Kristian Hospital Ni-Feb 19

Tun Pathianni, February 19, 2012 hi Mizoram Baptist Kohhran Ni Pawimawh – Kristian Hospital Ni (Special Sunday) a ni a. he Ni hi Mizoram Baptist Kohhran te chuan Biaik In tinah hmangin Zing inkhawm-ah hemi pual hian thuchah ngaihthlak a ni ang. Kumin Kristian Hospital Sunday thupui atan  ‘Dam lo te tidamula’ (Mtt.10:8)”  tih thu a ni ang a,  hemi puala thuchah buatsaih chu Kohhran tinah chhiar chhuah a ni ang.


HOSPITAL SUNDAY THUCHAH
– Dr. Lalramzauva, Medical Superintendent

Tidamtu kan Lalpa Isua Krista hmingin Kohhran mipuite chibai ka buk a che u. Kan Hospital rawngbawlna chuan kum 89 a lo tling ve ta reng mai, a kum tam tawh dan atanga chhut chuan a hmasawn dan hi chu muang kan ti deuh vek hlawm awm e, hmasawn leh thanna hi kan mamawh em em lai in tihdam rawngbawlna awmzia dik tak kan hriatthiam a tul hle bawk. Mi ram ang bawkin kan ramah pawh medical hna hi sumdawnna hlawk tak a ni ve ta a, private hospital tha tak tak a lo ding zel a, hengte hian sum an lakluh pawh a tha a hmasawnna pawh a chak, hei hi kan ram mipuite tan thil lawmawm tak pawh a ni. Kan Kohhran hospital hi erawhchu private nen khaikhin theih a ni lo, kan rate a hniam a, mi thahnem tawk tak sum nei hauh lo te pawh kan kep reng an tul bawk a, sum neih loh vangin tumah kan hnar thiang lo va, kan hnar ngai hek lo, chuvangin kan sum lakluh hi private hospital te ang chuan a tam thei lo tih hria ila.

 

 

Tunlai dinhmunah kan ramah sorkar leh private hospital tha tak tak a awm tawh hnu hian Kohhran hian he rawngbawlna kan kal pui zel hi a la tul em, tih pawh mi thenkhat chuan kan ngaihtuah thin awm e, thil chhut tham tak pawh a ni reng e. Kohhranin tihdam rawngbawlna kan kalpui chhan hi kan Lal Isua rawngbawlna chhunzawmna a ni, tih kan hriat reng a tul. Mipuite leh a thawktu te ngei pawh hian hei hi kan chian a tul a, RAWNGBAWLNA RILRU pu lo va eizawnna leh sum hmuhna anga thawh a hlauhawm hle. Damlo enkawl hna hi hmangaihna tel lo chuan hna hahthlak tak a ni, hunbi mumal nen a thawh ve theih lohva englaipawh a inrin a tul fo thin, mi tamtak chuan hei hi kan tlin lo fo reng a ni. Kohhran hoten min tawngtai pui reng tur pawhin kan ngen  che u a ni.

 

 

Kan rawngbawlna hi Serkawn leh Lawngtlai-ah a ni ber a, BCM anga kan ngaihtuah chuan heng Hospital te rawn pan phak lo tan tangkaina kan nei lo, tih mai awl tak a ni. Mipui tam zawkin kan hmelhriata kan chhawr theih nan thingtlang hmun hrang hrangah clinic neiin kan feh chhuak thin a, hei pawh hi a tulna ngaihtuah chuan kan la bial zau tak lo hle, kan theih leh kan tlin tawk chuan hma kan la ve zel e.

 

 

Nursing school kan neih hi Zoram mipuite tana thil hlu tak a ni a, Mizorama nurse training na hmasa ber a ni nghe nghe. He zirna hi Zoram kil tin atangin kan chhawr tawh a Zoram pawn thlengin he schoolah hian zirlai kan nei tawh a ni. Kan nursing school hi Nurse zir chhuah theihna leh mite tana eizawnna tling thiamna pek chhuah na satliah mai a ni lo va Kristian nurse tha tak chher chhuahna tura kan kalpui tlat avangin kan Nursing school chhuak te hi mi pawhin an fak viau thin, duhthusam  chu thleng dik vek lo mahse hemi kawngah hian kan hlawhtling thawkhat viau a ni.

