KANGMEI CHUNGCHANGA KOHHRAN MIPUITE HNENA NGENNA

A hmasain kan Lalpa Isua Krista leh Lunglei District Fire Prevention Committee hmingin chibai ka bûk a che u.

Khua a lo thâl leh tain kângmei laka invên kan mamawh leh ta hle mai a. Siamtu Pathianin kan Ramngaw, Thing, Mau leh Nungcha tinrêngte kawng hrang hranga suatna ber kan rama kângmei chhuak thîn tihtâwp hi siamtu Pathian laka kan bat a ni tih hriat tlân theuh hi a pawimawh êm êm a ni. Thing leh Maute hi kan nunna hnâr, boruak tha te, tui tlan tûrte leh ni tina kan khawsakna kawnga kan mamawh tinrêngte min petu an ni a, kan ramngawte ti kâng lo tûra theihtâwp chhuaha hma la theuh tûrin kan inngên a ni.

Ram kâng laka kan lo fihlîm zâwk nân Mizoram sawrkâr chuan Lo leh Huan vât te chu March ni 15 hma ngeia hâl vek tûrin thupêk a chhuah a. He thupêk hi Lo leh Huan hâl tûr neite chuan zâwm theuh tûrin kan inngên a, meilam pawh tha taka sial tûr a ni. Sawrkâr chuan kângmei tichhuaktute leh kângmei chungchânga sawrkâr thupêk zâwm lo te chungah chuan zahngaihna lantîr a tum dâwn lo va. Chuvângin kohhran mipuite pawh fîmkhur theuh tûrin kan inngên bawk a ni.

Ramngaw kan ti kâng lo a nih chuan keimahni tân bâkah kan tu leh fate tân ram kan humhalh a ni a. Ram ti kângtu chuan hnam a timualphovin, ram hmêl a ti bâl a, ram ti kangtu chu ram hmêlma a ni.

Kângmei laka kan lo fihlîm nân mipuite fîmkhur theuh ila, kângmei chhuak tûr vên chungchângah pawh theihtâwp chhuah a, hma la theuh tûrin kan inngên nawn leh a ni e.

 

Sd/-
(C. LALTHANKIMA)
ACF For Divisional Forest Officer and Member Secretary
District Level Fire Prevention Committee
Lunglei District, Lunglei.

He ngenna hi Tualchhung kohhranah a hranin thawn a ni lova, Forest Department hotuten mipuite min ngenna hi kohhran miten ngai pawimawhin zawm tum theuh ila, Pathiani zing inkhawmah emaw, a remchan danin Kohhran mipui hnenah chhiar chhuah theih ni se a lawmawm hle ang.

Sd/-
REV.F.RAMDINMAWIA
General Secretary
Baptist Church of Mizoram

Posted in BCM News.

admin