Kristian Chhungkaw Ni – May 20

Tunkar Pathianni, May 20, 2018 hi Mizoram Baptist Kohhran Ni pawimawh ‘Kristian Chhungkaw Ni’ a ni a. Kohhran tinah hemi pual hian hun hman a ni ang. Kumin Kristian Chhungkaw Ni Thupui chu Kristian chhungkua a Lalpa  malsawmna,”(Sam 133:3) tih a ni ang.

Kuminah hian Thlarau Thianghlim thlen Ni leh Kristian Chhungkaw Ni a lo inrual avangin Zing lam Sermon-ah Thlarau Thianghlim thlen Ni thupui “Thlarau Thianghlim chu ti mit suh u,” (Tirhkohte 5:9) ngaihtlak a ni ang a, sawi taw hang khan zan lam inkahwmah hian Kristian Chhungkaw Ni thupui Kristian chhungkua a Lalpa  malsawmna,”(Sam 133:3) tih thu hmangain thuchah ngaihthlak a ni thung dawn a ni.

Post hmasa lama kan tarlan tawh angin tunkar chhung May 15 zan atang khan Kristian Chhungkaw Chawlhkar hman mek a ni a, Headquarters atanga Kristian chhungkaw thu zir buatsaih angin Inkhawm zan lovah chuan Chhungkaw tinin mahni chhungkuaah thuzir hi an zir chho mek a, Nilaini zan, Inrinni zan, Pathianni zan-ah te Biak Inah Kristian Chhungkaw thupui hmangin thuchah ngaihthlak a ni thung ang.

………………………

Kristian Chhungkaw Ni hman tan dan

Kum 1948 khan North East India Christian Council (NEICC) khatih laia Assem Christian Council (ACC) inkhawmpuia Baptist Kohhran palai zu kalte chuan Assembly (Presbytery) –ah report an pe a; Kristian chhungkaw pawimawhzia hi uar takin an sawi a. Assembly chuan Kohhran tinin bawhzui nisela, May thla Pathianni remchang ber chu Kristian Chhungkaw niah hmang ila; chhungkaw inenkawlna pawimawhzia leh chhungkaw hlutna te hi sermon-ah thusawitu apiangin sawi thin ni rawh se tiin a rel a. Tichuan, 1948 atangin Kristian Chhungkaw Ni hi kan lo hmang tan ta a ni. Tunah chuan BCM Calendar-ah nghet taka dahin May thla Pathianni vawi 3-na hi kum tin Kristian Chhungkaw Ni atan kan hmang ta a ni. Kristian Chhungkaw Ni a Inkhawm thawhlawm hi hun rei tak chhung Headquarters ah thawnin, Nau hnuchham tanpui nan pek thin a ni. Assembly in Tualchhung Kohhran mamawh sang zêl avanga headquarters a lut tur a tih tlem atang khan he mi ni thawhlawm pawh hi Tualchhung Kohhran tinin anmahni pualin an hmang ta zêl a ni.

Kristian Chhungkaw Ni hi Pathianni ni mah sela, hetah hian programme hran siam a ni lo. A chhan chu Kristian Chhungkaw Chawlhkar kan lo nei ta a, he chawlhkarah hian thuzir tur leh kar pumpui programme (Kristian Chhungkaw ni telin) siam zel anih tak avangin. Kristian Chhungkaw Chawlhkar lo pian chhuah dan tawitein tarlang nghal ila. Kum 2003 Assembly-a Kristian Chhungkaw Chawlhkar hman ni sela tih thu lo lut chu titluk a ni a; Kristian Chhungkaw ni behchhana hman a ni. 2004 Assembly ah Kristian Chhungkaw Chawlhkar hman rawtna lo lut leh pawh remtih niin hman a ni leh a. Kum 2005 Assembly ah pawh a lo lut leh a. Chutianga a zawna tum thum lai ngaihtuah anih takah chuan Assembly chuan kum tin Kristian Chhungkaw Chawlhkar hi hman thin ni tawh rawh se tiin a rel ta a ni. Tichuan tunah chuan Kristian Chhungkaw Chawlhkar hi kum tin kan hmang ta thin a ni.

Kristian Chhungkaw Chawlhkara chhûng tin zir tur headquarters atanga buatsaih chu zirin urhsun taka hman ziah a ni. He hunah hian Kohhran (pui) inkhawm ni lo, FOD inkhawm leh tul dangte chu ti lo tura hriattirin Kristian Chhungkaw Chawlhkar chu duh thawh taka hman ziah a ni. Kristian Chhungkaw Chawlhkar hi Kristian Chhungkaw Ni nen inzawm chiaha hman thin a ni.#

 

 

Posted in BCM News.