CHRISTIAN HOSPITAL CHANCHIN

Medical & Health Department

Medical & Health Department

Lal Isua Mission-a pawimawh berte zinga pakhat tihdam rawngbawlna chu chhunzawmin, kan Zosâp missionary-te chuan an rawn thlen veleh an tan nghal a. Rev F.W. Savidge (Sap Upa) leh Rev J.H. Lorrain (Pu Buanga)-te chuan kum 1903 khan Serkawnah awmhmun an khuar a, an awmna in pêng (pindan) pakhat chu damdawi semna (dispensary) atan an hmang a, chu chu Sâp Upa chuan a enkawl a, thingtlang khua atangin damdawi la turin mi tam tak an lo kal thin. Tin, damdawi kengin thingtlang khua an fang a, a mamawhte hnenah damdawi pein, tawngtaina nen rawng an bawl thin. He rawngbawlna hian mite thinlung a hnehin Lal Isua chanchin an sawi nghal a, mi tam tak Krista hnena an hruaina hmanrua a ni.

Hospital din dan leh thawktu doctor-te kan neih dan:

Baptist Missionary Society chuan tihdam rawngbawlna pawimawhzia hriain Nurse Miss E.O. Dicks (Pi Dawki) an rawn tir a, 19th March 1919-ah Serkawn a lo thleng a. Ani hi Mizoram chhim lama Medical Missionary hmasa ber a ni. Kum 1922-ah Missionary Nurse dang Miss E.M. Oliver (Pi Zoduhi) a lo chhuak ve leh a. An pahnih chuan an thawk dun ta a. A tirah chuan Sâp Upa leh Pu Buanga-te Bungalow-ah an awm ve a, kum 1921-ah an awmna tur (tuna Medical Superintendent Quarters) hi sak a ni ta a. Damlote chu anmahni chenna in pêng pakhatah an enkawl mai thin. An tûl theih em avangin anmahni tanpui tur mizo hmeichhia thenkhat chu training pein damlo enkawl dan an zirtir bawk thin.

Christian Hospital(OPD)March 14, 1921-ah Damdawi In sa tanin, kum 1923-ah zawh a ni. February 10, 1923-ah Mizoram Bawrhsâp (Superintendent) W.L. Scott-a nupuiin a hawng. Damlo enkawlna leh damdawi semna tura sak a ni. Khum 30 a awm a, hmeichhia leh naupangte chauh admit theih an ni. Tichuan, February 10, hi Hospital Foundation Day atan hman a ni ta zel a. Hetih lai hian Lunglei lam pangah damlo enkawlna tur hi a la awm lo va, mipuiten an chhawr hle a ni. Damdawi In chu a chung rangva, a chhuat thingphel, a bang dap a ni. Lung rem chungah a kânga sak a ni. Hun lo kal zelah Damdawi In chu a theih anga tilian zelin hmeichhia leh naupangte tan chauh ni lo, mahmawhtu apiangte enkawlna tur atan buatsaih a ni ta a. Missionary nurse-te pawh an lo chhuah belh zel a, Pi Dawki leh Pi Zoduhi hnuah Pi. Thari (Miss.Mayble), Pi Zomuani (Miss.I.M.Good), Pi Zohnemi (Miss.M.W. Shearer), Pi Zothlamuani (Miss.Davies), Pi Hrangdawli (Miss.Baker), Pi Zohnuni (Miss. E.M. Maltby), Pi Sangi (Miss. K.A.Cox), Pi Zomawii (Miss. J.T. Smith)-te an lo chhuak a, mi tam tak tan malsawmna an ni.

