Baptist Covid Care Centre hawn a ni ta.

Tun kar Nilaini, July 28, 2021  chawhnu dar 2:00 khan Baptist Covid Care Centre (BCCC), Ramzotlang, Serkawn a buatsaih chu BCM President Rev. Dr. V. Laldingliana’n a hawng.

Baptist Covid Care Centre hawnna hi Rev. Dr. C. Vanlaldika, AGS (Mission) in a kaihruai a,  Rev. F. Ramdinmawia, General Secretary in thu sawi in, kan ramin Covid hripui avanga harsatna kan tawh laia, hetiang a  Baptist Covid Care Centre din a lo ni ta chu lawmawm a tih thu leh hemi atana phalna petu Mizoram Sorkar leh Lunglei DC chung-ah lawmthu a sawi a. Kohhrana pawl (Fellowship Department) leh mi mal thahnemngai te atanga BCCC din nana sum leh buangrua thawhtu zawng zawng chungah lawmthu a sawi bawk.

BCCC hi Administrative Department enkawlna hnuaia awm tur a nih thu leh Internal Administration erawh chu Director, Medical & Health Department enkawlna  hnuaia awm a nih tur thu  a tarlang bawk.

Upa Dr. Lalramzauva, Director, Medical & Health Department-in report pe-in, BCCC ah hian bul tan nan Doctor 1 leh Nurse 3 dah an nih tur thu leh khum 24 ruahman phawt a nih thu leh mamawh dan azira khum 35 thlenga dah belh theih a nih thu a sawi a, BCCC Office enkawltu tur 2 leh thawktu dang 6 dah an nih tur thu a sawi bawk.

Rev. Dr. V. Laldingliana, BCM President-in BCCC hawnna a neih hnu-ah Rev. R. Lalbiakliana, AGS (Service)-in Pathian hnenah a hlan a,  Rev. KV Thanga’n Malsawm tawngtaina-in programme a khar.

BCCC hawn ni hian damlo admit nghal a ni rih lo va. Thil tul leh pawimawh hrang hrang tihfel ngai la awm te tihfel a nih hnu-ah damlo admit theih a ni ang.