KOHHRAN HOTE HNENA THUCHAH

BCM member zawng zawng te Lal Isua Krista hmingin chibai ka buk a che u!

Kan hriat theuh ang in Covid-19 avangin India ram pumpui ah ni 21 chhung Lockdown kalpui mek a ni a, Mizoram ah pawh he lockdown avang hian duh duha pawn chhuak thei lovin mahni inchhung khur ah inkhungin hun kan hmang mek a nih hi. Kohhran hoten he hri leng, covid-19 laka mipui te kan him theihna tur atana sawrkar ruahmanna te kan zawm that avangin in hnenah lawmthu ka sawi a, sawrkar leh mithiam zawkte ruahmanna lo zawm chhunzawm zel tur pawhin ka ngen nawn leh che u a ni e.

Lockdown kalpui a nih mek laiin kan awmna tualchhung theuh ah hetia hna thawh theih a nih tak loh avanga mi harsa te kohhran ho ten chhawmdawla kan tanpui te leh kan awmna Local leh Village Level Task Force-a a tul anga an hman atan ti a, kohhran hote kan theih ang angin  kan luang chhuak a ni tih ka hriatin ka lawm tak meuh a ni. Hei hi Lal Isua zirtirna pawimawh tak mai kan tihhlawhtlinna pawh a ni e. Tun dinhmunah kohhran hote kan luanchhuahna reprt kan dawn chin hi a sum fai ringawt pawhin cheng Nuai 22.11 (Rs. 2,211,400) lai a tling tawh a ni, Lalpan ropuina chang se, a malsawmna tam takin vur let che u rawh se!

Lockdown hun hi Kohhran mi ten Pathian pawlna thuk zawk kan neih theih nan amah nen hun hmang ila; Covid-19 vei enkawl mek te, anmahni enkawltu damdawi lama thawktu zawng zawng te leh mipui te kan lo him theina tura an tha leh zung sengtu Task Force te, dan lek kawhtu sipai leh police te, sawrkar roreltu te tan tih tak zetin i tawngtai zel ang u. Kan Pathian hi a pangngai reng a, tun ang hun harsaah pawh hian kan Pathian kha a ngai reng a, kan tawngtaina leh a mite au thawm a ngaithla reng a ni tih i hre thar leh ang u!

Kum dang ang in kan hunpui – Tumakau Pathianni, Goodfriday leh Easter Sunday te Biak Inah hmang thei lo mah ila, keimahni hmun theuh ah hlawk taka kan hman ka beisei tlat a ni. Thihna leh engkim hneha tho leh kan Lalpa hi hnaih sauh sauh i la, ringtu te hi ‘HNEHTU kan ni’ tih hre thar zelin, he khawvel hun harsa hi HNEHNA PATHIAN nen i hmachhawn zel ang u!

Kohhran hote, Pathianin veng in awmpui zel che u rawh se!

Ka lawm e!

Rev. F.  Ramdinmawia
General Secretary,
Baptist Church of Mizoram.