KNP DAY – April 23

KNP lo din tan dan:
Serkawn Kohhran Upa Committee chuan veng chhunga naupangte inkhawm lama an lo inthlahdah deuh avangin naupang huaihawt veltu, inkhawmpui tura khaikhawmtu inruat ila tih a rel angin Zosap Mrs.E.M. Oliver (Pi Zoduhi) leh Pi Rovi chu naupang lo buaipui turin March 29, 1943-ah an ruat a. Anni chuan hma lain April 23, 1943 Easter Sunday khan tha takin an inkhawmpui a. Hemi ni atang hian mumal takin naupangte chu an inkhawmpui ta a. Hei hi KNP rawn in tanna chu a ni a, BCM Assembly chuan KNP din ni atan 23th April, 1943 (KNP day) a pawm ta a ni. A tirah chuan KNP hi “Kohhran naupang pawl” tiin an sawi thin. Tunah chuan Kristian Naupang Pawl (KNP) tih a lo ni ta a ni. Chawlhni zing inkhawmpui chauh ni lovin a hranpa a inkhawmnate chawlhni tûk te, chawlni chawhnuah te tualchhung Kohhran remchan anga hmanpui thin a ni bawk.

Assembly hriatpuiin:
Kum 1967 Assembly chuan khaw tinah naupang inkhawm neih ni se, Literature Department Committee-in a kaihhruaina siam rawh se, a ti a. Literature Department Committee-in ruahmanna a siam ang chuan kum 1968-1983 chhung KNP chu BKHP ten an enkawl a. BKHP ten an enkawl lai hian thuzir turte kum tin a buatsaihsak thin. Mizoram pum leh bial hrang hrangah KNP hruaitute tan leadership training a siamsak thin. KNP-te pualin evangelist teacher pahnih tuikuk (bru) zingah rawih a ni a, kum 1980 atang khan evangelist teacher 4 rawih an ni. Hemi atan hian target-te an siamsak thin a, an target chu Unit leh Bialah BKHP ten an ngaihtuahpui thin.

BCM Assembly ruahmanna angin 1984-1994 chhung Sunday Sikul enkawlna hnuaiah KNP chu a awm leh a, a hrana zirlaibute siamin tha takin an enkawl a. BCM chuan kum 1995-ah Christian Education Department siam tharin chu mi hnuaiah KNP pawh chu a dah ve leh ta a, Kum 1995-2001 thleng KNP enkawl hna chu Christian Education Department chuan a lo thawk ve leh ta a ni. Kum 2001 Assembly chuan KNP chu Fellowship Organisation Department (FOD) hnuaia Fellowship pakhat angin a dah leh a. Hemi kum atang hian KNP bik enkawl turin KNP Promoter ruat a ni a, Kristian Naupang Pawl (KNP) chu FOD hnuaiah a awm ve ta a ni.