Krista Pasaltha NL. C. LALREMSIAMI kan chan ta

BCM Missionary Nl C.Lalremsiami (Siampuii)  chu hun rei tak Cancer natna-in a a tlakbuak hnu-in May 30, 2020 zan dar 7:30 A rawng a lo bawl thin, a Lalpa hnenah min haw san ta.  Zanah tlaivarpui niin  a tuk, May 31, 2020 chawhma dar 11: 00 khan Anganwadi Centre (Ar huan road) Mission Veng, Aizawl-ah Rev J.C.Vanlalluaia, Bialtu Pastor, BCM, Republic Vengthlang Bial-in vuiin, Republic veng thlanmual-ah ropui taka thlah liam a ni.

Nl C. Lalremsiami (Siampuii) hi Chawngthu hnam a ni a, Theiriat, Lunglei khaw chhuak niin, BCM Theiriatah a lawi ṭhin a. A pa hi C.Laltlanzauva niin, a nu hi K.Lalsangpuii a ni. A pa, C.Laltlanzauva hian Mizoram buai lai khan a boral san tawh a. A nu K. Lalsangpuii hian la dampuiin, Mission veng, Aizawl-ah a khawsa mek a ni. Siampuii hi an unau pali zinga upa ber niin, unau hmeichhia 3 leh mipa pakhat an ni a, hmeichhia pakhat erawh hi chu a boral tawh a, tunah hian a nuhoin Mission veng, Aizawlah an chuhungkuain an khawsa mek a ni.

Siampuii hian June 1, 1990 khan BCM hnuaiah Missionary rawngbawl hna thawk turin hna a zawm ṭan a. A kotu kohna tihlawhtling turin kan hotute kal tlangin Tripura field ah kum 1990 aṭanga 2016 thleng khan thawkin, Kum 2016-ah JBS, Serkawnah a Training a, Training a zawh aṭang khan Mizoram chhung Bru mission-ah a thawk ve leh a, kum 2019 khan Cancer a ni tih hmuh chhuah a ni a, Aizawl lamah hun rei tak enkawl a nih hnu-ah May 30, 2020 zan dar 7:30 khan a rawng a bawl ṭhin Lalpa hnenah chawl tawh turin min kalsan ta a ni. Missionary hna a thawh chhung hian heng khaw hrang hrangah hian a lo awm tawh a ni.

1990-1999: Dakmura (Kaipeng hnam), MTI, Serkawn, Sonarai (Hrangkhawl hnam), Thelekung (Molsom hnam)

1999-2006: Sakbari (Tripura hnam)

2006-2008: S.Colony (Molsom hnam)

2008-2009: Bangphur (Jamatia hnam)

2009-2016: Garjee (Jamatia hnam)

2016: JBS, Serkawn

2017-2020: BMS Dapchhuah (Bru mission)

Nl C. Lalremsiami (Siampuii) thihna hian rampum a nghawr a, Khawvel mawina leh nawmsakna kalsana, Isua Krista thlang zawktu, Krista pasaltha thihna hian Kohhran mite thinlung a khawih takzet a. Hetiang mi, Lalpa tana mi hrat khawkheng leh thatlai hun zawng zawng Lalpa tana hmang zo vek ngam, Missionary ropui a nei hi Mizoram Baptist Kohhran chuan a chhuang tak zet a, Kohhran chanchinah a hming chu hriat reng a ni tahw dawn a ni