Kristian Hospital Ni-2018

Tunkar Pathianni, February 18, 2018 hi  Mizoram Baptist Kohhran ni pawimawh, Kristian Hospital Ni a ni a, BCM Biak In tinah he Ni pual hian hun hman a ni ang. Kumin Kristian Hospital Ni thupui atan “Damna kim – Lal Isua Krista”  tih hman a ni ang. Headquarters atanga tawngtai thupui buatsaihsa hmangin tawngtairual a ni ang.

Tawngtai thupui :-

Lawmthu sawina turte

  • Christian Hospital Pathianin min din sak avangin lawmthu I sawi ang
  • BCM hi tihdam rawngbawl hna thawh chhunzawm zel min phalsak avangin

Tawngtai pui ngaihna te:-

  • He rawngbawlna kaltlanga mi tam takin damna leh malsawmna an chan zel theih nan
  • Thawktu leh Zirlai zawng zawng ten Krista rilru pua hmangaihna leh lainatna nen rawng an bawl chhunzawm zel theih nan.
  • Kan Hospital hmang a Pathian ram a lo zauva a lo lan fiah a lo ngheh zel theih nan.

Christian Hospital Serkawn hi February 10, 1923 ah din a ni a, kum tinin a din tan ni emaw, Pathianni a nih loh chuan a hnaih ber Pathianni hi KristianHospital Sunday atan dah thin a ni.

……………

 

CHRISTIAN HOSPITAL SUNDAY 2018

BCM MEDICAL AND HEALTH DEPARTMENT REPORT TLANGPUI

                                                                 – Dr. B. Laldinliana, Med. Superintendent

Kan zosâp missionary-te chuan kan ram mamawh lian ber pakhat chu hrisêlna a ni tih hriain an rawn thlen tirh atangin tihdam rawngbâwlna an tan nghâl a. Mizoram chhim lama Damdawi In hmasaber Christian Hospital Serkawn chu 10thFebruary 1923-ah an rawn din a, nurse zirna phei chu hemi hma hian lo tan a ni a. Tichuan, he Damdawi In hi mi tam tak tân malsâwmna leh damna In lo niin nurse za engemaw zât an zir chhuak tawh a ni. Atîrah chuan khum 10 chauh leh thawktu tlêm tê nêna tan a ni a. Mahse, Pathian hruaina azârah a thang chho zêl a. Tûnah chuan BCM hnuaia Department lian ber pakhat a ni a. Pathian ram a lo lan fiah deuh deuh theihna tûra rawngbâwlna pawimawh ber pakhat a ni bawk. Kan hmalâkna tlângpui han târlang ila:

  1. Christian Hospital Serkawn:

    Kan zosâp missionary-ten thahnemngai taka bul an lo tanna avâng leh thawktu hmasaten Pathian rawngbâwlna tak tak a ni tih hriaa an inpêkna thawh rah chu Pathianin mal a sâwm a. Tûnah chuan khum 100 chuang a lo awm ta a, Deluxe room 2, Private Cabin 14 leh Special Ward 1 a awm a, Staff sick room 2 leh Student sick room 1 a awm bawk. Thawktu 153 kan awm mêk a. Kum 2017 chhûng khan damlo admit mi 70 vêl ni tin inenkawl reng ang an ni a, OPD-ah damlo ni tin mi 70 vêl en thîn ang an ni bawk.

General Surgery, Gynaecology, General Medicine-ah te specialist awmin doctor 12 leh Dental surgeon 2 an thawk mêk a ni. Damlo enkawlna kawnga mamawh chi hrang hrang pawh duhthusâm ang chu la ni lo mahse, hma a sâwn ve zêl e. OT leh Labour room changtlung thawkhat tak a awm a. Mît bâwm zai lova verha (Laparoscopic cholecystectomy) pawh kan ti ve thei ta a. Kum 2017 khan damlo 1227 zai an ni a, nau piang 529 kan nei bawk. Damlo na zualte tân ICU khum 2 awmna a awm a.

Dialysis khawl 3 neiin Dialysis service pawh kan nei ve ta bawk, mi tam tak tân damna a ni. Tin, Diagnostic service lamah Laboratory service neiin, Laboratory hi CMC Vellore atanga external quality assessment neih  a ni a, result-te pawh rintlâk tûra ngaih a ni. Endoscopy, Ultrasound leh chhûl hmâwr enna (colposcope) a awm a.

