Khawvel  Sunday School Ni – November 1

Tunkar Pathianni, November ni 1, 2020  hi khawvel Sunday School Ni a ni a, Kumin Khawvel Sunday School Ni thupui chu “Pathian thu, nung leh thiltithei (Hebrai 4:12) tih a ni ang.

Kum dangah chuan he Ni hi Mizoram Baptist Kohhran chuan kohhran tinah Pathianni chawhma inkhawm ah thupui thlansa hmangin urhsun takin a hmang thin a. Tualchhung Kohhran Sunday School Department thenkhat atangin Special Item te neiin, inkhawm programme hlimawm tak neih thin a ni. Hemi ni hian Sunday School lamah pawh Khawvel Sunday School Ni puala zir tur buatsaih te zir thin a ni bawk.

Kuminah erawh chuan Covid-19 hrileng avanga Kohhran Programme te hman theih a ni dawn lo va, chutih rual erawh chuan Christian Education department hruaitu te chuan he ni pawimawh bikna te hre renga, chhungkua ah Sunday school hlutna te inzirtira a theih anga Sunday school pawimawhna inzirtir thar nana hmang tur leh TV leh Youtube kal tlanga Khawvel Sunday School Ni puala Sunday School zirlai te Department tin tana buatsaih chu lo hmang tangkai turin a ngen a ni.

Mizoram Baptist Kohhran Sunday School inchhiarna 2019-2020 in a tarlan danin Sunday School hming ziak zawng zawngnhi 125,707 an ni a, Kohhran member kum 4 chin chunglam atanga lak-in hming ziak percentage chu za zela 80.82 a ni.

…………………………………………………………………………………….

Khawvêl Sunday School lo intan dân:

Sunday School hi kum 1780-ah khan England rama Gloucester-ah Robert Raikes-an a din hmasa ber a. Hei hi lo thang lian zêlin Sunday School a lo pung chho ta a. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School a lo ding a. Chumi hnu lawkah chuan Sunday School Society tia thlâk a lo ni leh ta a ni.

India rama Sunday School lo intan dân:

Khawvel hmun hrang hranga Sunday School rawngbâwlna a lo darh zau zêl hnu chuan missionary, ram danga kal chhuakte pawhin Sunday School hi Chanchin |ha hrilhna hmun pawimawh berah an neih ta zêl a. India ramah pawh kum 1800 khân Baptist missionary Wiliam Carey-a te thian zaho khân Sunday School an lo din ve leh ta a ni.

Mizorama Sunday School lo intan dân:

January 11, 1894-ah Mizoramah missionary hmasa ber Sâp Upa leh Pu Buanga an lo thleng a. Anni pawhin Sunday School ngai pawimawhin kum 1896-ah Aizâwl-ah ngei Sunday School chu an lo din ve ta a. Chu chu BCM-in kan rama Sunday School hmasa berah kan pawm a. Mizoram chhim lamah chuan kum 1902-ah Tv. Thank<nga (a hnua Tirhkoh leh Pastor lo ni ta) chuan Sethlun-ah Sunday School chu a din ve leh ta a ni.

Khawvêl Sunday School Ni hman tan dan:

Khawvêl Sunday School Ni dintu chu Dr. George W. Bailey a ni a. Ani hi America (USA) mi niin, khawvêl puma Sunday School rawngbawlnaa mi pawimawh tak a ni. Kum 1907 khân ama huaihawtin khawvêl pum huap Sunday School Ni, Rome khawpuiah an lo hmang tawh a. Kum 1910 khân World Sunday School Association-ah President atân thlan a ni a. Chumi kum May, 22 chuan Washington khawpuiah khawvêl Sunday School Ni hi ropui takin an hmang a. Tunah chuan khawvel hmun hrang hrangah Sunday School Ni hi kan hmang ta hlawm a ni. India ramah chuan November Pathianni hmasa ber hi khawvel Sunday School Ni atân kan hmang a. Mizoram Baptist Kohhran hian kum 1939 khân All India Sunday School Union hi kan zawm a, chumi hnu chuan Christian Education on Evangelical Fellowship of India (CEEFI) zawmin, kum 2009 khân All India Sunday School Association kan zawm ve a. Tichuan, t<n thlengin khawvêl Sunday School Ni hi India ram hmun danga mite rualin kan hmang ve ta zêl a ni.