Kum 2021 atan Kohhran Office hawn a ni leh ta. 

Vawiin, January 7, 2021 (Ningani) khan Mizoram Baptist Kohhran chuan Kum thar atana Office kai ni hmasa ber hmangin Office an hawng tan leh ta.

BCM thawktu hmun hrang hranga Christmas leh Kumthar hmanga zin chhuak te leh mahni hmun lama hawte pawhin Office kaini hmasa ber hi ngai pawimawhin an haw kim hle. Office kai tan ni-ah hian Headquarters Office bakah Executive Secretary Office, Aizawl leh Lawngtlai te leh Department hrang hrang ten an Office hi hawngin hna pangngai an chhunzawm bawk.

Naktuk, January ni 8, 2021 (Zirtawpni) khan thawktute inhlantharna Programme pawh kum danga tih thin dan ang ni lovin, Office hrang hrang te leh Institution ten an mahni office theuhah Inhlantharna an nei ang. Kum dangah chuan Inhlantharna Programme hi Hqrs Office leh BCM Institutions leh Department hrang hrang bakah Bialtu Pastor leh Pensioner ten  a huhovin an lo hmang thin a ni.

Kuminah erawh chuan hrileng avangin hetianga punkhawmna hun hi hman theih a ni lo va, Department hrang hrang ten anmahni Office theuhah Inhlantharna hi an hmang a, Office leh Institution Head te ruahmanna angin Programme pawh anmahni office theuhah an hmang ang.