Kristian Hospital Ni – February 21

Christian Hospital Serkawn

Tunkar Pathianni, February 21, 2021 hi Mizoram Baptist Kohhran ni pawimawh, Kristian Hospital Ni a ni a, kumin Kristian Hospital Ni thupui atan “Nang pawh chu ang bawk chuan va ti ve rawh”  (Luka 10:37) tih hman a ni ang.

Hrileng avangin Kohhran hoten hun rei tak Inkhawm Programme kan hmang thei ta lo va. Sorkarin ruahmnanna a siam angin Kohhran tam zawk chuan February thla atangin Biak In hawngin Inkhawm phal zat bithliah anga Inkhawm an buatsaih laiin, Khawpui Kohhran tam zawk erawh chuan Inkhawm Programme an la hmang thei lo a ni.

Hetiang a nih avang hian Krisian Hospital Ni pawh hi Kohhran tam tak chuan kan hmang hlei thei dawn lo va. A hmang thei Kohhrante erawh chuan hlawk taka hun an hman theih nan Headquarters chuan duhsakna a hlan a ni.

Tawngtai rual Thupui  :

  • Kan Hospital hi mi tam tak tana tisa leh thlarau damna hmun a nih zel theih nan.
  • Doctor, Nurse leh Hospitala thawktu zawng zawngte hian Isua Krista rilru putpuia lainatna dik tak nen damlote an enkawl theih nan.
  • Mithiam (Specialist) thawktu kan neih belh zel theih nan leh tuna zir mekte tan.
  • Nursing College tur hi a hun taka kan inpeih chhuah theih nan.
  • Hmunpui zawk leh phai lam pan theilo, mi rethei leh harsa zawkte tan kan Hospital hi Pathianin a hman zel theih nan.
  • BCM Medical & Health Departmenta thawktu zawng zawngte tan.

Hemi ni puala Programme buatsaih ‘Kristian Hospital, Lawngtlai Bihchianna’ tih chu Zan dar 9 ah LPS 12 leh ZONET Rinna ah kohhran mi te entheiha pekchhuah a ni ang.

……………………….

Thu chhiar chhuah tur  :

(Thilpek lakkhawm hma hun remchangah chhiar chhuah tur a ni)

BCM  in tihdam rawngbawlna hna kan thawh hi kan Missionary hmasaberte, Sap Upa leh Pu Buanga te rawn tan kha a ni a. Kan ram thim tak rawn su eng tute hian a tir te atangin an rawngbawlna kipui pakhatah an lo hmang tawh a ni. Hospital tak hi chu kum 1923 February thla a tan a ni a. Tichuan Hospital hi kum za a tling dawn tep ta a, a kum zana Jubilee, centenary kan lawm thei tep a, kan in buatsaih tan mek a ni.

Tun dinhmunah hian Serkawnah khum 100 awmna Hospital changtlung ve tak kan nei a. Mizoram chhim lama Hospital dangte la neih loh natna khirh enkawlna thenkhat, ICU-te, Dialysis leh zunkawng leh Kala lungte awm chhut kehna leh helam enna khawlte, zai hawng lova a verha kawchhung zai theihnate kan nei tawh a, Pathian hruainain hma kan sawn ve hlek hlek a ni. Lawngtlaiah khum 40 awmna Hospital kan kalpui mek bawk a; thawktu indaihlohna avangin duh angin a la changtlung tawk lova, dawhthei takin nghak ila, Pathianin min hruai anga, Lawngtlai Hospital pawh tichangtlung tura hma lak mek zel a ni e.

Serkawnah hian Nursing School kan nei a; Mizorama Nurse zirna hmasaber, kum 1919 a bul lo tan tawh kha a ni a. Tunah hian Nursing College a hlankai tura hma lak mek niin, ruahmanna ang chuan tuna Nurse zirlai awm mekte hi GNM course zir hnuhnungber an ni tawh dawn a, kumtharah chuan B Sc nursing kan zirtir tawh dawn a ni.

Hospital hian Doctor thiam (Specialist) kan mamawhzia mitinin kan hria a, Doctor thiam kan neih theihna turin nasa takin Kohhran hote kan tawngtai a nih kha. Kan tawngtai chhanna kan hmu a, kan Doctor thenkhat ten Specialist zirna an hmu ta a. Tunah hian Doctor 5 laiin an zir mek ta a; kumin kum laihawlah pakhat chu a lo chhuak thei anga, a dang pawh nakkumah an lo chhuak anga. Midangte pawhin zirna seat an hmuh zel kan beisei a; kum reiloteah Hospital changtluk tak kan ni ve thuai dawn e. Tun dinhmun takah hian zirna sang zawka kan kal chhuah nual avangin Doctor kan indaihlo deuhva, reiloteah kan zia ve leh mai ang.

Hospitalah hian damlo, sum lama harsa ve tak takte kan enkawl thin a, hengte hian enkawlna inthlahrung lova an lo dawn ve theih nan, harsa-te pual Poor Patient Fund kan neih hi a tangkai hle a. Kum kal ta (2019-2020) chhunga mimal thahnemngaite leh Kohhran thawhlawm atanga in rawn chhunluh kha Rs.24,20,357/- lai a ni a, damlo engemawzat, Rs.17,47,045/- laiin tanpui an ni a, a lawmawm takzet a ni.

Samari mitha anga mi harsa, natna tawkte tana rawngbawlna, Pathianin Inthawina ka duhzawng chu hei hi, a lo tih, midangte, mi harsa leh natna tuarte, mangangte tanpuina POOR Fund ah hian he inkhawm thawhlawm pawh hi a lut leh dawn a; thahnemngai taka thawh leh turin kan insawm a ni e. Kohhran hote Lalpan malsawm che u rawh se.