KNP Lawngtlai North Pastor Bial Inkhawmpui vawi 17-na neih a ni

Kristian Naupang Pawl (KNP), Lawngtlai North Pastor Bial Inkhawmpui vawi 17-na chu April 29, 2022 (Zirtawpni) atanga May 1, 2022 (Pathianni) chhung khan BCM Biak In, Electric Veng, Lawngtlaiah neih a ni a, Inkhawmpuiah hian “Kohhran” tih chu thupuiah hmangin, Bialtu Pastor Rev. H. Lalremtluanga speaker a ni .

Zirtawpni zan, Inrinni zan, Pathianni zing leh Pathianni zanah te Pathian biak inkhawm buatsaih niin, sermon ngaihthlak ṭhin a ni a. Inrinni chawhmaah “Career Awareness Programme” neiin, KNP Electric Veng Unit Lawngtlaia Assistant Convener Tv. C. Lalhruaitluanga’n hun a hmang a. Inrinni chawhnu leh Pathianni chawhnuah te fellowship neiin, Pathianni chawhnu fellowship-ah hian Bial KNP Sub-Committee Treasurer Pi Laldinpuii Bawitlung (BCM Salem, Lawngtlai-III) chuan “Zuk leh Hmuam leh Ruihhlo ṭhat lohzia Zirtirna”  a nei bawk.

COVID-19 hri leng avanga kum hnih (2020 & 2021) zet Bial KNP Inkhawmpui hi neih theih a nih loh hnuah, kuminah Inkhawmpui hi buatsaih a ni a. Kum danga thu leh hlaa Unit intihsiakna awm ṭhin erawh kumin hian awm lovin, Pathian biak inkhawm leh fellowship-ahte hian Unit tin aṭangin naupangte’n zaipawl, malzai, lam leh Pathian thu vawn (recitation) sawi chanvo te a inchhawkin an nei ṭhin a. Zai hruaiah pawh a theih chin chinah Unit tin hun insemin, KNP member leh hruaitu ten zai an hruai ṭhin a ni. Lawngtlai North Pastor Bial chhungah hian KNP unit panga – Electric Veng, Kanaan, Peniel, Salem leh Thingkah unit-te an awm a ni.