Zun kawng leh Phîng enna (Cystoscope) leh URS kan nei a, hemi hmang hian phîng leh zun kawnga lungte pawh zai lovin chhut keha lâk chhuah theih a ni.

Blood Bank awmin thisen stock awm dâna zirin damlo mamawhte tân thisen zawn buai ngai lovin transfusion service a awm a.

Cancer dam lote treatment pêkna hmun tûr Chemo-Treatment room chu peih fel niin hman theihin hawn a ni ta bawk.

Hospital diet hi Dietician enkawlin kitchen leh diet service tha tak kan nei a, dam lote an mamawh dâna zirin special diet pêk an ni.

OPD service neiin 24 hrs emergency service a awm a, Kum khatah damlo 16000 vêl en an ni.

Pharmacy 24 hours service a awm bawk a.

X-ray Department-ah khâwl 2 awmin X-Ray service chi hrang hrang kan nei a, Computerised radiography system hmangin X-ray te pawh fiah taka print theih a ni ta.

Dental service chu dental surgeon 2 ten an kalpui a, specialized dental service e.g. Bracing te tih theih a ni a, a remchân angin outreach programme-te an nei bawk thîn.

Chaplaincy Department a awm a, Chapel building hranpa a awm bawk a. BCM Pastoral committee atangin full time chaplain dah a ni a. Dam loten rilru leh thlarau damna an chan theihna tûrin Chaplain-in hma a la a, Hospital retreat-te buatsaihin thawktu leh students-te thlarau nun châwmtu a ni bawk.

Nursing Superintendent hovin Hospital thianghlimna leh faina kawnga hma lâk a ni a, thawktute inpêkna azârah Damdawiin fai ve tak kan ni thei a, tûn hnaia inspection neihah pawh Lungleia Damdawiin fai ber nihna Pathian zârah kan chang nghe nghe a ni. Tûn kumah hian kala lungte awm chhut kehna khâwl pawimawh tak (lithotripsy machine) chu lei tûra hma lâk mêk a ni a, hman theih thuai beisei bawk ila.

  1. Christian Hospital Lawngtlai: Christian Hospital branch pakhat Christian Hospital Lawngtlai chu February ni 12, 2007 atangin mipuite pan theih tûrin a function tan a. Tûnah hian khum 25 awmin a function mêk a, Doctor 2 leh thawktu 31 an awm a. OT, Labour room, Laboratory, X-ray service leh Ultrasound service te a awm a. Serkawn atangin Surgical, Gynae & Obstretics leh Dental camps te neih a ni bawk thîn. Main Building sak mêk a niin khum 50 awm thei tûra hmalâk zêl a ni ang. Kum tin OPD-ah dam lo 9000 vêl en an ni a, Damdawiina admit 1500 vêl an awm bawk thîn.

  1. School of Nursing, Christian hospital Serkawn: School of Nursing-ah hian Principal leh Vice Principal te nên thawktu 10 an awm a. He school hi INC leh MNC recognized a ni a. Kum tin GNM zirlai 20 lâk an ni a. Result tha tak nei thînin nurse zir chhuak hi 700 chuang an awm tawh a ni. Nursing zirna bâkah students te extracurricular activities hrang hrangah an inhmang thîn a, thingtlângah leh khawpui chhûng hmun hrang hrangah outreach programme an nei bawk thîn. Tin, Computer zirna leh spoken hindi class buatsaih a ni bawk. GNM students te hi kawng hrang hranga Hospital service min ti phuisuitu pawimawh tak an ni. He school atanga chhuakte hi Mizoram leh India hmun hrang hrangah an thawk a, Missionary-in engemaw zât an chhuak bawk. BCM-in human resource development kan thawhna tangkai ber pakhat a ni.

  1. Peripheral/Community programme: A remchân dân leh mamawh dân azirin thingtlâng lamah clinic neih thin a ni a, Kum 2017 chhûng pawh khan khaw hrang hrangah clinic neih a ni. Tin, Town Clinic Falkawn, Lungleiah neih a ni a. Town clinic-ah hian doctor-te in thut chhâwkin Pharmacy leh Diagnostic facilities hrang hrangte nên hmalâk a ni bawk. Kum tin damlo 6000 vêl Town Clinic-ah en an ni thîn.

