Khawvel Sunday School Ni

KHAWVEL SUNDAY SCHOOL NI

November Pathian ni hmasaber

 

Khawvêla Sunday School lo intan dân:

Sunday School hi kum 1780-ah khan England rama Gloucester-ah Robert Raikes-an a din hmasa ber a. Hei hi lo thang lian zêlin Sunday School a lo pung chho ta a. Kum 1785 khân kohhran hrang hranga Sunday School chu inzawm khâwmin pâwl hmasa ber, Society for Promoting Sunday School a lo ding a. Chumi hnu lawkah chuan Sunday School Society tia thlâk a lo ni leh ta a ni.

India rama Sunday School lo intan dân:

Khawvel hmun hrang hranga Sunday School rawngbâwlna a lo darh zau zêl hnu chuan missionary, ram danga kal chhuakte pawhin Sunday School hi Chanchin Tha hrilhna hmun pawimawh berah an neih ta zêl a. India ramah pawh kum 1800 khân Baptist missionary Wiliam Carey-a te thian zaho khân Sunday School an lo din ve leh ta a ni.

 

Mizorama Sunday School lo intan dân:

January 11, 1894-ah Mizoramah missionary hmasa ber Sâp Upa leh Pu Buanga an lo thleng a. Anni pawhin Sunday School ngai pawimawhin kum 1896-ah Aizâwl-ah ngei Sunday School chu an lo din ve ta a. Chu chu BCM-in kan rama Sunday School hmasa berah kan pawm a. Mizoram chhim lamah chuan kum 1902-ah Tv. Thankunga (a hnua Tirhkoh leh Pastor lo ni ta) chuan Sethlun-ah Sunday School chu a din ve leh ta a ni.

 

Khawvêl Sunday School Ni:

Khawvêl Sunday School Ni dintu chu Dr. George W. Bailey a ni a. Ani hi America (USA) mi niin, khawvêl puma Sunday School rawngbawlnaa mi pawimawh tak a ni. Kum 1907 khân ama huaihawtin khawvêl pum huap Sunday School Ni, Rome khawpuiah an lo hmang tawh a. Kum 1910 khân World Sunday School Association-ah President atân thlan a ni a. Chumi kum May, 22 chuan Washington khawpuiah  khawvêl Sunday School Ni hi ropui takin an hmang a. Tunah chuan khawvel hmun hrang hrangah Sunday School Ni hi kan hmang ta hlawm a ni. India ramah chuan November Pathianni hmasa ber hi khawvel Sunday School Ni atân kan hmang a. Mizoram Baptist Kohhran hian kum 1939 khân All India Sunday School Union hi kan zawm a, chumi hnu chuan Christian Education on Evangelical Fellowship of India (CEEFI) zawmin, kum 2009 khân All India Sunday School Association kan zawm ve a. Tichuan, tun thlengin khawvêl Sunday School Ni hi India ram hmun danga mite rualin kan hmang ve ta zêl a ni.

Sunday School pawimawhna:

Sunday School hian kohhranah pawimawhna a nei lian hle a. Kohhran a din tawh chuan Sunday School hi a ding nghal zêl tawh a. Kum 1904-a Sethlun-a kohhran inkhâwmpuiah chuan, “Kohhran din tawhnaah chuan Sunday School hi awm zêl rawh se” tih an lo rêl tawh a. Tunah pawh hian Biak In kan sak rualin Sunday School Hall pawh kan ngaihtuahnaah a lang nghâl mai thin. Rev. Dr. V. Lalzawnga’n Sunday School pawimawhna a sawi thinah chuan, “Sunday School hi Mizote thiamna min petu, Kohhran dinhmun tinghettu, Kohhran ban a ni” a ti thin a. Tunah pawh hian kan Sunday School thupui ber chu “Zir la, Nunpui rawh” tih a ni.