Hetih hun lai hian Doctor nghet an awm lo va, Chandraguna (Bangladesh)-a BMS missionary doctor-te a khât tawkin an rawn kal a, mi zai ngai an zai thin. Vanneihthlak takin BMS missionary doctor China-a thawk mek Dr. H.G. Stockley chu Serkawna thawk turin BMS chuan a rawn dah ta a. April 18, 1957-ah Serkawn an lo thleng a. A nupui Pi. Zomuani pawh nurse a ni a, hnimhlum a pe thin a, Hospital account pawh a vawng bawk thin. Dr. H.G. Stockley hi doctor inpe leh thiam tak, mit (eye) lam thiamna bik nei a ni a. Mizo mipuite pawhin an thlamuanpui hle a, a hmingah pawh Zomuana an phuahsaknghe nghe. Dr. Zomuana-te nupa hi kum 1962-ah Mizoram atanga an chhuah a lo tul tak avangin, Doctor nei lovin hun eng emaw chen a awm leh rih a. Kum 1964-ah Dr. C. Silvara, BCM-in CMC Vellore-a MBBS zir tura a tirh chuan zovin a rawn zawm ve ta a. Ani hi Mizo Medical Superintendant-a kan neih hmasa ber a ni a, doctor thiam tak a ni. Kum 1972-ah zirna sang zawk zir turin BMS sponsored-in Australia-ah a kal ta a. Dr. C. Silvara awm loh hnu hian Khasi doctor, Dr. Faith Rangad, CMC Vellore atang MBBS zir chhuak chu Feb 1973 atanga August 1974 thleng a rawn thawk ve leh hlauh a. Ani pawh hi Obligatory bond thawk mai a nih avangin a chhuak leh a, doctor mumal nei lovin hospital chu a awm leh a, BCM hruaitute rilru pawh a buai hman hle a ni.

Medical & Health Department

Medical & Health Department

Hetia Hospital dinhmun a chhiat lai tak hian Dr. Lallawma M.S. leh a nupui Dr.Lalsangliani-te chu Pathianin min pe hlauh a, anni hi CBCNEI hnuaia Guwahati-a thawk lai an ni. Atirah chuan kum 2 chauh thawk tura inbiak a ni a, mahse mamawhna leh an inpekna avangin pension-a an chhuah kum 1999 thlengin an thawk ta a ni. Anni hun lai leh tun hun thleng hian doctor eng emaw zat kan lo nei ta a. Chungte chu, Dr. Sangzuala Pachuau (Anaesthetist), Dr. L.H. Lalrammawia (Gynaecologist), Dr. K. Vanlallawma (Family Medicine) (retired), Dr. Lalramzauva (Family Medicine), Dr. B. Laldinliana (Gen. Surgeon), Dr. B. Lalrinzauvi, Dr. Lalzarmawii, Dr. H. S. Lalchungnunga, Dr. Hmingthanmawii, Dr. Vanlalhmuna Kompa, Dr. V.L. Chhanhimi Jahau, Dr. Laldinsangi, Dr. Goldie Lalrinsangi, Dr. Joseph Vanlalhruaia (Dental Surgeon), Dr. C. Lalruatkima (Dental Surgeon), Dr. Isaak Lallawmkima(MD), Dr. LH Lallawmsanga(MBBS) te an ni. Tin, heng bakah hian CMC Vellore-a MBBS sponsored obligatory bond rawn ti kan nei bawk thin. Medical Superintendant lo ni tawhte chu: Dr. H.G. Stockley, Dr.C.Silvara, Dr.Faith Rangad, Dr.Lallawma, Dr. L.H.Lalrammawia, Dr.K. Vanlal-lawma, Dr.Lalramzauva leh Dr.B.Laldinliana te an ni.

Nursing service chungchang:
Nursing Service hi Hospital rawngbawlna-ah chuan a bulpui ber pakhat a ni a, a tel lovin a function thei lo. Kan Hospital-a nursing service hi March 19, 1919-a B.M.S-in an rawn tirh nurse Pi Dawki’n Serkawn a lo thlen atang khan tan a ni. Missionary nurse dangte pawh lo chhuakin nursing service tha tak Pathian zarah a awm thei ta a. Mizo nula thenkhatte damlo enkawl dan mawl te tein, Hygiene, First Aid, Midwifery, leh Dressing-te an zirtir a. Hetih laia an zirtir chu Nurse an zirtir chhuahte nen chuan Nursing service-ah chuan an thawkho zel a. An zirtir chhuahte chu an tangkai em em thin. Mission school-ah pawh class-te lain First Aid te, Hygiene leh nausen enkawl dan-te an zirtir thin. February 10, 1923-a Hospital sak zawh a nih hnuah phei chuan hna a tamin an tul lehzual hle thin. Hospital-in hma a sawnin Nursing Service lamah pawh mamawhna a pung chho zel a, Pi. Romawii, Pi. Lianzami, Pi. Darropuii-te rawn thawkin, anni hnuah hian nurse inpe tak takten chhunzawmin Nursing service chuan hma a sawn zel a ni. Nursing Superintendant lo ni tawhte chu Miss. Maltby (Pi Zohnuni), Miss. J.T Smith (Pi Zomawii), Pi Zirthangi, Pi Hmingthanmawii, Pi H. Vanthangpuii, Pi Hrangthangpuii te an ni.

