Khawvel SS Ni – November – 5

Tunkar Pathianni, November ni 5, 2017 hi khawvel Sunday School Ni a ni a, he Ni hi Mizoram Baptist Kohhran chuan urhsun takin a hmang leh dawn a. Pathianni zing Inkhawmah “Pathian Thu, Nun kawng êntu” tih thupui hmangin thuchah ngaihthlak a ni ang a, Headquarters atanga thuchah chhiar tur buatsaih sa chu Kohhran tinah chhiar chhuah a ni bawk ang. Sunday School Department hrang hrang atangin Items – Zaipawl, Changvawn sawi, Solo leh Group zai te nei thei tura beisei an ni bawk.

……………………

THU CHHIAR TUR.

Sunday School kan neih dân:

Sunday School hi kum 1780-ah khan England rama Gloucester-ah Robert Raikes-an a din a. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School a lo ding a. Chumi hnuah Sunday School Society tia thlâk a lo ni leh ta a ni. Sunday School hi Chanchin Tha hrilhna hmun pawimawh tak a ni tih hriain India ramah pawh kum 1800 khân Baptist Missionary Wiliam Carey-a te thian zaho khân Sunday School an din ve ta a ni. Sâp Upa leh Pu Buanga’n January 11, 1894-a Mizoram an lo luh hnuin March 1, 1896-ah Aizâwl-ah Sunday School chu an lo din ve ta a. Chu chu BCM-in kan rama Sunday School din niah kan pawm a. Mizoram chhim lamah chuan kum 1902-ah Tv. Thankûnga hovin an din ve leh ta a ni.

 

Khawvêl Sunday School Ni:

Khawvêl Sunday School Ni dintu chu Dr. George W. Bailey, America (USA) mi niin, Sunday School rawngbawlnaa mi pawimawh tak a ni. Kum 1907 khân Khawvel Sunday School Ni, Rome khawpuiah an lo hmang tawh a. Kum 1910 khân World Sunday School Association-ah President atân thlan a ni. Hemi kum May 22, khan Washington khawpuiah Khawvêl Sunday School Ni hi ropui takin an hmang a. India ramah chuan November Pathianni hmasa ber hi Khawvel Sunday School Ni atân kan hmang a. Mizoram Baptist Kohhran hian kum 1939 atangin tûn thlengin Khawvêl Sunday School Ni hi India ram hmun danga mite rualin kan hmang ve ta zêl a ni.

Sunday School hian kohhranah hmun pawimawh tak a luah a. Tûnah pawh hian kohhran a din rualin Sunday School a ding nghal zel tih theih a ni. Kum 1904-a Sethlun-a inkhâwmpui chuan, “Kohhran din tawhnaah chuan Sunday School hi awm zêl rawh se” tiin an rêl a ni. Vawiin Khawvêl Sunday School Ni-ah hian kohhran mite Sunday School ngai pawimawh theuh tûrin kan inngên a, kan Sunday School thupui ber chu “Zir la, Nunpui rawh” tih a nih angin Pathian thu hi zirin, nunpui i tum theuh ang u. Nun Kawng êntu a ni si a.

Related links :
1.Zir la, Nunpui
2.SS chanchin tlangpui leh report

Posted in BCM News.

Leave a Reply

Your email address will not be published. Required fields are marked *