KISTIAN CHHUNGKAW CHAWLHKAR THUZIR

ZIRALAI 4-NA : KRISTIAN CHHUNGKUA DIN THAR LEHNA
CHHUNGKAW MAICHAM

Kristian Chhungkaw Chawlhkar (May 10-16, 2021) thuzir Rev. C. Lalhungliana ziak mahni hmun atang theuha kan lo zir theih tur in kan rawn chhawp chhuak e. Thuzir kaihruaitu hi C. Lalhmachhuana a ni.

Chhiar tur: Maichamah mei a nung reng ang a, a mit tur a ni lo. (Leveticus 6:13)

Kristian chhungkaw din thar lehna tura pawimawh em em chu chhungkaw maicham tih nun reng hi a ni. Chhungkaw maicham hi a pawimawh em avangin zirlai hranin tun tumah hian kan zirho dawn a ni. Chhungkaw maicham tih hian chhungkuaa Pathian biakhona neih tih nen hian thuhmunin a sawi theih awm e. Min siamtu Pathian a nih avang leh a phu êm avanga zah leh tih chunga a hmaa kûn a, chibai bûkna neih hi Kristian chhungkaw tih makmawh a ni.

1. Chhungkaw maicham tobul: Eden huana chhungkaw hmasa berte kha Pathian nena inpawl thin chhungkua an ni a. Sualin Pathian nena an inpawlna a tihchahsak veleh chhungkua chu a keh chhe zo ta a, Eden huan atangin Pathianin a hnawt chhuak ta tih kan hria a. Chutichuan chhung inkhawm chu Eden atanga lo intan a ni kan ti thei ang. Pathianin chhungkua chu amah nena inpawl thin turin a din a, an zingah chhungkaw hotu ber nihna hauhin a chenpui a. Chuvangin Pathian pawl ngai lo chhungkua chuan chhungkaw din chhan a hloh a, a dintu a do va, a tawpah a keh chhe nge nge thin. Chhung inkhawm tobul hi a ril hle a, mihring thahnemngaihna avanga so phut a din a ni lo a, Pathian remruat a nihna hi chhung inkhawm pawimawhna chu a ni. Eden bawhchhiat hnuah khan Pathian be thin Nova a lo lang nawlh a, an chhungkua chuan Lalpa tan maicham siamin chhung inkhawm chu an rawn din thar leh ta (Genesis 8:20). Chuta tang chuan chhungkaw maicham chu Abrahama te, Isaka te, 12

Jakoba te chuan an rawn siam chho ta zel a. Chhungkaw maicham an ngaih pawimawh avangin an thlahte zel pawhin an in rochun ta zel a ni. Nu leh pate hian chhungkuaa Pathian biakho hi ngai pawimawh hmasa phawt ila, kan tu leh fate pawhin an rawn ching ve zel ang.

2. Chhung inkhawm awmzia: Pathian thil ruahman dan hi a fel hle a. Mi mal a siam a, chhungkuaah a hlawm khawm a, Kohhran ropui tak a din leh a, van lam nen a thlun zawm vek a. Amah kan biak dan turah pawh mi mal leh a huhova biak tur a nihzia kan Bible-ah pawh a lang tam hle a. A huhova biaknaah hian kohhranten biak ina Pathian kan biak hi chu a larin kan ngai pawimawh hle a. Chutih laiin chhungkuaa Pathian biakhona hi chu a awmzia kan la man lovin kan ngai pawimawh teh chiam lo hle. Mi mal, chhungkua leh kohhran hi hruizen pathum inherh anga tangrual leh inzawm tlat tur a ni a. Amaherawhchu chhungkaw zâwnah hian a chah thin avang hian sualin Pathian mite min khawih fo mai. Hei tak hi kan din thar a va tul em!

3. Chhung inkhawm neih tulna: Chhungkuaa Pathian biakhona neih hi a tul takzet a ni. Chhung tin hian Pathian hi kan mamawh a, a tel lovin kan awm thei lo; Pathian kan pawlna leh aman min rawn pawlna hun, chhung inkhawm neih hi Kristian chhungkua chuan kan mamawh piah lamah a bata kan bat a ni. A tulna tawi te point hnih lekin i lo zir teh ang.

3.1. Pathian kan mamawh avangin: Tunlai khawvelah hian natna mak tak tak leh hri hlauhawm tam tak a pung a, a huhoa chhiat rupna a thleng reng a, accident avanga thihna rapthlak leh thihna danglam tak tak ten min hual vel a. Hetih lai hian chhungkaw tinte hian tu nge kan mamawh ber ang? Pathian chauh hi kan mamawh a ni. Manganna vawr tawp kan thlen meuh chuan kan sumin min chhan thei tawh lo, thiamna leh finnaten hlimna min pe thei tawh lo va, Lalpa bawk hi kan koh a tul leh thin. Covid 19 hri lêngah pawh hian khawvel ram ropui chu innghahna tlak a nih lohzia a chiang hle bawk. Chhungkaw tinte hian Lal Isua hi chhandamtu atan chauh ni lovin, roreltu atan kan mamawh a ni. Kan mamawh em avang hian chhungkaw tinte hian amah hi kan biak pawh reng a tul a ni.