Medical & Health Department

Medical & Health Department

School of Nursing chanchin:
School of Nursing hi BCM-in Proffessional (thiamna bik nei leh ei zawnna atana hna thawk thei tura mite chherna) Institution kan neih hmasa ber a ni a. BCM-in mite tana malsawmna kan nih ve theihna lian ber pakhat a ni. Pi Dawki-ten kum 1919 atang khan Junior Nursing course chu bul an lo tan tawh a. Hetiang hian Nursing course hrang hrang lo kalpui tawh a ni:
1919 – 1951 Junior Nursing
1952 – 1969 General Nursing and Midwifery
1970 – 1979 ANM Course
1980 – 1987 Health Worker (Female)
1988 – tun thlengin General Nursing and Midwifery

School of Nursing leh Hospital Nursing Service kawpa hotu pakhat hnuaia awm thin chu BCM Assembly chuan April, 2004 atang chuan Nursing School lam hotu atan Principal dahin, Nursing Service enkawltu atan Nursing Superintendent a dah ta a ni. School of Nursing-a zirlaite hian Pathian malsawmna avangin result \ha tak tak an nei thin a, a lawmawm hle. Helai hmuna zirlaite hi thiamna kawng chauhva chawisan hi kan tum a ni lo va, damlo enkawlna kawnga inrin tawkna neia enkawl thei tura practical-a nursing care hna hi zirtir an ni. Pathian ram zau nan an awmna hmun apianga tangkai taka thawk thei tura tisa leh thlarauva buatsaih kan tum bawk. Kum tin batch khata students 20 zel lak an ni a, hei hi Assembly resolution bawh zuiin student 30 lak theih tura buaipui mek a ni. School of Nursing-a Principal lo ni tawhte chu: Miss. E.M. Maltby (Pi.Zohnuni), Miss. J.T. Smith (Pi Zomawii), Mrs. Zirthangi, Mrs. Vanlalthlengliani, Mrs. Hmingthanmawii te an ni.

Hospital service dangte:

Medical & Health Department

Medical & Health Department

1. Laboratory leh X-ray department hi tun hma chuan Pu.C. Hualkunga’n a enkawl a. Tunah chuan Laboratory changtlung ve tak Pu.Thanzinga Sailo leh a thawhpuiten an enkawl a. Tin, X-Ray hi Pu.Johny Lalremruata leh a thawpuiten an enkawl bawk. Pharmacy hi Pu. Z.D. Pasena hovin bul tan a ni. Tunah chuan Pu. K. Rothuama leh a thawhpuiten an enkawl a. Office lamah Pu. K. Kapkima leh Pu. V. Rohlira ho an thawk thin a, tunah chuan Pu. Vanlalrema Khiangte leh a thawhpuiten Office hna leh Management hna an thawk.

Medical & Health Department

Medical & Health Department

2. Damlo enkawlna kawngah hian Laboratory leh X-Ray bakah Ultrasound, Endoscope, ECG, Cystoscope, Blood Banking, Ophthalmic service leh ICU te kalpui mek a ni a. O.T. leh Labour room changtlung thawkhat tak kan nei a. Dialysis nei tura hma lak mek a ni a, Dietician mumal tak neiin Hospital diet tha tak pek a ni a. Tin, Hospital faina leh thianghlimna kawngah menial leh puan sutu lam inpe tak tak kan nei bawk a ni.

3. Damlo, students leh staff-te thlarau nun chawm turin Chaplaincy Committee a awm a, Chaplain hi Pastoral Department atangin deputation-in dah thin a ni. Ni tin zingah devotions neih thin a ni a, nilai tlaiah tawngtai inkhawmna neih a ni bawk. Tin, ward-ah tawngtaina neih a ni bawk thin. Zanah a thei apiang tan inkhawmna buatsaih a ni. Hun pui e.g. Good Friday , Christmas etc-ah te damlote tan leh thawktute tan programme buatsaih a ni thin. Kum tin Chaplaincy committee buatsaihin Staff leh students-te pualin retreat neih thin a ni bawk.

