Kristian Hospital Ni hman a ni dawn

Christian Hospital Serkawn

Tunkar Pathianni, February 16, 2020 hi  Mizoram Baptist Kohhran ni pawimawh, Kristian Hospital Ni a ni a, Tualchhung Kohhran tinah he Ni pual hian hun hman a ni ang. Kumin Kristian Hospital Ni thupui atan “Tihdamin kan awm ta” (Isaia 53:5). tih hman a ni ang. Headquarters atanga tawngtai thupui buatsaihsa hmangin tawngtairual a ni ang a, hemi ni a Inkhawm thawhlawm hi Christian Hospital Poor patient Fund a hman turin Headquarters-ah thehluh tur a ni ang.

Dr. Lalramzauva, Medical Superintendent, Christian Hospital chuan Vairengte-ah Kristian Hospital Ni hi an hmanpui a, Pathianni-ah Hospital report pe-in thuchah a sawi bawk ang. Rev. Lalremsiama Ralte, BCM Worship & Music Department chuan BCM Electric Lunglei-ah He Ni hi hmangpuii, Upa Thanzinga Sailo. Lab Technician pawhin BCM Zion, Lawngtlai –ah hun a hmang ang a, Rev. Lalnghakliana, Hospital Chaplain-in BCM Srkawn-ah hun a hmang dawn a ni.

Christian Hospital Medical team te chu Dr. Laltlansangi hovin Inrinni leh pathianni hmang hian Lungrang Bial-ah Medical Clinic  nei turin an kal a, Inrinni nilengin Clinic an nei a. Pathianni-ah BCM Lungrangah Inkhawmin Rbt. Rozikpuia (Pharmacist) –in thuchah a sawi ang.  Dr. VL Chhanhimi pawhin Venghlun Unit TKP-ah hun a hmangin Upa Lalramnghaka, LDC pawhin BCM Ramzotlangah thu report pe-in thu a sawi bawk ang.

…………………….

Kristian Hospital Ni pual thuchah:

BCM Medical & Health Department a thawktu ten Kohhran mipuite tidamtu Isua Krista hmingin chibai kan b<k a che u. Mizote ramhuai bia, thing bul lung bul bia kan nih laia Chanchin |ha êng rawn chhitu missionary, Sap Upa leh Pu Buanga te khan Mizote zinga rawng an bawl tirhtê atangin tihdam rawngbawlna hi an lo tan a ni a. Mâwltê-in bul an tan a, damdawi lama training-te rawn nei hmasain, damlo hnenah damdawi an sem ve thin. Pathianin mal a sawm a, damlo tam takin damna an chang a, an Pathian thuhril hna pawh nasa takin a tisawt a nih kha.

Medical lama rawngbawlna chu lo thang lian ve zelin, kum 1923 khan Hospital kan lo nei tan ta a. Tunah chuan kan Hospital rawngbawlnain kum 100 a lo tling ve dawn hial ta. Kan hma lawk kum 2023 hi kan Hospital kum 100 tlinna a ni a, Centenary lawm nan Centenary building sak tum a ni a. X-Ray lam leh Blood Bank-te, Laboratory te leh thil dang tam takah hma kan sawn phah dawn a. Kan la neih loh CT Scan pawh lei dawn ila, a dahna in tur kan nei thei dawn tawh a ni. He hmalakna atan hian Tualchhung Kohhran tinte tawiawmna leh tawngtai puina kan ngen e.

Lawngtlai lam Area mamawhna nasa tak avangin kum 2007 khan Lawngtlai Hospital hi bul tan a ni a. A hmun hma leh building lam buatsaih chu a kal chak tha ve hle a. Doctor thawktu kan inhmuh belh hleih theih loh avangin kan phuisui tawk lo, Pathianin min hruai zel ang a, hmasawn chhoh zel kan beisei a ni.

Medical lama kan rawngbawlna kipui leh pawimawh ber pakhat, Nursing School hi Sorkar lam min phut ang leh kan kohhran Assembly pawhin a lo pass tawh angin Nursing School-ah hlankai tum mêk a ni a. Inbuatsaihna hna tam tak a awm bawk a, hemi chungchangah pawh hian Pathian hruaina leh awmpuina kan mamawh takzet a ni.

Hmasawnna tura kan mamawh ber pakhat, Doctor Specialist chungchangah hian Pathian malsawmna nasa tak dawngin kan doctor 4 laiten Specialist an zir ta mek a. Doctor eng emaw zat zirna sang zawka an kal chhuah avang hian  tun dinhmunah chuan kan indaih lo rih hle a. Kum rei lo te hnuah kan phuisui ve dawn a ni.

Sum leh paia mi harsa tam tak, Hospital-a inenkawlna nei lo an awm thin a. Heng mite hian enkawlna an dawn theihna tura hma lakna, mi harsate pual thawhlawm, Poor Patient Fund kan tih hi tangkai taka hman a ni a. Mi tam takin he thawhlawm hmang hian enkawlna an dawn theih phah a ni. Thilpek petute kut hi Lalpan tihdamna kut atan a hmang thin. Kohhran hote thilpek tling khawmin hna ropui tak a thawk zel a; damlo, tuamhlawm ngai ni lo va, a enkawltu leh tuamhlawmtu kan nih hi a lawmawmzia hria ila. Poor Patient Fund atan he inkhawm thawhlawmah pawh hian thahnemngai taka lo thlak leh turin kan ngen a che u. Lalpan in zain malsawm che u rawh se.