3.2. Chhungkaw ven himna atan: Tunlai kan ram Kristian chhungkaw tam tak chu sualin min luh khung a, chhungkua kan veng him thei ta meuh lo e! Chhungkua ven him kan tum dan hi kan in enfiah a va tul em. Zir thiamna hmangin chhungkua kan veng him thei lo va, zirtu nun pawh a tuka boral mai thei a ni si a. Lalna leh thuneihna kan channa hian chhungkua kan veng him thei lo va, sumin kan vêng him zo hek lo. Eden huana chhungkua rawn beia tichhetu khan Kristian chhungkua hi a rawn bitum a. Adama leh Evi pawh kha an awm dun lai khan a rawn bei lo, an awm hran lai khan Evi kha a rawn hneh ta mai a ni. Keini pawh chhungkuaa Pathian biakhona kan ngaihthah a, kan awm darh thin avang hian mi mal min hnehin, chu mi hmang chuan chhungkuaah sual a lo lut thin. Chuvangin chhungkuaa Pathian biakhona leh tawngtaina hmang hian ni tinin van lam thlun zawm ila, chhung inkhawm hmangin tihlawhtling bawk ila, sual lakah kan chhungkaw himna tur a ni.

4. Chhung inkhawm hlutna: Chhung inkhawm hlutna hi sawi tur a tam hle a; mahse kan sawi vek seng lo vang. Chhung inkhawm hlutna hi hre chiang ila chuan heti tak hian chhungkaw tam tak hi chu kan rum lo ang. Tun tumah hian tlêmte lo tar lang ila.

4.1. Diabola dodalna a ni: Chhung inkhawm neih hi setana huat ber te zinga mi a ni a. Kristian chhungkua chu sual hmelma nei kan ni tih kan sawi tawh a. Kan hmelma setana dodal tura kan infuihna hun pawimawh tak chu chhungkuaa Pathian biakhona kan neih hi a ni. Kan hmelma setana dodal tura kan infuihna hun a nih avangin chhung inkhawm neih hi a tulin a hlu tak zet a ni. Setana dodal tura in koh khawmna chang hre lo chhungkua chu an keh chhe thuai thin. Diabola dodal nan chhungkaw maicham hi tun tum Kristian chhungkaw hapta kan hman atang hian chhung inkhawm nei tha thei tawh loten Setana dodal nan chhung inkhawm hi i din thar leh ang u.

4.2. Tu leh fate tan a hlu: Thufing pakhat chuan, “Naupang chu Pathian biak dan zirtir thiam la, thil dang chu Pathianin a zirtir tawh mai ang,” a ti a, a dik hmel hle mai. Kan tu leh faten hlauhna leh harsatna te, hlawhtlin hun te an tawh laia nu leh pa hming aia Pathian hming lama an tawngtai theih chuan, chu aia ro hlu chu kawl hlen tur an nei lo a ni. Kan tu kan fate hi sualnain lo hruai bovin hmun hlaah an awm mek a ni mai thei e. Nimahsela chhungkaw tawngtai hona hmun atanga kan tawngtaisak tlat chuan lo kir hun an nei ngei dawn a ni. Fapa tlan bo pawh tawngtaina hruia thlun tlat a nih avangin a lo kir leh kha. Chhung inkhawm hmangin kan fate i thlung tlat ang u.

4.3. Ram leh hnam tan a hlu: Ram leh hnam pian chhuahna bul chu chhungkua hi a ni. Kristian chhungkaw tha kan neih chuan ram leh hnam kalsiam a dik ang a, Kohhran bêl duh lote pawhin an rawn bel ang. Kristian chhungkua kan ngaihthah chuan kan ram leh hnam chu lungphum nei lovin a tlu chhia ang. Chuvangin chhungkuain sual kan do na tura tan kan lakna ber chhung inkhawm hi ram hruaitute, khawtlang hruaitute pawh hian an ngai pawimawh tur a ni. Henry Grady-an USA rorelna inpui CAPITOL chu a tlawh a, “Hei hi maw Pathian mit hmuha kan ram leh hnam pian chhuahna bul chu,” tiin ngaisâng leh zah takin mittui tla chungin a thlir a. A hnu rei loteah thingtlang chhungkaw pakhat a tlawh a, chu chhungkua chuan chaw an ei dawn a, nu leh pa tirh ngai miah lovin naupangho chu chhuatah thingthiin an tawngtai a, a sirah an nu leh pate chu thingthiin van lam hawia bân pharin an tawngtai bawk a. Henry Grady chuan ropui a ti hle mai a, “E khai, kan ram leh hnam ropuina chu kan rorelna in lian (capitol) khu emaw ka lo ti a, ka va lo hre sual em! He thingtlang khuaa chhungkaw mâwl tê tê, Pathian hmaa tawngtaia thingthi thinte hi hnam ropuina bul chu a ni tih ka hre ta,” a ti ta hial an ti. Communist rama Kristian chhungkaw pakhat Kenchick-a te chhungkua pawh chhungkaw inkhawm an neih thin chu communist sipaite chuan huain cheng singkhat an chawi tir a. Kenchik-a chuan sim a hnekin, “Chhungkuaa Pathian biakho hi a va hlu em! Communist-ho pawhin a hlutzia an hria a, vawi khat chhung inkhawm hi cheng singkhat hu niin an hria a ni. Tun atang chuan ni tin vawi hnih kan nei ziah tawh ang,” a ti.

