Khawvel SS Ni hmang dawn

Tunkar Pathianni, November ni 3, 2019 hi khawvel Sunday School Ni a ni a, he Ni hi Mizoram Baptist Kohhran chuan urhsun takin a hmang leh dawn a. Pathianni zing Inkhawmah Pathian thu Thimna tiengtu” (II Samuel 22:29) tih thupui hmangin thuchah ngaihthlak a ni ang.

Headquarters atanga thuchah chhiar tur buatsaih sa chu Kohhran tinah chhiar chhuah a ni bawk ang. Hetiang hunah hian Kohhran tam zawkah chuan Sunday School Department hrang hrang ten Zaipawl, Group zai leh recitation te an nei thin a, Sunday School zirlai pangngai zir lovin hemi bik atana zir tur buatsaih chu zir thin a ni.

Sunday School hi kum 1780-ah khan England rama Gloucester-ah Robert Raikes-an a din a. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School a lo ding a. Chumi hnu lawkah chuan Sunday School Society ti a thlâk a lo ni leh ta a ni.

Khawvel hmun hrang hranga Sunday School rawngbâwlna a lo darh zau zêl hnu chuan missionary, ram danga kal chhuakte pawhin Sunday School hi Chanchin tha hrilhna hmanraw pawimawh berah an neih ta zêl a. India ramah pawh kum 1800 khân Wiliam Carey-a te thian zaho khân Sunday School an lo din ve leh ta a ni.

January 11, 1894-ah Mizoramah missionary hmasa ber Sâp Upa leh Pu Buanga an lo thleng a. Anni pawhin Sunday School ngai pawimawhin kum 1896-ah Aizâwl-ah Sunday School chu an lo din ve ta a. Mizoram chhim lamah chuan kum 1902-ah Tv. Thankunga (a hnua Tirhkoh leh Pastor lo ni ta) chuan Sethlun-ah Sunday School chu a din ve leh ta a ni.

Posted in BCM News.

admin

Leave a Reply