Medical & Health Department

Medical & Health Department

Community Health Programme:
Thingtlang leh hmun kilkhawr zawk, doctor awm lohnaa mite tan clinic neih thin a ni a, mahse sawrkar lam atanga tanpuina kan dawn thin a lo tâwp tak avang te, thawktu indaih lohna avang leh harsatna hrang hrang avangin duhthusamin kan nei zing thei lova. A remchan dan ang leh mamawhna azirin thawktute kal chhuakin clinic hi neih a ni thin. Mamawhna neite chuan Medical Superintendant leh Deputy Medical Superintendant hnenah thlen thin ni se. Tin, Lunglei khaw chhung Centernary Building, Falkawnah ni tin clinic neih a ni a, Doctorte in thut chhawkin investigation hrang hrang tih theih turin Laboratory, X Ray, ECG, Ultrasound dah a ni. Dental clinic pawh ni tin hawn a ni bawk.

Tuna Sawrkar nena thawhhona thenkhatte:
1. Care & Support Centre (CSC): MSACS leh FXB India Suraksha-in min offer angin HIV/AIDS veite leh an chhungte tanpuina hna thawk turin Vihaan Care and Support Centre kalpui mek a ni. Thawktu Project Co-ordinator hovin mi 7 an awm. Lunglei Distirct-a HIV/AIDS veite zawn chhuah leh tanpuina hna thawh mek a ni.

2. MSACS nena thawh hona: ICTC (Integrated councelling and Testing Centre) Mobile leh Fixed hna thawh a ni. Sorkar nena thawhhona a ni a, HIV test-na leh councelling pekna a ni, thawktu hlawh leh test na hmanrua te sorkarin an tum vek a, Laboratory technician leh counselor-te min pe a, hei hi 2008 kum tawp lam atanga tan a ni. Mobile ICTC pawh 2009 kum tawp dawnah min pe a, tin, zin velna tur motor pakhat (Bolero camper) leh a tui man te, thawktu 3, councelor, Laboratory technician 1 leh Driver a keng tel a ni. Heng ICTC unit 2-te hian tluang tak leh chak takin hma an la mek a ni. Tin, Blood Bank Laboratory staff pakhat min pein tanpuina eng emaw zat kan dawng bawk.

3. Thawhhona dangte: T.B. enkawlna lam (RNTCP), Cancer Registry, SBA training-ah te leh vaccination chungchangah sawrkar nen kan thawkho mek bawk.

CHRISTIAN HOSPITAL LAWNGTLAI

Medical & Health Department

Medical & Health Department

Kum 2005 BCM Assembly Lunglawna neih chuan Lawngtlaiah Christian Hospital Serkawn Branch 2009-a tan theih turin hawn ni se, tiin a lo passed a. He thu hi Medical and Health Department Committee leh Admistrative Committee chuan umzui nghalin BCM (R&D) Building, Lawngtlai Vengpui-a mi chu hospital atan repair-in extend a ni bawk a. February ni 12, 2007 atangin Christian Hospital Lawngtlai Branch chu mipuite pan theih turin a function a. Khum 12-a bul tanin, tunah khum 25 dah a lo ni ve ta. Tunah khum 30 leh Cabin 5 awm turin hma lak mek a ni. Hospital hi mipuiin an chhawr hle a. In zai (Surgery) pawh tih a ni thin. Major surgery-te pawh innghak khawmin Christian Hospital Serkawn atanga thawk pheiin Surgery hi tih thin a ni bawk. Hospital tan Kohhran, pawlho, chhungkua leh mi malte tanpuina kawng hrang hrang kan dawng thin a, kan lawm hle.

Tihdam rawngbawlna Kohhranin a thawh zel tulna chhante:
1. Tihdam hna hi Isua Krista rawngbawlna pawimawh ber pakhat a ni a. He khawvela a awm laia a thilmak tih zawng zawng hmun thuma thena hmun hnih vel kha tihdamna hna a ni. A thupekah pawh damlote tidam turin min chah a. Chuvangin, he rawngbawlna hi khawvela kohhran a awm chhung chuan a kal zel ang. India ram leh Mizoram ngeiah pawh tihdamna kawnga hma la hmasa leh tun thlenga mipuiin an chhawr em em chu Missionary-te din Hospital leh Medical College-te a la ni reng a ni. BCM pawh hian he rawngbawlna hi theih tawpin a kalpui a, a la kalpui zel ang.