4.4. Chhungkaw tana lungawi thiamna: Chhungkua zawng zawng hian vanduaina leh malsawmna kan tawk fo thin. Chung hunah chuan chhungkuaa Pathian beho thinte chuan vanduaina anga langah pawh Pathian thu atangin an nun an her rem a, lawm thu an sawi thei a; tin, malsawmna pawh dawng se, lâwm dân an thiam thin. Pathian nena inpawl ngai lo chhungkua chu vanduainaah Lalpa an dem a, lawmna ngei ngei turah pawh an phunnawi fo thin. Chhungkua hian lawm zel kan duh chuan chhung inkhawm hi kan neih thin a tul tak meuh a ni.

…………………….

 

May 12 : Nilai zan

ZIRLAI 3-NA :  KRISTIAN CHHUNGKUA DIN THAR LEHNA

Chhiar tur:Nehemia 2:17

Kan chan a chhiatzia hi in hmu a, Jerusalem a ram tih te, a kawngkharte a kang tih te pawh in hria a: hawh u, sawi chhiat kan nih tawh loh nan Jerusalem kulh chu i din leh ang u,” ka ti a.

Thimin êng kan mamawhzia min hriattir ang hian tunlai kan ram Kristian chhungkaw natna hian chhungkaw din thar a tulzia min hriattir awm e. Nehemia’n Jerusalem bang a siam that leh lai khan bang pawpah khan Pathian fate nupui fanaute leh an in leh lote bei turin hmelmate an lo lut a nih kha. Nehemia khan, “…in unau te, infapa te, in fanu te, in nupui te, in in te hum turin bei ru,” (Nehemia 4:14) tiin a fuih a, an beih let chuan Pathianin a beihpui tur thu pawh a hrilh a nih kha. Tun hunah hian keini pawh kan chhungkaw kulh bang chim din thar tura kan beih hian Pathianin min pui ngei dawn a ni.

Khawi atangin nge din tharna hna kan tan ang

  1. Inneihna: Inneihna hi Pathianin a dah pawimawhzia hi kan in zirtir a ngaiin, pulpit tlang atanga kan sawi tam a tul takzet a ni. Kan Bible bu hmasa ber Genesis-ah inneihnain Lalpa’n bul a tan a, inneihna bawk, Beram no nupui neihnain a bu tawp ber Thupuan a titawp a. Tin, Isua Krista’n a thiltihtheihna a lantirna hmasa ber kha Kana khua inneihnaah a ni. Heng atang ringawt pawh hian inneihna hian Pathian rilru a luahzia a tilang chiang hle. Kristiante inneihna chu thil pali insuih fin a ni a, chungte chu – mipa, hmeichhia, Kohhran leh Pathian an ni. Mipa leh hmeichhia ngei induh tawnna chu palai hmanga sawi rem niin, Pathianin pumkhat ni hlen tura kohhran kaltlanga a suihfin hi inneihna chu a ni. “Pathianin a zawm tawh chu mihringin then suh se,” a tih hian nupa chu pumkhat a nihzia a lang (Mt.19:6). Nupui pasal neih duh si, Kristian dana inneih duh lo chuan inneihna hi a buk thelhin an thelh a ni. Tin, kohhran hi Pathian hminga inneihna buatsaihtu a nih avangin

    kohhran pawn lamah nupa tak a nih theih loh a, Kristian chhungkua a din ziktluak theih loh a ni. Inneihna hi dam chhung thil a nih avangin ngaihdan leh duh dan a lo inkalh chang pawhin inremna kawng kan dap vat tur a ni. Inneih thuthlung leh tum hre chiang lova nupui pasal nei kan tam avang hian ramin a tuar mek a ni. Heng kan sawite hre reng chung hian Pathian tiha, a laka rinawm chungin inneihna i din thar leh ang u.

