KRISTIAN  CHHUNGKAW  NI.

(May thla Pathian ni vawi thumna)

Hun hman dan chungchanga hriat tulte: Kum 2003 Assembly-a Kristian Chhungkaw Chawlhkar hman ni sela tih thu lo lut chu titluk a ni a; Kristian Chhungkaw Ni Programme hran siam thin chu programme hran siam lovin Kristian Chhungkaw Chawlhkarah hian thuzir tur leh kâr pumpui programme (Kristian Chhungkaw ni telin) siam zel a ni ta zawk a ni.

Ni pawimawh a lo nih dan:

Kum 1948 khan North East India Christian Council (NEICC) khatih laia Assam Christian Council (ACC) inkhawmpuia Baptist Kohhran palai zu kalte chuan Assembly (Presbytery)-ah report an pe a; Kristian chhungkaw pawimawhzia hi uar takin an sawi a. Assembly chuan, “Kohhran tinin bawhzui ni se la, May thla Pathianni remchang ber chu Kristian Chhungkaw niah hmang i la; chhungkaw inenkawlna pawimawhzia leh chhungkaw hlutnate hi sermon-ah thusawitu apiangin sawi thin rawh se,” tiin a rel a. Tichuan, 1948 atangin Kristian Chhungkaw Ni hi kan lo hmang tan ta a ni. Tunah chuan BCM Calendar-ah nghet taka dahin May thla Pathianni vawi 3-na hi kum tin Kristian Chhungkaw Ni atan kan hmang ta a ni.

Kristian Chhungkaw Ni-a Inkhawm thawhlawm hi hun rei tak chhung Headquarters-ah thawnin, Nauhnuchham tanpui nan pek a ni thin. Assembly -in Tualchhung Kohhran mamawh sang zel avanga Headquarters-a lut tur a tih tlem atang khan he mi ni thawhlawm pawh hi Tualchhung Kohhran tinin anmahni pualin an hmang ta zel a ni.

Kristian Chhungkaw Ni hi Pathianni ni mah sela, hetah hian programme hran siam a ni lo. A chhan chu Kristian Chhungkaw Chawlhkar kan lo nei ta a, he chawlhkarah hian thuzir tur leh kar pum pui programme (Kristian Chhungkaw ni telin) siam zel a nih tak avangin. Kristian Chhungkaw Chawlhkar lo pian chhuah dan tawi têin tarlang nghal ila. Kum 2003 Assembly-a Kristian Chhungkaw Chawlhkar hman ni se la tih thu lo lut chu titluk a ni a; Kristian Chhungkaw ni behchhana hman a ni. 2004 Assembly ah Kristian Chhungkaw Chawlhkar hman rawtna lo lut leh pawh remtih niin hman a ni leh a. 2005 Assembly-ah pawh a lo lut leh a. Chutianga a zawna tum thum lai ngaihtuah a nih takah chuan Assembly chuan kum tin Kristian Chhungkaw Chawlhkar hi hman thin ni tawh rawh se tiin a rel ta a ni. Tichuan tunah chuan Kristian Chhungkaw Chawlhkar hi kum tin kan hmang thin a ni.

Kristian Chhungkaw Chawlhkara chhung tin zir tur headquarters atanga buatsaih chu zirin urhsun taka hman ziah a ni. He hunah hian Kohhran (pui) inkhawm ni lo, FOD inkhawm leh tul dangte chu ti lo tura hriattirin Kristian Chhungkaw Chawlhkar chu duh thawh taka hman ziah a ni. Kristian Chhungkaw Chawlhkar hi Kristian Chhungkaw Ni nen inzawm chiaha hman thin a ni.