Kohhran thar, BCM Bethlehem, Lawngtlai College veng hawn a ni.

September 4, 2021 (Inrinni) chawhnu dar 1 khan Rev. F. Ramdinmawia, General Secretary, BCM chuan Biak In thar leh tualchhung kohhran thar – BCM Bethlehem Lawngtlai College veng chu a hawng.

Biak In thar leh kohhran thar hawnna inkhawm hi Sorkar inkaihhruaina zawm chungin neih a ni a, he hun hmanpui tur hian Hqrs, Serkawn aṭangin General Secretary bakah Rev. C. Chhuntluanga, Director Pastoral Department leh Rev. R. Thanmawia,  Editor Kohhran Beng-te an kal a ni.

BCM Bethlehem hi BCM Bethani Lawngtlai aṭanga in dang niin, July 19, 2019 khan Rev. R. Lalnunzira, ES Lawngtlai-in Biak In lungphum phumin bul tan a ni a. Biak In hi a dung 72ft, a vang 36ft leh a san lam 30ft a sak a ni a, Biak In sak nan hian BCM Hqtr aṭangin Rs. Nuai 11, BCM Bethani aṭangin Rs. 19,14,820 leh kohhran dangte leh fellowship hrang hrang bakah mimal ṭhahnem ngaite aṭangin Rs. 1,95,100 dawn a ni.

BCM Bethlehem ah hian chhungkua 54, kohhran member 252 an lawi mek a, Heti hian Mizoram Baptist Kohhranah Tualchhung Kohhran 667 an awm ta a ni.