    1. Nupa inkar: Dr. Kenneth Chaffin-a chuan, “Nupa inlaichinna hian khawvelah hian eng ang mite nge lo cheng zel dawn a tilang a ni,” tiin a sawi a. Chuta tang pawh chuan nupa nun hian chhungkua a nghawng dan chu a lang ruak mai. Tunlai Kristian chhungkuaa sual hnathawh langsar tak chu nupa inkar inrem lohna hi a ni. Tunlai nupa inthen chhan ber chu, “Kan inmil hlawl lo, kan duh zawng a inang thei hlawl lo,” tih lam pang hi a ni duh hle. Khawvel mihring tu mah inmil thlap an awm lo. Pakhat nih nghal theih a ni lo va, zir chawp ngai a ni. Inneihna thutiam hmangin pumkhat ni ngai lo pumkhatah kan insiam kan tih hian pakhat ni zel turin kawng kan zawh tan tih kan hre tur a ni. Pasal fel famkim, nupui fel famkim hi an la piang lo. Kawppui fel lohna hmuh hmaih luih a, kan in duh vena lai tak phum bo a ngai a, chutia inzir tawn chuan kan inpumkhat thei chauh tih hi zir a tul hle. Nupa inkara kak a awm tlat chuan chhungkaw tha a awm thei lo. Nupa inkara innghirnghona a awm chuan faten an tuar thin. Thinrim nikhua pawhin nupa tam tak chuan fate hriatah inhau an duh lo va, an insûm hram hram thin. Fate bula thenawmte rêl te, kohhran hruaitute sawiselte hi fate thinlung hruai sualtu a ni thin a, chin loh chi a ni. Kawppuite nena thu inhmuh fuh loh chang pawh a awm thei a, ngawi hmasa zawk emaw, ngaihdam dil hmasa zawk emaw awm a ngai thin. Nupa chu mihring famkim lo ve ve an nih avangin inngaihdam tawnna neih a tul thin. Inngaihdam tawnna a awm loh chuan nupa hlim a awm theih loh a ni. Joel Osteena’n, “I kawppui chu a thatna lai i puan chhuahsak chuan, thatnain a chh^ng let ang che,” a tih hi zawm ngei chi a va ni em.

    Kan kawppuite hian kan hnen atang hian fakna aw leh hriat thiamna hi an mamawh thin. “A fate chuan lawm thu an hrilh a, a pasal pawhin a fak bawk a,” (Thuf.31:28) tiin. An kawppuite an en dan mil zelin faten an nu leh pate hi an zahin an zah lo mai a ni. Chuvangin kawppuite nena inkar nun te hi siam that ngai chu i siam tha hreh lo ang u.

    1. Nu leh pa zah: Nu leh pa zah kan tih hian nu leh pa chawimawi tih hi a kalhrang lo, a thuhmun ti ila a tha awm e. Tunlai khawvelah hian Kristian chhungkaw zingah pawh chhungkaw inawp dan mumal lo kan awm ta nual mai a. A bik takin thalai zingah tun hma aiin nu leh pa zahna a tlahniam hle niin a lang. Thalai zingah nu leh pa zah thiam a, chhungkuaah zahawm taka an dinhmun an luah laiin, thalai thenkhatte erawh chu nu leh pa ten an chawm lian a, an mahni zah leh chawimawi aia tihming chhe zawk an tam ta hle mai. Thawh chhuah nei mang lo nu leh pate vaua, pawisa dila ruihhlo ngaia tal nileng ta mai mai thalai an va tam em!

    Bible-ah chuan, “Lalpa i Pathianin thu a pek che angin i nu leh pa chawimawi rawh, tichuan Lalpan ram a pekah che hian i hmuingil ang a, i dam rei dawn nia,” tiin min hrilh a (Deut.5:16). Tin, Mosia danah chuan nu leh pa thu awih lo chu tihhlum tur a ni. (Exod.21:15,17) Nu leh pa chu an tar hnu pawhin faten an hmusit tur a ni lo. (Thuf.23:22). Thuthlung Tharah pawh Eph.6:13;Kol.3:20-ah te nu leh pa zah tura zirtirna kan hmu bawk. Judaho chuan an nu leh pate chu hringtu mai ni lovin an Pathian hmuh theihah an ngai a, an zah hle thin. Chuvangin malsawmna dawn loh an hlau a, an zah thiam em em thin. Tin, nu leh pa zah leh chawimawi chu dam reina a ni tih Bible-in min hrilh bawk. Nu leh pa zahna pawh nei lo ruihhlo avanga naupang taka thi Mizoramah kan tam ta hle mai. Chhungkuaa faten nu leh pa zahna lo tlahniam ta hi thalaite u, siam thain i din thar leh teh ang u.
    ………………………………………………………………….