Kristian Hospital Ni: Feb.17

Tunkar Pathianni, February 17, 2019 hi  Mizoram Baptist Kohhran ni pawimawh, Kristian Hospital Ni a ni a, BCM Biak In tinah he Ni pual hian hun hman a ni ang. Kumin Kristian Hospital Ni thupui atan “Hêng ka unau tê ber zînga mi pakhat chunga tih chu ka chunga ti in ni” Mat. 25:40. tih hman a ni ang. Headquarters atanga tawngtai thupui buatsaihsa hmangin tawngtairual a ni ang a, hemi ni a Inkhawm thawhlawm hi Hospital Poor Fund-ah hman a ni ang.

TAWNGTAI RUAL THUPUI TURTE:

1. Lal Isua Krista rawngbawlna ki pawimawh ber pakhat ‘tihdam rawngbawlna’ chhunzawm thei a Pathian khawngaihna kan chan avangin lawmthu sawi ila.

2. BMS Missionary te leh BCM staff he rawngbawlna bul lo tantu leh lo chhawm nungtu zawng zawngte avangin lawm thu sawi ila.

3. Tihdam rawngbawlna chhunzawm zel tura thawk tur kan la neih avangte leh thawh theihna tur hmanrua tul angte Pathianin min la pek zel avangin lawmthu sawi ila.

4. School of Nursing atanga GNM students ten result tha tak kan neih thin avang leh nurse zir chhuak eng emaw zat kum tin kan neih thin avangin lawm thu sawi ila.

5. Christian Hospital Serkawn leh Lawngtlaia thawktu zawng zawng ten Lal Isua Krista rilru pua hmangaihna nena he rawngbawlna hna hi kan chhunzawm theihna turin tawngtaisak ila.

6. Tihdam rawngbawlnaah hian khawvel thiamna leh hmasawnna um phak ve zel a ngai a, chumi atan chuan thawktu mi thiam leh hmanraw thate a tul a, Pathian hnenah mamawhte hi dilin tawngtai ila.

7. Tihdam rawngbawlnaa BCM-in hma a lakna hmang a Pathian ram a lo zau va, a lo ngheha, a lo lanfiah deuh deuh theihna turin tawngtai ila.

……………..

KRISTIAN HOSPITAL NI THUCHAH

Dr. B. Laldinliana  M.S.(Gen.Surgery)
Medical Superintendent, Christian Hospital, Serkawn

 

Thupui: “Hêng ka unau tê ber zînga mi pakhat chunga tih chu ka chunga ti in ni”

Mat. 25:40.

 

Vawiin Kristian Hospital Ni–ah hian BCM member zawng zawngte tidamtu Lal Isua Krista hmingin BCM Medical and Health Department hnuaia thawktu leh students zawng zawng ten chibai kan bûk a che u. Tihdam rawgbâwlna hi kan pioneer missionary Sap Upa leh Pu Buanga chuan bul an lo tan a. An rawn chhuah hmain damdawi lam engemaw chen zirin Mizoram an rawn thlen hnuah dispensary te rawn dinin Mizo mipuite tân hrisêlna leh damna an rawn thlen a. Miss. Oliver Dicks (Pi. Dawki) chu kum 1919–ah rawn chhuakin Medical lama thiamna bîk nei ten he hna hi rawn thawk chhovin hma a lo sâwn zêl a,  10th February 1923–ah Mizorama Mission Hospital hmasa ber Kristian Hospital Serkawn chu BMS missionary ten min lo dinsak chu hawn a ni ta a ni. Hemi ni hi Hospital Foundation day atân  hman a ni ta a ni. BMS missionary-ten bul an lo tan tihdam rawngbâwlna chu tûn thlengin BCM chuan a chhunzawm ta zêl a ni.

Lal Isua Kristan he khawvêla rawng a bâwl lai khân mi chi thum a rilru luah tlattu leh ngaih pawimawh êm êm a nei a. Chûng mite chu Juda-hoten an hmusit êm êm a, hmân lai Mizote rilru nên pawh a inang ang reng hle. Chûng mite chu pakhatnaah chuan mi sualte (thlarau bo) an ni, Lal Isua ngei pawh Juda hovin mi sual an tih te a pâwl thin avângin hmuhsit a tâwk fo a ni. Pahnihnaah chuan hmeichhia leh naupangte an ni, Juda hovin hmeichhia leh naupangte an ngaihnêp dân chu kan hre vek awm e. Mahse, Lal Isua chuan Juda kulmûk hote hmuhsit hmeichhia leh naupangte thlavâng a hauh tlat thîn a ni.

