Kristian Chhungkaw Ni – May 17

Kristian Chhungkaw Ni; May 19, 2019 @Serkawn

Tunkar Pathianni, May 17, 2020 hi Mizoram Baptist Kohhran Ni pawimawh ‘Kristian Chhungkaw Ni’ a ni a. Kumin Kristian Chhungkaw Ni-ah hian thupui pahnih –Zing lam thupui: “Isua awmna in(Marka 2:1) tih leh  Zan lam thupui-ah “Chhungkuaa Pathian rawngbawl” tih thu te thlan a ni.

Kan tarlan tawh ang khan BCM chuan May 11-17, 2020 chhung hian ram pumah Kristian chhungkaw Chawlhkar hmangin, Headquarters atanga chhungkaw tin thu zir tur a buatsaih ang chu zir a ni a. Zirlai panga (5) awm in, Thawhtan zan, Thawhleh zan, Nilai zan, Ningani zan leh Zirtawpni zanah te Mahni chhungkua theuhah zir a ni.

Kan hriat ang leh kan tarlan tawh angin March 24, 2020 atanga vawiin thlengin Covid-19 hri leng avangin rampumah a huhova thiltih leh punkhawm khap a ni a. Kohhran te pawh hun rei tak Biak Inah inkhawm leh thiltih ho a theih loh avangin Kristian Chhungkaw Ni-ah pawh Inkhawm a rem loh avangin Mahni chhungkua theuhah chhungkaw remchan anga hun hman tur a ni. Hemi atan hian Communications Departement chuan Rev. H. Vanlalruata sermon, Kristian Chhungkaw Ni Thupui hmanga buatsaih chu BCM Khawnvar Channel-ah Inrinni zan leh pathianni chhun leh Pathianni zanah te pek chhuah a ni ang a, BCM Youtube Channel “Baptist Church of Mizoram” ah pawh pek chhuah a ni bawk ang.

 

Kristian Chhungkaw Ni hman tan dan

Kum 1948 khan North East India Christian Council (NEICC) khatih laia Assam Christian Council (ACC) inkhawmpuia Baptist Kohhran palai zu kalte chuan Assembly (Presbytery) –ah report an pe a; Kristian chhungkaw pawimawhzia hi uar takin an sawi a. Assembly chuan Kohhran tinin bawhzui nise la, May thla Pathianni remchang ber chu Kristian Chhungkaw niah hmang ila; chhungkaw inenkawlna pawimawhzia leh chhungkaw hlutna te hi sermon-ah thusawitu apiangin sawi thin ni rawh se tiin a rel a.

Tichuan, 1948 atangin Kristian Chhungkaw Ni hi kan lo hmang tan ta a ni. Tunah chuan BCM Calendar-ah pawh dahin May thla Pathianni vawi 3-na hi kum tin Kristian Chhungkaw Ni atan kan hmang ta a ni. Kristian Chhungkaw Ni a Inkhawm thawhlawm hi hun rei tak chhung Headquarters ah thawnin, Nau hnuchham tanpui nan pek thin a ni a. Assembly in Tualchhung Kohhran mamawh sang zêl avanga headquarters a lut tur a tih tlem atang khan he mi ni thawhlawm pawh hi Tualchhung Kohhran tinin anmahni pualin an hmang ta zêl a ni.

Hun a lo kal zel a, Kristian Chhungkaw din ngaih pawimawhna a lo lian deuh deuh a, kum tina Pathianni vawi khat ‘Kristian Chhungkaw Ni’ kan hman thin chu duh tawk lovin Kum 2005 Assembly-ah “Kum tin Kristian Chhungkaw Chawlhkar hi kum tinin hman thin ni tawh rawh se” tiin a rel ta a. Tichuan Kristian Chhungkaw Chawlhkar hi kum tin kan hmang ta a ni.