakte-a ruang hi Itanagar atangin May 10, 2021 zan dar 11:30 khan Mizoram rawn panpui a ni a, Arunachal atang hian Saktea nupui leh a fate pahnih bak ah a thawhpui te mi pali (4) in a ruang hi an rawn zui a, Guwahati atangin Saktea nu leh pa bak ah Guwahati Regional Director in an lo zui ve leh nghal bawk dawn a ni. Nunau leh kum lama upa te an nih hlawm avangin ruang hi duh ang in an rawn kal chakpui thei dawn lova, May 11, 2021  khawvar hma deuha Aizawl lo thleng tura beisei an ni a, thlanmual lamah tlangpui nghal in vuina inkhawm hi neih zui nghal a ni ang. Bungkawn thlanmualah vui a ni ang a.  Vuina Inkhawm hi Central Bialtu Pastor, Rev. T. Lalsangvunga’n a kaihruai ang a, Rev. Dr. R. Lalthanmawia, Executive Secretary, Aizawl Area-in a vui ang. Vuina Inkhawm-ah hian mi 20 chauh tel phal sak an nih avang in, chhungkhat tak ngial pawh tel kim a theih dawn lova, hemi a nih avang hian thenrual, chhungte leh kohhran hoten mahni hmun theuh atanga kan lo chhim theih turin BCM YouTube Channel ah Live Stream a ni ang.

Pu Isaac Rochunglura Chinzah hi Rev C. Zatawna leh Pi K. Sangkungi te inkarah Dt. 15th January, 1977 ah Dhubri, Assam ah a lo piang a, tunah hian kum 44-na a hmang mek a ni. Unau pianpui 4 neiin upa ber dawttu a ni. Amah leh a pianpui unaute te hi an upat dan indawt in Clement Vanlalduhsakzuala Chinzah  (H/O Lalremruatti ) Rbt. Isaac Rochunglura Chinzah (H/O     Mary Lalmuanpuii), Pro Pastor James Lalnunhlua Chinzah (H/O Hmingthanzami Chawngthu) leh Ruth Vanlalhlupuii Chinzah (W/O    Rev. H. Vanlalhruaia) te an ni. 21 May, 2015 ah Mary Lalmuanpuii nen BCM Biak In, City Church Aizawl ah inneiin fanu pakhat leh fapa pakhat; Suzzana Vanlaldinpuii Chinzah (kum 5) leh Casper Malsawmzuala Chinzah (thla 4) an nei a ni.

Zirna lamah lehkha thiam thei tak niin zirna lamah pawh a kaltluang hle a, HSLC hi Stewart School, Bhubaneswar atangin a zo a, PU (Arts) leh BA (Hons) hi St. Anthony’s College, Shillong atangin a zo a, MA (Eco) hi MZU, Mizoram atangin a zo a ni.

 

Pu Isaac Rochunglura hi Pastor leh Missionary chhungkua atanga seilian tih tak ah, a pumhluma rawngbawlna (Fulltime Ministry)-a a luh hma Shillong-a lehkha a zirlai atangin Kohhran ah thahnemngai taka tel thin leh Shillong TKP ah nasa taka inhmang thin a ni a, OB leh nihna pawimawh dang chelh reng thin a ni. Guwahati Mizo Baptist Kohhran ah  Rawngbawltu puitu atan 10/12/2002 ah ruat a ni a, 2/2/2009 ah Rawngbawltu ah ruat a ni leh a. 2005-a Missionary atana lak a nih hnu hian Guwahati ah tho awm nghal in, Thalai Kristian Pawl: Shillong Pastor Bial ah te hruaitu (Vice President: 2013-2015; 2015-2017) ni chho zel in TKP Guwahati Unit dintute zinga mi a ni. Guwahati ah hian Guwahati Mizo Welfare-ah pawh OB (Treasurer)  nihna te pawh lo chelh tawh in, Guwahati Mizo Welfare tan pawha thahnemngai taka inhmang thin a ni.

Saktea hian a Pa Rev. C. Zatawna (Pastor leh Missionary) rawngbawlna hnung zuiin a naupan tet atangin a phak ang tawkin a in hmang chho a, Dhubri (Assam) leh Guwahti ah kum engemawzat an awm atangin tawng dang (Hindi, Assamese, Bengali leh English) pawh pianpui tawng ang thova thiam a ni a, heng te avang hian a pa rawngbawlna ah pawh nasa takin a tangkai phah a ni. A pa rawngbawlna chhunzawma chhawm nung zel tur in kum 2005, April 1-ah Missionary atan lak a ni a, Guwahati Regional Office-ah Office Assistan hna a thawk a. Guwahati ah hian May 2017 thleng a awm hnu in, 2017 June thla ah AICS-ah Missionary Training (Diploma in Mission Studies) neiin, 2018 May thla thleng a awm a. Training a zawh hnu hian tuna a thawhna, Huto English school, Nirjuli, Arunachal West Field-ah Evangelist Teacher hna thawkin a awm leh ta a ni.

Sakte-a hi mi invawngfel leh taima, mahni hna-a inpe zo em em mai a ni a. A bula awm a nuamin a hahdamthlak em em a. Mi zaidam leh midangte ngaihsakna ngah tak, a theih ang ang a mi dangte tana inpe leh mi thilphal a nih avang hian ngainatu leh thiantha pawh a ngah hle a. Chuti chung chuan mi aia lansarh hlau leh mi inngaitlawm tak a ni tlat lawi si a. Mi thawm na lo tak a nih rual in mi hlim thei leh fiamthu duh tak a ni a, a thiante leh a rawngbawlpui te ngaihnat pawh a hlawh hle a ni.

Chhungkaw ngaipawimawh em em mi a ni a, hetia a natna avanga enkawl a nih lai pawh hian a khat tawka a nupui leh a fate biak reng duh leh ngai em em a ni a. Tin, an unau zinga upa ber Pu Clement Vanlalduhsakzuala (Mama) hi tawngtheilo bengngawng a nih avangin Saktea hian a u Mama thachang hi a dawl zo hle a, nu leh pa kut ke ber ni in chhungkaw innghana a ni a. Nu leh Pa thuawih tak an thu hnial zen zen lo a nih avang in Nu leh Pa tan pawh rin rawl loh theihloh a nihna chen a awm a, Unau zingah upa ber chan changin a unaute zawng zawng kilkawitu a ni.

Sakte-a thihna hian Mizoram Baptist Kohhran pumpui a fan chhuak nghal a, a chanchin hria apiangin an lainatin an sun takzet a a ni. Thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin thlah liam a ni dawn ta a ni. A kalsan, a nupui fanau, a chhung te leh a rawngbawlpui zawng zawng te Lalpa’n thlamuanin awmpui zel rawh se.
“A mi thianghlimn thihna chu LALPA ngaih chuan hlu tak a ni”

A kalsan, a nupui leh fa te
Thlahna Programme

Isaak-a Chanchin tlangpui