Pathumnaah chuan dam lo leh phârte an ni. Juda-hote tân chuan phâr natna chu Pathian ânchhia, an thil hlauh ber pakhat a ni, dam lohnate pawh thiltih sual vânga Pathian hremna-a an ngaih vângin mite hmuhsit an hlawh fo. Chuvângin, Lal Isuan rawngbâwlna atân hun a hman tam ber pakhat chu tihdam rawngbâwlna hi a ni.  A zirtîrte rawngbâwla chhuak tûrte pawh dam lote tidam tûr leh phârte ti thianghlim tûrin a tîr chhuak thîn a nih kha, Lal Isua rawngbâwlna pawimawh tak chu a zuituten an chhunzawm zêl a. Khawvêl ram tinah Missionary-te hi tihdam rawngbâwlna bul tantu pawiamwh tak an ni zêl a. India ramah pawh tûn lai thiamna hmanga tihdam rawngbâwlna rawn tantute chu Kristian Missionary-te niin tûn thlengin Mission Hospital-te hian chanvo pawimawh tak an la nei reng a ni. Tûnah hian he rawngbâwlna hi BCM chuan kawng hrang hrangin a kalpui a:

1. Kristian Hospital Serkawn: Khum 100 awmin Doctor specialist 4, Medical officer 7 leh Dental Surgeon 2 nên thawktu 154 kan awm mêk a. Lunglei district mai bâkah district dang atang pawhin dam lo engemaw zâtin min rawn pan ve reng a ni. Kum 2018 chhûng khan dam lo 23158 OPD-ah en an ni a, 3607 admit an ni a, operation 1137 neiin nau 499 an piang bawk.

2. School of Nursing: GNM zir theihna school tha tak kalpui chhunzawm a ni a. Kum tin students 20 lâk an ni a. BCM–in Professional Institution kan neih hmasak ber leh Human Resource Development atâna kan hmalâkna pawimawh ber pakhat a ni. Mizoram leh India ram hmun dangah leh foreign thlengin kan nurse zir chhuakte hi an thawk a, missionary nurse engemaw zât an awm bawk a ni. GNM student-te zîngah hian kum tin MNC exam-naah top 10-a tling engemaw zât kan nei thîn. Tûnah hian BSc (Nursing) zir theihna tur Nursing College din tura ruahman mêk a ni a.

3. Kristian Hospital Lawngtlai: Christian Hospital Lawngtlai hi kum 2007-a din niin tûnah hian khum 37 awmin Doctor 2 leh staff 35 kan thawk mêk. Kum 2018 chhûngin dam lo 6087 OPD-ah en an ni a, 1075 admit an ni a, dam lo 101 zai an ni. Dental clinic pawh Lawngtlaiah hian Serkawn atanga Dental Surgeon te kalin regular taka neih a ni.

4. Peripheral Clinic: Thingtlâng lamah a mamawhte tân clinic a khât tâwka neih thin a ni a

5. Poor fund: Poor fund hi dam lo harsa zâwkte tâna Pathian hmanraw pawimawh tak pakhat a ni. Damdawiina inenkawlna man pe thei lote mi engemaw zât tanpui an ni thîn. Mi tam tak tân malsâwmna a ni a, mite pawhin a tangkaina hriain Poor fund-a rawn pe hi mi tam tak an lo awm ta zêl a, a lâwmawm hle mai. Hospital Sunday thawhlâwm pawh hi Poor fund-a lût tur a ni. Poor fund-a sum lût hi dam lote ta a nih angin account hrana vawn a ni a. Dam lo mamawh Doctor leh Nurse ward incharge tena tanpui ngai ngei nia an hriatte tanpui an ni thîn. Kum 2018 chhûng khan Poor fund atâna sum hmuh chu Rs. 22,63,118.00 a ni a, pêk chhuah chu Rs. 26,18,970.00 a ni. Sawrkar nêna thawhhona tha tak neiin, a bîk takin Health Department lam nên hian kawng tam takah kan thawkho a ni.

6.Human resource development: Nursing school bâkah hian thawktute thiamna sâng zâwk nei tûrin kan intir ve reng a. Doctor, Nurse, Lab. Technician etc engemaw zât zirna sâng zâwk nei tura intirh a ni thîn. Tin, CMC Vellore-ah hian MBBS leh PG zir tur sponsorship pêk an ni bawk thîn. Tûnah hian Doctor PG zirlai 1, MBBS zirlai 2 leh Post Basic Diploma Nursing zirlai 4 deputation leh sponsored-in an kal mêk.

