KRISMAS LEH KUMTHAR CHIBAI

From : Rev. F. Ramdinmawia, General Secretary, BCM

Kristian tena kan hunpui ber leh kan nghahhlelh, kan Lalpa Isua Krista pian champhaphâk, Krismas kan lo thleng leh dâwn ta reng mai. Pathian hruainaa hetiang hun lâwmawm kan lo thleng leh thei hi a lâwmawmin a ropui hle a ni. Chutih laiin kan Kohhrana hruaitu pawimawh tak tak, Pastor, Upa, Rawngbâwltute leh Kohhrana mi pawimawh tak tak engemaw zâtin kumin chhûnga mual min liam san erawhchu kan rilruin kan hrereng a, an kalsan tâk an chhûng leh khat thenrualte Pathianin thlamuan se tih hi kan tawngtaina a ni.

Hetiang hun hi mi tam takte tân khawvêl thila hlimna leh lâwmna zawnga an hmanhlelhna hun a ni a. He hunah hian awmna tur hmun leh hun dik lova kan awm hian lungngaihna leh thihna hial pawh a thlen fo thîn. Chuvângin Kohhranhote chuan he hun hi Amah fakna leh chawimawina hun atân i hmang theuh ang u. Sawrkar phal loh puak thei thil leh hâl mawi chi hrang hrang, tûl lova pawisa sên ralna lam te ti lo tûr te, Assembly pawhin tha a tih loh tûn laia kan intihhmuh tâk êm êm, kawtthlêra Ran In lem leh milem te siam lo tûrin kan inngen thar leh a, hetianga insênso vak ai chuan rethei leh tanpui ngaiten he hun hi hlim taka an lo hman ve theih kan neih thilte i hlân zâwk ang u.

Kum kal mêk ka thlîr kîr a, Pathianin Kohhranhote min hruaina nasa tak, Kohhran mal leh BCM pum huap ang pawhin kan dawng nasa hle mai. Mizoram Chhim leh hmâr, chhak leh thlangah Kohhran member pawh kan pung a, thilpêk rawngbâwlna leh Department hrang hrang hmalâkna kawngah hma kan sâwn zêl a, ringthar kan pung a, Bialtu Pastor te, Missionary te hmalâkna zârah leh hlawh nei lova rim taka thawk thîn Evangelistic Team engemaw zât thahnemngaihna kaltlangin Pathianin hna a thawk a, thlaraubo tam tak Isua ke bulah hruai an ni a. Suala tlu leh Setana’n a phuar beh tawhte tam tak phelh an ni hi a ropui êm êm a ni. Kohhran pâwl dangte nêna kan thawhhona a tha a, Sawrkâr hruaitute nên pawh inrem takin kan thawkho thei hi thil lâwmawm tak a ni a, hêng zawng zawng hi Pathian min hruaina vek a ni.

Hetih lai hian khuarêl chhiatna avânga mi mal leh Kohhrana harsatna tâwk engemaw zât kan awm a, theih ang tâwk chuan kan inchhawmdawl ve thin nain kan theihna a bei tham hle thîn a. Kohhranhote kan tangrual a, Headquarters atang pawha kan hriatpui lêm lohvin min tam tak in lo intanpui thîn tih kan hria a, kan inpumkhatna tichiangtu, Pathianin hmanrua tam tak a lo nei thîn a ni tih min hriatchhiantîr leh thîn. Pathian ram tân theihtâwp i chhuahho zêl ang u. Hei hi BCM Assembly 2017-in lungrual taka a pass pawh a ni.

Hlim taka amah fak chung zêla Krismas leh Kumthar hun hmang theuh tûrin Mizoram chhûng leh pâwn thlenga Mizoram Baptist Kohhran member zawng zawngte ka duhsakna sâng ber ka hlân a che u.

‘Thinlung a lamah hawn ila,

Ro thil dang a ngai tawh lovang’

Krismas leh Kumthar chibai tha ber

ka bûk bawk a che u.

 

Posted in BCM News.

Leave a Reply

Your email address will not be published. Required fields are marked *