2. Tihdam rawngbawlnaa kohhran hmalakna hian taksa damna mai ni lovin, rilru leh thlarau damna a keng tel a. Hei hi Sawrkar leh Private Hospital-te nen a inan lohna a ni. Thiamna, hmanrua, sum etc-ahte Hospital dangte kan tluk lo a ni mai thei. Mahse, hmangaihna nena taksa, rilru leh thlarau damna kan rawngbawlna hian keng tel turin hma lak a ni a. Full time Chaplain neiin inkhawm, councelling etc. neih a ni a. Tin, mi thahnemngaiten tawngtaina leh thlarau lam rawngbawlna an rawn nei reng bawk thin a ni.

3. Hospital-a tihdamna hna bakah hian hmun danga thawk thei tura thiamna nei mi chherchhuah hi a pawimawh hle a. He lai atanga zir chhuak nurse eng emaw zat Mizoram chhung leh pawn hmun hrang hrangah an thawk mek a. Missionary nurse eng emaw zat an awm tawh bawk. Tin, MBBS students te sponsored an ni a, nursing lama thiamna sang zawk nei turin thawk laite pawh intirh a ni bawk thin.

4. Tun laiin sum ngainatna a nasain, tihdamna pawh hi sumdawnna (commercialized) angin hmun tam takah kalpui a lo ni ta a. Damlo te mamawh lutuk loh enkawlna leh investigations thlengin sum hmuhna atan tihtir nite pawha lan chang a awm. Bengali hovin CMC Vellore an pan nasat em emna chhan pakhat chu an mamawh ang chiah enkawlna leh investigation an tihtir thin vang niin an sawi. Chuvangin, Mission Hospital-te hian tihdamna rintlak leh rinngam kan phak ang tawk chinah kalpui tlat kan tum a, hei hi a hlu em em a ni. Tin, damdawi leh inenkawlna manah pawh a theih ang tawkin a tihniam ve a, mi harsa zawkte pawhin an pan theih hi duhthusam a ni. Mahni thawh chhuah atanga inenkawl tur kan nih avang erawh chuan duh anga tlawma enkawlna pek a harsa thin. Chuvangin, tihdamna hnaah quality leh inenkawlna man sang lutuk tur venna kawngah sawrkar leh private-te pawh hi kohhran hian a khalh ngil vena lai a awmin a lang a ni.

Tlangkawmna.
BCM-in tihdamna rawngbawl hna a thawh hian hma an sawn ve zel a. Tunah hian Christian Hospital Serkawnah khum 100 (100 beded) awmin thawktu 138 an awm a, Christian Hospital Lawngtlaiah khum 25 awmin thawktu 34 an awm bawk. Mahse chak zawka hmasawn tur chuan mamawh kan la ngah hle. A hmasa berah chuan thawktu zawng zawngten Lal Isua rawngbawlna kan chhunzawm a ni tih hria a, hmangaihna leh ni tin inpekna thar nena rawng an bawl theih nan kohhrante i tawngtai zel ang u. Tin, Hospital hi kohhran member tinte ta a ni tih hria a, tanpui a ngaihnaah tanpuiin, thawktute fuih an ngaiha fuihin, zilh an ngaihnaahte zilh thin turin kan in ngen a ni. Doctor, a bik takin Specialist kan mamawhna a sang hle. I tawngtai ang u. Tunah hian Gynaecologist-1, Gen.Surgeon-1 leh Family medicine specialist-1 kan nei a. Anni hi kum rei lo tea retire mai tur an ni hlawm. Thawktu thar kan hmuh thuai emaw tuna doctor thawk laite hian Post Graduate degree an neih thuai emaw a tul hle a ni.

Tun lai khawvel changkang zelah hian khawl leh hmanraw thate kan mamawh belh zel a. Medical equipments te hi a to thei em em a. Chuvangin, hmanraw chi hrang hrang kan neih theihna turin kohhranten tawngtai leh thilpeka kan hriat reng an mamawh hle a ni. Nursing School lamah hian Nurses hostel hi BCM suma sak mek a ni a, hei hi sak zawh thuai kan mamawh hle a. Students tam zawk lakbelh a nih theihna turin class room, auditorium, Library tha zawk leh computer laboratory-te an mamawh hle bawk. Tidamtu Lal Isua rawngbawlna hi BCM chuan a chhunzawm zel ang a. Kohhrante hmasawn zel turin kan tangho zel dawn nia.