KNP Day – April 23

Lib.Pic: KNP Platinum  Jubilee Balloon  chhuah lai (2019)

April 23, 2020 (Ningani) kha Kristian Naupang Pawl (KNP) Din champhaphak (KNP Day) vawi 77-na a ni a.  Kumin KNP Day thupui atan Isuan naupangte a hmangaih (Marka 10:16) tih a ni.  

KNP Day hi kum dangah chuan Unit hrang hrangah hlim taka hman a ni thin a, Pastor Bial engnemawzat chuan KNP Inkhawmpui te neiin inelna tha tak tak te buatsaihin hlim takin an hmang thin a ni.  Kuminah hian Coronavirus hri leng avangin Sorkar-in hri laka mipui te kan him zawk nan inkharkhip  (Lockdown)  a kalpui mek a. Hemi avang hian Kohhran hote Pathian Biak hona punkhawmna kan nei thei lova, KNP memberte chuan mahni awmhmunah he hun pawimawh tak hi an lo hman theih nan Headquarters atangin KNP Promoter Pi PS Lalhmingthangi’n KNP te hnenah thuchah a sawi.
(Watch: KNP Promoter thuchah)

KRISTIAN NAUPANG PAWL (KNP) chanchin tlangpui:

RISTIAN NAUPANG PAWL (KNP) hi 23 April, 1943 khan BMS Missionary-te Pi Zoduhi leh Pi Zomuani’n an lo din tawh a. Huna eng emaw chen inkaihhruaina mumal tak awm lova kalpui a nih hnuin, kum 1973 BCM Assembly chuan ‘K.N.P.hi mumal zawka  enkawl nise’ tiin a lo rel ta a. Naupangte zingah Pathian ram a lo zau a, a lo ngheh a, a lo lanfiah deuh deuh theih nan inkaihhruaina Dan pawh mumal taka siam a lo ni ta a. K.N.P.hi a din atanga kum sawmnga chuang lai mai chu enkawltu hrang hrangte enkawlna hnuaiah dah a ni a. A din tanni 23 April hi hun eng emaw chen hnuah chhut chian chauh a ni a. Chu chu Assembly-ah thlen a ni a. Kum 2002 Assembly chuan he ni 23 April hi K.N.P. Day atan a lo pawm fel ta a ni.

Kristian Naupang Pawl (KNP) te hi nakin lawka ram leh hnam, kohhran enkawltu tur leh kaihruaitu tur an la nih avangin leh anmahni mai chuan la in enkawl theilo an nih avangin enkawl a, kaihhruai ngai an ni a. Mizoram Baptist Kohhran chuan hei hi hrechiangin anmahni kaihhruaina tur dante siamin hma a la chho zel a. Naupangten an pawimawhna leh Kohhranin a ngaih pawimawhzia an lo hriat zel theihna turin a bik taka anmahni puala ‘NI BIK’ kumtina an neih a, an hman hi Mizoram Baptist Kohhran Assembly chuan tha a ti a. Kumtina KNPten rualkhai tak leh hlim taka an hman theihna turin “BCM NI PAWIMAWH BU’ ah hian dah tel a lo ni ta a ni.

Mizoram Baptist Kohhran inchhiarna thar ber,  BCM Statistical Handbook (2019-2020) in a tarlan dan in tunah hian KNP hi Unit 516 awm in member 33,384 an awm mek a, Mipa – 16368 leh hmeichhia- 16983  an awm a ni.