 

 

Medical  Laboratory Technician (MLT) training na kan kalpui mek bawk a, hei hi kan BCM school BHSS nen tangkawpa kalpui a ni, medical lam a nih avangin Hospital lamin kan enkawl tam deuh zawk a, kan mawhphurhna ah kan la deuh ber, hei hi thil thar deuh a ni a, pawl sawm passed tana zir theih  class XI leh class XII zirna peng khat a ni a, kum hnih course a ni. Heta zir chhuak te hi Medical Laboratory ah chhawr theih (qualified) an nih avangin eizawnna tlinga inzirchhuahna kawng hnai tak a ni a, batch hnih  in an passed chhuak tawh a, hna an hmu tawh hlawm a, hemi chunghangah pawh hian kan naute hi hna la tu ten an duh viauva, an hnawng lo, tih report kan dawng thin a kan lawm hle.

 

 

Nauhnuchham enkawlna (BCO) hi medical hnuaiah a la awm rih a, hetah hian nausen, an nuten an thihsan chauh enkawl tura policy nei kan ni, naute 20 -30 inkar kan nei deuh reng a, tunlai khawvel, HIV leh natna dang hluar chhoh zel naah hian he rawngbawlna hi hna pawimawh tak a ni chho zel dawn a, thawktute an hah thei hle a, inenkawldan phungah hma kan sawn ve hret hret a, a bik takin Nurse senior  pakhat full time a a duty hnu hi chuan naute pawh an hrisel tha in an duhawm hlawm hle, hna hautak tak nimahse min ti lawm em emtu rawngbawlna, chhanchhuah hna pawimawh tak thawhna a ni.

Hospital hian zawi zawi chuan hma kan sawn ve a, tunah hian Mizoram chhim lama kan la neih loh zunkawng lam enna khawl, CYSTOSCOPE nei turin hma kan la a, cheng nuai 15 vel senna tur a ni a, Vellore-ah kan in train tawh a, khawl kan chah mek a reilo teah a lo thleng ang. Tun hnai-ah TKP diamond Jubilee lawm nan Pulseoximeter leh monitor  khawl tha tak an rawn donate a kan lawm hle., ICU nei turin ruahmanna siam mek a ni bawk. Dental doctor 2 kan nei a Serkawnah pakhat, Lawngtlaiah pakhat, Dr.Ruata hian Delhi ah zirna sang zawk a bei mek a, Dental service changtlung deuh zawk neih thuai kan beisei a ni. Building hna pawimawh tak tak kal lai a awm nual a, Serkawn a kawngpui an a sak thar hi Hospital Annexe building tih a ni a, kan Hospital foundation day 10th February khan Rev.C.Ngurhneman Pathian hnena hlanna a nei a, hei hi a chhawng hnuai room 5 dawr atan luah tir a ni a(pakhat hi State Bank in ATM dah nan an hmang) a chhawng chung zawk ah guest room pali leh dining hall a awm, Guest room hi hospital mamawh kan la neih theih loh te zinga mi kha a ni a, kan lo nei thei ve dawn ta hi kan lawm hle

 

 

Kum tam tak chhunga mamawh langsar tak, Nurse Hostel chu  kan lo rel tan ta a, kan lawm hle, Tin Hospital tana thil pawimawh tak, inkhawmna (Chapel) kan rel tan mek a, kan phur hle a, student leh staff zawng zawng kan in hnatlan chhawk nghe nghe a ni. Lawngtlai main building hna a kal mek zel a, a building hlui la awmchhun, a tir te a bul kan va tanna Assam type building kha kan thiat zo ta nge nge a, a lunglen thlak hle, BKHP ten Lawngtlai tan sum an thawkchhuak nasa hle a, kan lawm hle. Solar power project kan buaipui mek a, a khawl zawng zawng a rawn thleng tawha, an bun mek, 25KV power pe thei, cheng nuai 115 man a ni a a that viau kan beisei, Central lam atanga hmuh a ni a, ZEDA min buaipui sak a ni.

 

 

Building leh khawl ilo, infrastructure an tih thin lamah hi chuan hma kan sawn ve thei zel a, Hospital tha nei tura hma kan sawn theih rih  lohna chu Doctor thawk tur kan inhmu zo lo hi a ni, hei hi Kohhran mipuiten kan hriat a kan vei tlan a tul hle, mi inpe kan hmu tlat lo va, advertisement kan chhuah leh chhangtu kan hmu lo va kan han sawm deuhte pawhin an duh lo zel rih si, mi inpe kan Kohhran chhungkaw zingah kan hmuh loh reng chuan Hospital rawngbawlna kan kalpui theih loh hun pawh a la awm dawn tih a chiang reng mai, doctor MBBS post pahnih leh specialist post pahnih a ruak sa reng a, hetiang mi inpe thei awm, sawm tur hria te in awm chuan inbengvar chhuah pawh kan tul hle Pathian hnenah pawh  i dil  reng ang u. Ka lawm e.