BCM member kan nih angin he rawngbâwlnaa hmasâwnna kan neihte hriat kan duhin ka ring a, hêng hi Pathian malsâwmna vang liau liau a ni. BCM hi Mizoram chhim lama tihdam rawngbâwlna kawnga hmahruaitu kan lo ni reng tawh thîn a. Tûnah pawh hian Sawrkâr leh Private Hospital tha tak tak lo awm tawh mahse, kawng tam takah hmahruaitu la ni vein mi tam tak tân malsâwmna kan ni ve zêl a. Tûnah hian ICU, Ventilators (Dam lo thâwktîrna khâwl) neiin Mizoram chhim lam ICU nei awm chhun kan ni rih a, Dialysis service te neiin mi tam tak tân damna hmanrua an ni a. Laparoscopic surgery (inverha zaina) leh URSL/Cystolitholapaxy leh RIRS (Phing, Kal leh zun kawnga lung awmte chhut kehna) tih theihna awm chhun  Mizoram chhim lamah kan la ni rih bawk. Tûnah hian Lithotripsy khâwl lei tûra hma lâk mêk a ni bawk.

Tin, Laboratory, X Ray, Dietary service hmasâwn zêlin dam lo enkawlna kawngah nasa takin hêng hian min pui a ni. Endoscopy, Ultrasound leh Pharmacy service te pawh tha taka chhunzawm a ni a. Rilru leh Thlarau lama tanpui ngaite tân Chaplaincy service kalpui mêk a ni bawk. Kristian Hospital Serkawn, Lawngtlai leh Nursing School lamah Cabin, Wards, Class rooms etc engemaw zât kan neih belh a, Auditorium/Examination Hall te neiin duhthusâm vek ni lo mahse, Pathian malsâwmna azârah nasa takin hma kan sâwn bawk.

Pathianin mi thahnem ngaite kaltlangin OT (In zaina) leh labour room (nau neihna) changtlung tha tak, Minor OT, Chemo treatment (cancer enkawlna room) leh Conference Hall tha tak min pe a. Christian Hospital Lawngtlaiah 1st floor peih fel niin cabin tam zâwk leh special ward te neih belh a ni bawk.

He rawngbâwlna hi huapzo rawngbâwlna niin eng hnam pawh, eng sakhua pawh, mi rethei leh hausa tumah thliar hrang lova an mamawh ang zêla enkawlna a ni. ‘Hêng ka unau tê ber chunga in tih chu ka chunga ti in ni’ tia Lal Isua Krista thusawi chu tûn thlengin a la dik reng a, awmzia thûk tak a la nei reng a. Chuvângin, BCM pawhin he tihdam rawngbâwlna hi a chhunzawm zêl a ni.

A tâwp berah chuan Medical Superintendent nihna anga thuchah ka ziah hnuhnûng ber a ni tawh dâwn a. Pathian leh Kohhranhote he dinhmun pawimawh tak kum 6 lai tling lo tak chunga mawhphurhna min chantîrtute avângin lâwm thu ka sawi a. Ka thawhpui zawng zawngte hnênah pawh Baptist Today kaltlang hian lâwm thu ka sawi tak meuh a ni. BCM member zawng zawng leh BCM member ni lêm lote pawh he rawngbâwlnaa thahnem min ngaihpuitu zawng zawngte vângin lâwm thu kan sawi a, in theih tâwk tha ber theuh hmawlhte suih etc atanga thil lian tham tak tak thlenga min rawn chhawmdâwltute in hlu tak meuh a ni.

BCM member zawng zawngte he rawngbâwlnaah hian kan tel ve a, kan ta a ni tih kan hriat theuh a pawimawh a.  Thawktute hi mihring ve mai, tlin lohna tam tak nei kan nih avângin tawngtaipui kan ngai reng a. Tawngtai, fuih leh zilhna te hmanga theih anga thawktu zawng zawngte pawh min hre reng tûrin kan inngên duh bawk a ni. Medical Science hi thang zêl a nih avângin kawng tam takah hmasâwnna tur leh mamawhte kan la nei dâwn a. Tin, Nursing College te la din tur kan nih avângin Kohhranhote kan tangho zêl bawk dâwn nia.

Posted in BCM News.

admin