  1. Hmasâwnna tûra staff inbuatsaihna: Thiamna lo thang zêlah hian thawktute pawh hmasâwn tûra inbuatsaih zêl a ngai a. Tûnah hian CMC Vellore-ah MBBS students 3 sponsored an ni a, Post Basic Nurse Diploma course zir tûrin staff nurse 4 tîr tûra hma lâk mêk a ni.

  1. Sawrkar nêna thawhhona: Programme hrang hrangah Sawrkar hmalâkna tawiawmin thawhho a ni a. MSACS, ICTC, Blood Bank, CSC, RNTCP, RCH etc-ah te thawhhona tha tak kan nei thei a ni.

  1. Charity service: Hospital budget 90 percent vêl hi hospital thawh chhuah tûr a nih avângin a thlâwn chuan inenkawl theih a ni lova. Amaherawhchu, a tlâwm thei anga tihdamna rintlâk pêk hi BCM chuan a tum a. Tin, sum neih loh vângin min rawn pantute hnar anni ngai lova. Enkawl tûra rawn tlu lûtte theih ang tâwkin mi tupawh kan lo enkawl thîn a ni. Hei vâng hian in enkawlna man pêk tûr nei lo, a thlâwna enkawl kan nei ve reng a, a then phei chu natna khirh tak tak leh hun rei tak tak enkawl an ni a. Kum tin hetianga free-a enkawlnaah hian Chêng nuai engemaw zât sên a ni thîn. Tin, bill bâ kum tin nuai engemaw zât hi a awm ve reng bawk.

  1. Hospital poor fund buatsaih a ni a. Hospital Sunday thawhlâwm pawh hi hemi atân hian Kohhran tinin Headquarters-ah chhûn luh tûr a ni. Hei hi tangkai taka hman a ni a, a mamawh tak takte pawh tam thama pêk tûr a awm lo chungin mi tam tak tân malsâwmna a ni a. January atanga December 2017 chhûng khan Poor fund-ah petu mi Kohhran hrang hrang BCM kal tlang leh mi 55 atangin Chêng nuai 10 chuang hmuh a ni a, dam lo 206 tân chêng nuai sâwm chuang hlek bawk pêk chhuah a ni. Poor fund hi Hospital mamawh dang atâna hman ni lovin account hrana vawna damlo mamawhte tân chauh hman a ni a, Damlo hospital bill pêk tûr sutkianna atâna hman a nih bâkah emergency-ah chuan damdawi leh damlo mamawh dang leisak nân pawh hman châng a awm bawk. He poor fund hi a hlutna hriain mi tam takin an theih ang tâwk an rawn pêk belh zêl a, thenkhat phei chuan an hming pawh sawi duh lêm lova rawn dahte pawh an awm a. Regular taka thla tin pe engemaw zât an awm a, tin Hospital staff te zîngah pawh he poor fund atâna thahnemngai taka pe engemaw zât an awm reng a ni. Poor fund hi damlo tân chauh a hman a nih angin heta sum lût a tam poh leh a chhawrtu damlo an tam ve zêl dâwn a ni.

 

Conclusion: Tûn kuma Christian Hospital Sunday thupui chu “Damna kim – Lal Isua Krista” a ni a, Lal Isua’n tihdam rawngbâwlna a thawhnaah khan taksa, rilru leh thlarau damna a keng tel vek thîn, chu chu BCM chuan a chhunzawm zêl ang a, hmasâwn tûr pawhin hma a la zêl ang. Medical and Health Department kaltlanga miten damna an lo chan hian BCM member zawng zawngte hnathawh rah a ni tih hria a, he rawngbâwlnaah hian kan tan tlân theuh a pawimawh a ni. Tawngtainaa thawktu zawng zawngte min lo hre reng tûrin BCM member zawng zawng kan inngên a ni.

 

Related Articles:-

Chemo Treatment Room hawng ta

Kristian Hospital Ni

Medical & Health Department

Posted in BCM News.

admin