……………………………

 

 

SERKAWN HOSPITAL SAK DAN
– Rev. Dr. HS. Luaia

 

 

A hming: A hming kan sak dawn hian SERKAWN HOSPITAL tih kan tum a, Nimahsela Bazar veng Upa Vannghaka chuan Serkawn Hospital tih hi a duh lo va, Hospital Serkawn a awm tih tur a ni, a ti a. Nimahsela keinin a sei lu deuh lo maw? KRISTIAN HOSPITAL SERKAWN? i ti ang u kan ti a, kan pu ta a ni.

 

 

    Atirah chuan Assam Type in te tak tea sak a ni a. A chhuat chu thing phel a ni a, In hnuaiah ka Kelin riah an tum thin a ni. Amaherawchu tanpuina kan dawn tak nual avangin concrete a sak kan tum ve ta a. Chutih lai chuan keini lam chuan concrete kan la tih ngai meuh loh avangin Rev. Zairema chu Aizawl atangin a lo kal a. Balu tha min zawnpui a. Tlabungah Tuipui balu tha lai kan zu en a. Chu mi hnuah chuan Darzo Tuipui kaia balu kan han en leh a.

 

 

Tuipui balu kan en hawn lam chuan Tuipui lung pakhat chu Lungtat atan ka hawn a, a hnung lamah kan Jeep-ah ka dah a. Kawng chho a kan kal laiin kan Jeep chu a break a failed ta thut mai a, kham zawna kan kal lai a ni a. Kan hnung tawlh ta a, kan tlak hmain a hnung lama thu chuan Tuipui lung ka hawn chuan a hnung lamah a kam hlauh mai a. Kan dingthei ta a ni. Chu mi lung chu ka la hmang reng a, in hmuh duh chuan ka kawtah ka la dah reng mai.

 

 

Rev. Dr. Zairema hi thil hre tak a lo ni a, min rawn tanpui a ni. Concrete-a kan sak dawn hian a in hlui hi sawn a ngai ta tlat mai a, chu tih laia kan kohhran mistiri hotu chu Pu Lalrawna a ni a, Ani chuan a in hlui chu thiat lova sawn dan a lo thiam hlauh mai a. In sakna dal lovin kalkawng lamah a sawn ta a ni. A mak ka ti hle mai. Hetih lai hian a  hminga hotu ber ka nih lai a ni a, Pathian in min tanpui a, tanpuitu tha tak tak kan nei a ni.
 

 

A tawp berah chuan kei chu Hospital Chaplain ka ni dawn ta tlat mai a, ka ten chhe si a, ka hreh em em a ni. Nimahsela Pathian tanpuiin ka han thawk ta a. Thla hnih vel hnuah chuan ngaiah ka nei ve thei ta a ni, Tun hmain Pastor Zathanga chu Damdawi inah hian damlote tawngtai sak turin a kal fo thin a. A lawmawm hle a ni. Ka han thawh ve chinah chuan Lunglei nen kawp a ngai ta a. Zing lamah Serkawnah ka thawk a, tlai lamah Lungleiah ka kal thin a ni. Lungleiah chuan Nurse ho nen devotions kan zu nei thin a ni. Devotion-a kan hla sak chuan ka rilru a khawih tlat mai a –
Harsatna tawk lo Rawngbawltu awm maw?
Lal Krista tana beitute.
tih kan han sak chuan ka thinlung a khawih nasa hle a. Vawi leh khatah ka mittui a lo liam thut mai a ni. Serkawnah pawh hian tisa natna ni lo va, thlarau lam natna veitu an awm tlat mai. Pakhat phei chu Durtlang Hospital-ah a insawn hial a. Chutah chuan piantharna a va chhar ta hlauh mai a, Serkawn Biak in kawta kan han inhmu chu a hlim em em a ni.

 

 

Hospital hi Ringtu nun siam thatna a ni a, kan Chaplain pawh hi i tawngtaipui thin ang u.